18 قاراشا, 14:26 301 0 ساياسات انار لەپەسوۆا

مەملەكەتتىك قىزمەتشىلەر اۋىلدىق اكىمدىكتەرگە جىبەرىلەدى

اۋىلدى جەرلەردە اكىمدىكتە جۇمىس ىستەيتىن ماماندار تاپشى. وسىعان بايلانىستى ۇلتتىق ەكونوميكا ءمينيسترى رۋسلان دالەنوۆ مەملەكەتتىك قىزمەتشىلەردى "ديپلوممەن اۋىلعا" باعدارلاماسىنا قوسۋدى ۇسىندى، دەپ حابارلايدى Sputnik

"اۋىلدا كادر جەتىسپەۋشىلىگىن شەشۋ ءۇشىن مەملەكەتتىك قىزمەتشىلەردى "ديپلوممەن اۋىلعا" جوباسىنا قوسۋدى ۇسىنامىز. بارلىق ۇسىنىستار ءبىز ازىرلەپ جاتقان زاڭ جوباسىندا قاراستىرىلادى", - دەدى دالەنوۆ ماجىلىستە وتكەن ۇكىمەت ساعاتىندا.

رەسمي مالىمەتكە سايكەس، اۋىلدىق اكىمدىكتەردە 450 ورىن بوس تۇر. كادر جەتىسپەۋشىلىگى بارىنشا بايقالادى. ال مەملەكەتتىك قىزمەتشىلەر جالاقىنىڭ تومەندىگىن سىلتاۋ ەتىپ، اۋىلعا بارعىسى كەلمەيدى.

"اۋىلعا باراتىن مامانداردى قولداۋ قاجەت. "ديپلوممەن اۋىلعا" باعدارلاماسىندا مەملەكەتتىك قىزمەتشىلەر بولۋى ءتيىس. وسى باعدارلاما 2009 جىلدان باستاپ قولعا الىندى. سودان بەرى 60 مىڭنان استام مامان قولداۋ تاپتى. سونىڭ ىشىندە 27 مىڭنان اسا مامان تۇرعىن ءۇي العان. اۋىلعا كەلەتىن ماماندارعا 250 000 مىڭ تەڭگە كولەمىندە كوتەرمە جاردەماقى جانە تۇرعىن ءۇي الۋعا 4 ميلليون تەڭگەگە دەيىن 0,01 پروتسەنتپەن كرەديت بەرىلەدى", - دەپ اتاپ كورسەتتى دالەنوۆ.

ءمينيستردىڭ سوزىنە قاراعاندا، جىل سايىن "ديپلوممەن اۋىلعا" باعدارلاماسىنا رەسپۋبليكالىق بيۋدجەتتەن 14 ميلليارد تەڭگە ءبولىنىپ تۇرادى. پرەزيدەنتتىڭ تاپسىرماسى بويىنشا كەلەسى جىلدان باستاپ قارجىلاندىرۋ كولەمى 20 ميلليارد تەڭگەگە دەيىن وسەدى.

 

سوڭعى جاڭالىقتار