18 قاراشا, 10:59 297 0 قاۋىپسىزدىك انار لەپەسوۆا

قازاقستاندا ءسۇت ساپاسىنا تالاپ كۇشەيەدى

قاراعاندى وبلىسىنداعى ەڭ ءىرى ءسۇت زاۋىتى كەدەندىك وداقتىڭ جاڭا ەرەجەسىنە دايىن، حابارلايدى «حابار 24».

2020 جىلدىڭ 1 قاڭتارىنان باستاپ ەلىمىزدە ءسۇت ساپاسىنا تالاپ كۇشەيەدى. ياعني وتاندىق زاۋىتتار كەدەندىك وداقتىڭ تەحنيكالىق رەگلامەنتىنە سايكەس كەلمەيتىن ءسۇتتى ەندى قابىلداي المايدى. اقتىڭ قۇرامىندا ادام اعزاسىنا زيان كەلتىرەتىن زات بولماۋى ءتيىس. ال بىزدە زاۋىتقا قاجەتتى شيكىزاتتىڭ 70 پروتسەنتى اۋىل-ايماقتان جينالادى. ونىڭ تەڭ جارتىسى وكىنىشكە قاراي جاڭا تالاپقا ساي ەمەس. سوندىقتان زاۋىتتار ءسۇت تاپشىلىعىن تارتۋى مۇمكىن. بۇل اسىرەسە، شاعىن كاسىپورىنداردىڭ جۇمىسىنا تۇساۋ بولادى. ال ءىرى زاۋىتتار بۇعان ەرتە قامدانىپتى. ايتالىق، قازىر وڭىردە 30-عا جۋىق ءسۇت قابىلدايتىن ارنايى بەكەت اشىلعان. مۇندا تۇرعىندار تاپسىراتىن ءسۇتتىڭ ساپاسى مۇقيات تەكسەرىلەدى. ميكروبيولوگيالىق، سوماتيكالىق كورسەتكىشتەرى انىقتالادى.

– ءسۇت قابىلداۋ بەكەتتەرىنىڭ بارلىعىندا شيكىزاتتىڭ ساپاسىن تەكسەرەتىن كاسىبي ماماندار وتىرادى. ولار اقتى تەك قابىلداپ قانا قويماي، تۇرعىندارعا اقپاراتتىق تۇسىندىرمە جۇمىستارىن دا جۇرگىزەدى. سەبەبى وداقتىڭ جاڭا تالابى ءبىرىنشى كەزەكتە ساۋىنشىلارعا تىكەلەي قاتىستى. سيىردى ساۋعان كەزدە قاراپايىم تازالىق ەرەجەلەرىن ساقتاۋ كەرەك. سوندا ەشقانداي ماسەلە تۋىندامايدى، - دەيدى ءسۇت وندىرەتىن كومپانيانىڭ باسقارۋشى ديرەكتورى ساۋلە جانكينا.

سوڭعى جاڭالىقتار