25 قاراشا 2019, 21:51 763 0 نۇر وتان انار لەپەسوۆا

نۇرسۇلتان نازارباەۆ: ءماسليحاتتاردىڭ مارتەبەسىن نىعايتۋ قاجەت

نۇرسۇلتان نازارباەۆ "Nur Otan" پارتياسى وبلىستىق فيليالدارىنىڭ وكىلدەرىمەن كەزدەستى، دەپ حابارلادى  ەلباسىنىڭ رەسمي سايتى. 

وتىرىسقا "Nur Otan" پارتياسىنىڭ پارلامەنت ماجىلىسىندەگى فراكتسيا  دەپۋتاتتارى، ءماسليحات فراكتسيالارىنىڭ حاتشىلارى مەن جەتەكشىلەرى قاتىستى. كەزدەسۋ بارىسىندا پارتيا توراعاسىنىڭ ءبىرىنشى ورىنباسارى باۋىرجان بايبەك جانە پارتيا فيليالدارىنىڭ  وكىلدەرى بايانداما جاسادى.

بايانداماشىلاردى تىڭداعان سوڭ، ەلباسى "Nur Otan" پارتياسىنىڭ قالىپتاسۋى مەن دامۋىنا ۇلەس قوسقان بارلىق مۇشەلەرىنىڭ ەڭبەگىن  اتاپ ءوتتى.

"Nur Otan" بىزدىڭ قوعامىمىزدىڭ الۋان تۇرلىلىگىن كورسەتەدى. ءبىز – ەل بولاشاعىنا جاۋاپتى بۇكىل قازاقستان حالقىنىڭ پارتياسىمىز، ناقتى ىستەر پارتياسىمىز.  بىزدە قازاقستاننىڭ دامۋىنا قاتىستى ناقتى ۇستانىم بار، ءتيىستى ستراتەگيا مەن جۇمىس جوسپارلارى بەكىتىلدى، قاجەتتى رەسۋرستار قاراستىرىلعان، - دەدى قازاقستاننىڭ تۇڭعىش پرەزيدەنتى.

سونىمەن قاتار، پارتيا توراعاسى قوعامدى قازاقستان پرەزيدەنتى قاسىم-جومارت توقاەۆتىڭ توڭىرەگىندە توپتاستىرۋدىڭ جانە مەملەكەت باسشىسى العا قويعان مىندەتتەردى جۇزەگە اسىرۋ ءۇشىن شارالار قابىلداۋدىڭ ماڭىزدىلىعىنا توقتالدى.

سونىمەن بىرگە، نۇرسۇلتان نازارباەۆ قازاقستاننىڭ تاۋەلسىزدىك جىلدارىنداعى تابىستارى تۋرالى ايتىپ، ەلدىڭ بارلىق جەتىستىكتەرى پارتيامەن جانە پارتيا مۇشەلەرىنىڭ كۇندەلىكتى جۇمىسىمەن تىعىز بايلانىستى ەكەنىن اتاپ ءوتتى.

سوڭعى جىلدارى قازاقستاننىڭ جالپى ىشكى ءونىمى 11 ميللياردتان 170,5 ميلليارد دوللارعا دەيىن ءوستى. 90-جىلداردىڭ باسىندا حالىقتىڭ ۇشتەن بىرىنەن كوبى كەدەيلىك شەگىندە ءومىر سۇرەتىن. بۇگىن بۇل كورسەتكىش 4,6%-عا دەيىن تومەندەدى. شاعىن جانە ورتا بيزنەستىڭ ءجىو-دەگى ۇلەسى 27% قۇرايدى. ءبىز 300 ميلليارد دوللاردان استام تىكەلەي شەتەلدىك ينۆەستيتسيا تارتتىق. وسى جىلدار ىشىندە قازاقستاننىڭ ترانزيتتىك الەۋەتىن ەداۋىر نىعايتا الدىق، - دەدى ەلباسى.

سونداي-اق، تۇڭعىش پرەزيدەنت قازاقستاننىڭ 2050 جىلعا دەيىنگى دامۋ ستراتەگياسىنىڭ نەگىزگى باسىمدىقتارىن العا جىلجىتۋ جانە ءتۇسىندىرۋ بويىنشا جۇمىستى ۇيىمداستىرۋدىڭ ماڭىزدىلىعىنا نازار اۋداردى.

نۇرسۇلتان نازارباەۆ ۇكىمەتتىڭ ەكونوميكانىڭ جەكەلەگەن سالالارىن ودان ءارى دامىتۋ جونىندەگى جوسپارلارىنا جەكە توقتالدى.

ۇكىمەت وڭىرلەردى، اسىرەسە، اۋىلداردى قولداۋعا، جاڭا جۇمىس ورىندارىن قۇرۋعا جانە الەۋمەتتىك ماسەلەلەردى شەشۋگە باعىتتالعان باعدارلامالار قابىلدادى. ماسەلەن، 2026 جىلعا دەيىن اۋىلداردى قولداۋعا 2 تريلليون تەڭگەگە جۋىق قاراجات قاراستىرىلىپ وتىر. الداعى ءۇش جىلدا حالىقتى اۋىز سۋمەن قامتاماسىز ەتۋگە 560 ميلليارد تەڭگە ءبولۋ جوسپاردا بار. وسى جۇمىستار ناقتى ورىندالاتىن بولسا، 2023 جىلدىڭ سوڭىنا قاراي اۋىلدى جەرلەردىڭ بارلىعى ساپالى اۋىز سۋمەن قامتىلادى ، - دەدى پارتيا توراعاسى.

سونىمەن قاتار، ەلباسى شاعىن جانە ورتا بيزنەستىڭ ەل ەكونوميكاسىنداعى ۇلەسىن ۇلعايتۋ بويىنشا جوسپارلانعان شارالار مەن "ەڭبەك" باعدارلاماسىن ىسكە اسىرۋدىڭ بولجامدى ناتيجەلەرى تۋرالى ايتتى.

الداعى ەكى جىلدا "ەڭبەك" باعدارلاماسىمەن شامامەن 1,5 ميلليون ادام قامتىلىپ، 750 مىڭنان استام جۇمىس ورنى اشىلادى. 2020-2025 جىلدارى شامامەن 1 ميلليون پاتەر سالىناتىن بولادى، - دەدى نۇرسۇلتان نازارباەۆ.

جيىن بارىسىندا قازاقستاننىڭ تۇڭعىش پرەزيدەنتى پارتيانىڭ جەرگىلىكتى جەرلەردە جۇمىس تيىمدىلىگىن ودان ءارى ارتتىرۋدىڭ بىرقاتار نەگىزگى باعىتتارىن اتادى.

ءار اكىمنىڭ جانە ماسليحاتتارداعى فراكتسيا دەپۋتاتتارىنىڭ پارتيالىق جاۋاپكەرشىلىگىن تۇبەگەيلى كۇشەيتۋىمىز كەرەك. بۇگىنگى تاڭدا بارلىق رەفورمالار وڭىرلەردى دامىتۋعا باعىتتالعان. ماسەلەن، سوڭعى 10 جىلدىڭ ىشىندە جەرگىلىكتى بيۋدجەتتەر 3 ەسەگە جۋىق ءوسىپ، 4,7 ترلن تەڭگەنى قۇرادى. بولىنگەن قاراجاتتىڭ جۇمسالۋىنا پارتيالىق باقىلاۋدى ۇيىمداستىرۋ ماڭىزدى. سونىمەن قاتار، دەپۋتاتتاردىڭ جۇمىسىن ودان ءارى جاقسارتۋ جانە بارلىق ءماسليحاتتاردىڭ مارتەبەسىن نىعايتۋ جونىندەگى شارالاردى قابىلداۋ قاجەت، - دەدى نۇرسۇلتان نازارباەۆ.

سونىمەن قاتار، "Nur Otan" پارتياسىنىڭ توراعاسى ءار وبلىستا، قالادا جانە اۋداندا سايلاۋالدى باعدارلامالارىن دايىنداۋدى قامتاماسىز ەتۋدى تاپسىردى.

كەلەسى جىلى وڭىرلەردى دامىتۋدىڭ بەسجىلدىق باعدارلامالارىن ىسكە اسىرۋ اياقتالادى. جاڭا باعدارلامالاردى قابىلداۋ قاجەتتىلىگى جاڭا ەلەكتورالدىق كەزەڭگە سايكەس كەلىپ وتىر. سوندىقتان بۇل باعدارلامالار ءار ءوڭىر بويىنشا ءماسليحات سايلاۋىندا پارتيانىڭ سايلاۋالدى باعدارلاماسىنىڭ نەگىزىنە اينالۋعا ءتيىس. "Nur Otan" پارتياسىنىڭ ءماجىلىس سايلاۋىنداعى سايلاۋالدى باعدارلاماسىنا كەلەتىن بولساق، بۇل جۇمىستى ساياسي كەڭەس بيۋروسىنىڭ مۇشەسى رەتىندە پرەمەر-مينيستر باسقارۋى قاجەت. بۇل باعدارلامانى قازىردەن باستاپ دايىنداۋعا كىرىسكەن ءجون، - دەدى قازاقستان رەسپۋبليكاسىنىڭ تۇڭعىش پرەزيدەنتى.

سونىمەن بىرگە، ەلباسى ساپالى پارتيالىق تىزىمدەردى قالىپتاستىرۋ ءۇشىن اشىق ىشكى پارتيالىق ىرىكتەۋ جۇرگىزۋدىڭ ماڭىزدىلىعىنا نازار اۋداردى.

ءار ماسليحاتتاعى سايلاۋالدى پارتيالىق تىزىمدەرگە كەمىندە 30% ايەلدەر جانە 20% 35 جاسقا دەيىنگى جاستار ەنۋى كەرەك. سونداي-اق، تىزىمگە حالىقتىڭ ءتۇرلى توپتارىنىڭ وكىلدەرى، ەلگە ورالعان وتانداستار، مۇمكىندىگى شەكتەۋلى جاندار، كاسىپكەرلەر مەن باق وكىلدەرى ەنۋگە ءتيىس، - دەدى نۇرسۇلتان نازارباەۆ.

سونىمەن قاتار، پارتيا توراعاسى جەرگىلىكتى جەرلەردە پارتيا ورگاندارىنىڭ جۇمىسىن كۇشەيتۋ جانە پارتيانىڭ ەل وڭىرلەرىندەگى بىرىكتىرۋشى ءرولىن ارتتىرۋ قاجەتتىلىگىن اتاپ ءوتتى.

ءسوز سوڭىندا ەلباسى تاعى دا پارتيانىڭ ەلەكتورالدى كەزەڭ قارساڭىنداعى جۇمىسىن كۇشەيتۋدىڭ ماڭىزدىلىعىنا توقتالدى.

جەڭىسكە جەتۋ ءۇشىن بارلىق رەسۋرستاردى جۇمىلدىرۋىمىز كەرەك. اقپان ايىندا پارتيا سەزى وتەدى. وندا ءبىز پارتيا جۇمىسىن جانداندىرۋدىڭ الدىن-الا ناتيجەلەرىن شىعارىپ، الداعى ەلەكتورالدىق مىندەتتەردى ەگجەي-تەگجەيلى تالقىلايمىز. قازىر "Jas Otan" مەملەكەتتىك ورگاندارمەن بىرلەسىپ 2025 جىلعا دەيىن جاڭا "جاستار-وتانعا" باعدارلاماسىن ازىرلەۋدە. وندا بۇگىنگى جاستاردىڭ بارلىق سۇرانىستارىنا جاۋاپتار كورسەتىلەدى. ءساۋىر ايىندا جاڭا باعدارلاما "Jas Otan" سەزىنە ۇسىنىلۋى قاجەت، - دەدى نۇرسۇلتان نازارباەۆ.

باسيك2.jpg

كەزدەسۋ بارىسىندا ەلباسى بەلسەندى مۇشەلەردى "Nur Otan" پارتياسىنىڭ دامۋىنا قوسقان ۇلەسى ءۇشىن "بەلسەندى قىزمەتى ءۇشىن" مەدالىمەن ماراپاتتادى

سوڭعى جاڭالىقتار