18 قاراشا, 16:53 290 0 رۋحانيات انار لەپەسوۆا

ماڭعىستاۋدا مۇرات وسكىنبايۇلىنىڭ 115 جىلدىعى اتالىپ ءوتتى

ماڭعىستاۋدا كۇيشى، سازگەر، جىرشى، اقىن مۇرات وسكىنبايۇلىنىڭ 115 جىلدىعىنا ارنالعان «كۇيگە كەنەن جىر-ساندىق» اتتى ەسكە الۋ كونتسەرتى ءوتتى.

شارا اقىننىڭ اتى بەرىلگەن ماڭعىستاۋ وبلىستىق فيلارمونيادا ءوتتى. كونتسەرت ابىل تاراقۇلى اتىنداعى قازاق وركەسترنىڭ ورىنداۋىنداعى كۇيشىنىڭ «ورەن» اتتى كۇيىمەن باستالدى. كەيىن سازگەردىڭ ءومىربايانى مەن ونەر جولى باياندالىپ، ارتى مۇراتتانۋشى، مۋزىكا زەرتتەۋشى ايتبەرگەن جاڭبىرشىنىڭ وسكىنباەۆتار اۋلەتى تۋرالى «كۇي قونىپ، كيە دارىعان اۋلەت» كىتابىنىڭ تۇساۋكەسەرىمەن جالعاستى.

«1978 جىلى العاشقى ديپلومدىق جۇمىسىم مۇرات وسكىنبايۇلى تۋرالى بولعان-دى. سازگەردى مەن ءتورت جىل بويى زەرتتەدىم. ديپلومىمدى قورعاعاننان كەيىن، زەرتتەۋدى اقىننىڭ وزىنە اپاردىم. قاتتى قۋاندى. «مەن تۋرالى كىتاپ جازۋىڭا بولادى عوي دەدى», - دەپ اۆتور كىتاپ تاريحىنان سىر شەرتتى. ونىڭ ايتۋىنشا، ەڭبەك ءبىراز جىل باسىلىمدارعا جەتپەي، جارىققا شىعۋى كەيىنگە شەگەرىلە بەرگەن.

كىتاپتىڭ تۇساۋىن وبلىس اكىمىنىڭ ورىنباسارى قانىبەك جۇماشەۆ، قوعام قايراتكەرى القاجان مەدەلۇلى، مۇرات وسكىنبايۇلىڭ ۇلى ءازىرباي وسكىنباەۆ جانە اۆتوردىڭ ءوزى كەستى.

M-rat-skinbaj-lyny-115-zhyldy-y-3.jpg

«الەم مادەنيەت قورجىنىنا 300-دەن استام كۇي سالعان، جامبىل اتىنداعى قازاق مەملەكەتتىك فيلارمونيا مەن «قازاقكونتسەرت» بىرلەستىگىنە ءوز قولتاڭباسىن قالدىرعان مۇرات وسكىنبايۇلى كۇيشىلەردىڭ بىرەگەيى ەدى. ونىڭ جالپى تۇركىلىك مۋزىكانىڭ بىلگىر ورىنداۋشىسى بولعان فەنومەندىگى ءوز الدىنا بولەك اڭگىمە. ال مىنا كىتاپ وقىرمانداردىڭ كوڭىلىنەن شىعادى دەپ سەنەمىز. وقىرمانى كوپ بولسىن!»- دەدى ق.جۇماشەۆ.

تۇساۋكەسەردەن كەيىن مەرەكەلىك كونتسەرت كۇيشىنىڭ اكەسى وسكەنباي قالمانبەتۇلىنىڭ كۇيلەرى: «بۇلبۇل اقجەلەڭ»، «جەتى بۇلبۇل»، مامىرتاي رۋىنان شىققان ايشا اتتى ءبيشىنىڭ ونەرىنە ارنالعان «كەربەز ايشا»، سازگەردىڭ كۇيلەرى: «قازاقستان»، تولىق نۇسقاسىنىڭ ماڭعىستاۋدا ساقتالۋىنا دەمەۋ بولعان «اقساق قۇلان جوشى حان»، «ورلەۋ»، ۇلى وتان جەڭىسىنە ارناعان «جەڭىس»، سونداي-اق حالىق كۇيلەرى: «قاقپالى ناۋايى»، «بالا نوعاي سازى» ورىندالدى.

M-rat-skinbaj-lyny-115-zhyldy-y-5.jpg

بۇل شىعارمالاردى قازاقستان رەسپۋبليكاسىنىڭ ەڭبەك سىڭىرگەن قىزمەتكەرى، «قۇرمەت» وردەنىنىڭ يەگەرى سەرجان شاكىرات، قر ەڭبەك سىڭىرگەن ءارتىسى روزا ايدارباەۆا جانە قر ەڭبەك سىڭىرگەن قايراتكەرى، ديريجەر راحات مادرەەۆ سەكىلدى ونەر مايتالماندارى ورىندادى. مۇرات وسكىنبايۇلى – قازاق كۇيىنىڭ ونەرىنىڭ ءدۇلدىلى، ماڭعىستاۋدىڭ كۇيشىلىك جانە جىراۋلىق ونەرىن جالعاستىرۋشى، سازگەر، اقىن.

1903 جىلى ماڭعىستاۋ وبلىسىنىڭ قاراقيا اۋدانى، قاراقيا ويپاتىنىڭ كۇن شىعىس جازىق بەتىندەگى جەتىباي ەلدى مەكەنىندە (قازىرگى مۇنايلى اۋدانى، جەتىباي ەلدى مەكەنى) «ادايدىڭ جەتى قايقىسىنىڭ» بىرى بوپ اتانعان وسكىنباي قالمامبەتۇلى وتباسىندا دۇنيە كەلگەن. الماتىدا جامبىل اتىنداعى قازاق مەملەكەتتىك فيلارمونيادا، كەيىن «قازاقكونتسەرتتە» قىزمەت اتقارعان، قازاقسسر-ءىنىڭ «ءى دارەجەلى دومبىراشىسى»، سوڭعى جىلدارىن ماڭعىستاۋدا وتكىزگەن كۇيشى 1982 جىلى 29 قاڭتاردا دۇنيەدەن وتەدى.

M-rat-skinbaj-lyny-115-zhyldy-y-1.jpg

2008 جىلى ماڭعىستاۋ وبلىستىق فيلارمونياعا سازگەردىڭ ەسىمى بەرىلدى. 2004 جىلدان بەرى ءار ەكى جىل سايىن وتەتىن مۇرات وسكىنبايۇلى اتىنداعى رەسپۋبليكالىق بايقاۋ ءوز باستاۋىن الدى. 2018 جىلى سايىسقا ءازىربايجان، وزبەكستان، قىرعىزستان ەلدەرىنەن ونەرپازدار قاتىسىپ، بايقاۋ حالىقارالىق دەڭگەيدە وتكىزىلدى. كونتسەرتتە جۇمابەك قادىرقۇلوۆ، عازيزا ۇزاقباەۆا، ابىلاي تىلەپبەرگەنوۆ سەكىلدى سايىس جەڭىمپازدارى كۇيشىنىڭ ونەرىنە قۇرمەت ءبىلدىرىپ، «اداي» كۇيىن ورىندادى.

سوڭعى جاڭالىقتار