19 قاراشا, 11:00 312 0 زاڭ انار لەپەسوۆا

پوليتسيا قايتىس بولعان ازاماتقا ايىپپۇل سالىپ كەلگەن

رەسەيدىڭ كوستروم وبلىسىندا پوليتسەيلەر قايتىس بولعان ەر ادامنىڭ اتىنا جالعان حاتتامالار تولتىرعان. بۇل پروكۋرورلىق تەكسەرىس كەزىندە انىقتالدى، دەپ حابارلايدى وبلىستىق پروكۋراتۋرانىڭ ءباسپاسوز قىزمەتى.

«تەكسەرىس بارىسىندا 2019 جىلدىڭ شىلدە-قازان ايلارىنىڭ ارالىعىندا مۋنيتسيپالارالىق پوليتسيا ءبولىمىنىڭ قىزمەتكەرلەرى اكىمشىلىك قۇقىق بۇزۋشىلىق تۋرالى كودەكستىڭ «قوعامدىق ورىنداردا ماس كۇيىندە ءجۇرۋ» بابىنا سايكەس ءۇش جالعان حاتتاما تولتىرىپ، شاريا تۇرعىنىنىڭ ايىپپۇل تۇرىندەگى جاۋاپتىلىققا نەگىزسىز تارتىلعانى انىقتالدى»، - دەلىنەدى حابارلامادا.

ۆەدومستۆو مالىمەتىنشە، ەر ادام 2019 جىلدىڭ ماۋسىم ايىندا كوز جۇمعان ەكەن.

«تەكسەرىس ماتەريالدارى پوليتسيا قىزمەتكەرىن قىلمىستىق قۋدالاۋ ماسەلەسىن شەشۋ ءۇشىن، تەرگەۋ ورگاندارىنا جىبەرىلدى. قازىرگى ۋاقىتتا قىلمىس بەلگىلەرى بويىنشا قىلمىستىق ءىس قوزعالدى»، - دەيدى ءباسپاسوز قىزمەتىندەگىلەر.

سوڭعى جاڭالىقتار