28 قاراشا, 15:57 772 0 قوعام اسەل انۋاربەك

قانداستار ەلوردادا باس قوستى

بۇگىن نۇر-سۇلتان قالاسىندا «وتانداستار. بولاشاققا باعدار» اتتى حالىقارالىق دوڭگەلەك ۇستەل شىمىلدىعىن ءتۇردى. شارا اياسىندا شەت مەملەكەتتەردەن كەلگەن قانداستارىمىز باس قوستى.

 

حالىقارالىق دوڭگەلەك ۇستەل «وتانداستار قورى» كەاق جانە «دۇنيەجۇزى قازاقتارىنىڭ قاۋىمداستىعى» رقب ۇيىمداستىرۋىمەن وتۋدە. جيىننىڭ اشىلۋ سالتاناتىنا مەملەكەتتىك حاتشى قىرىمبەك كوشەرباەۆ، پرەمەر-ءمينيستردىڭ ورىنباسارى بەردىبەك ساپارباەۆ، اقپارات جانە قوعامدىق دامۋ ءمينيسترى داۋرەن اباەۆ، «وتانداستار قورى» كەاق پرەزيدەنتى نۇرتاي ابىقاەۆ قاتىستى.

 

قىرىمبەك كوشەرباەۆ، مەملەكەتتىك حاتشى:

– تاۋەلسىزدىك العالى بەرى ەلىمىزگە 1 ميلليونان استام قانداسىمىز كەلىپ، وتانىمىزدىڭ ءبىر-ءبىر ۋىعىنا اينالىپ، مەملەكەتىمىزدىڭ وركەن جايۋىنا ۇلەستەرىن قوسۋدا. قانداستارىمىزدىڭ باسپانامەن جانە جۇمىسپەن قامتۋ ماسەلەسى 2017-2021 ارنالعان «ەڭبەك» باعدارلاماسى اياسىندا ءوزىنىڭ شەشىمىن تاۋىپ وتىر. سونىمەن بىرگە، قازىرگى ۋاقىتتا شەتەلدەن كەلگەن اعايىندارعا قۇجاتتى رەسىمدەۋدە كورسەتىلەتىن قىزمەتتەردى وڭتايلاندىرۋ، شەتەلدەگى وتانداستاردى مەملەكەتتىك تۇرعىدا قولداۋ تۋرالى زاڭنامالىق تەتىكتەردى ەنگىزۋ جونىندە دە ماڭىزدى شارالار دا قولعا الىنادى.

 

بەردىبەك ساپارباەۆ، پرەمەر-ءمينيستردىڭ ورىنباسارى:

– شەتەلدەگى قانداستارىمىزدىڭ ىشىندە مىقتى قالتالى ازاماتتارىمىز، عالىمدار مەن ونەرپازدار بار. ولار وزدەرىنىڭ وتاندارىنا كومەكتەسۋ كەرەك. سىزدەر باسپاسوزدەن جاقسى بىلەسىزدەر: ارمياندار مەن ەۆرەيلەردىڭ ارمەنياعا، يزرايلگە قالاي كومەك جاتقانى بەلگىلى. بىزدە دە سولاي بولۋ كەرەك. قانشا دەگەنمەن وتانىمىز ءبىر – قازاقستان. امەريكادا تۇراسىڭ با، قىتايدا تۇراسىڭ با – جۇرەگىڭ قازاقستان دەپ سوعۋ كەرەك. سوندىقتان ءبىزدىڭ ءوتىنىشىمىز – وسى جاعىنا دا كوڭىل بولسەڭىزدەر.

داۋرەن اباەۆ، اقپارات جانە قوعامدىق دامۋ ءمينيسترى:

– ءبىز شەتەلدەگى قانداستاردى قولداۋدىڭ جاڭا تەتىگىن كەشەندى تۇردە پىسىقتاپ جاتىرمىز. ول – حالىقارالىق تاجىريبەگە نەگىزدەلگەن مەحانيزم. ەكىنشىدەن، مينيسترلىك ەتنيكالىق قازاقتاردىڭ ەلىمىزگە كوشۋ ءراسىمىن وڭتايلاندىرۋعا باعىتتالعان جۇيەلى شارالار ازىرلەۋ بويىنشا ۇلكەن جۇمىس جۇرگىزدى. ءبىز ادامداردىڭ «قانداس» مارتەبەسىن الۋعا ءوتىشىن بەرۋىنەن باستاپ قازاقستاندىق پاسپورت بەرگەنگە دەيىن بارلىق پروتسەستى تالداپ، قانداستاردان سۇرالاتىن قۇجات سانىن 46-دان 20-عا دەيىن قىسقارتامىز.

نۇرتاي ابىقاەۆ، «وتانداستار قورى» كەاق پرەزيدەنتى:

– شەت ەلدەگى وتانداستار مەن قازاق مادەني ورتالىقتارىن قولداۋ ماقساتىندا شەكارالىق وبلىستارمەن مەموراندۋمدارعا قول قويۋ ارقىلى شەت ەلدەردەگى قازاق مادەني ورتالىقتارىنا قامقورلىق جاساۋدى قولعا الدىق. الايدا الدىمىزدا ءالى دە تالاي اسۋ بار. ءتۇيىنى تارقاماعان تۇيتكىلدەر، كۇرمەۋى شەشىلمەگەن كۇردەلى جايتتەر دە جوق ەمەس. وسى ورايدا «وتانداستار قورى» جۇمىسىنىڭ تيىمدىلىگى مەن ناتيجەلىلىگىن ارتتىرۋعا بايلانىستى بىرقاتار ۇيىمداستىرۋ ماسەلەلەرىن كەشەۋىلدەتپەي شەشۋ كەرەك دەپ ويلايمىز.

 

ايتا كەتەيىك، دوڭگەلەك ۇستەل اياسىندا تاقىرىپتىق پانەلدىك سەسسيالار ۇيىمداستىرىلۋدا. شەت مەملەكەتتەردەگى قازاقتىلدى باق وكىلدەرى قاتىسقان پانەلدىك سەسسيادا جۋرناليستەر اراسىنداعى ءوزارا ىنتىماقتاستىق ماسەلەسى ءسوز بولدى. «اباي» مادەني ورتالىعىنىڭ پانەلدىك سەسسياسىندا قازاق مادەنيەتىن، ونەرىن، ادەبيەتىن شەت مەملەكەتتەردە دامىتۋ ماسەلەسى تالقىلانۋدا. ال «جاس قازاق» جاستار كلۋبىنىڭ پانەلدىك سەسسياسىندا شەت ەلدەردەگى قازاق جاستارىن تاريحي وتانىن اينالاسىنا شوعىرلاندىرۋ جانە ولارعا جان-جاقتى قولداۋ كورسەتۋ ماسەلەسى قوزعالادى.

سوڭعى جاڭالىقتار