15 قاراشا, 15:38 326 0 رۋحانيات انار لەپەسوۆا

الماتىدا بيبىگۇل تولەگەنوۆانىڭ 90 جىلدىق مەرەيتويى اتالىپ ءوتتى

كۇمىس كومەي، جەزتاڭداي ءانشىنىڭ قۇرمەتىنە ارنالعان كونتسەرت قۇرمانعازى اتىنداعى قازاق ۇلتتىق كونسەرۆاتورياسىندا ۇيىمداستىرىلدى. وندا قازاقستاندىق جانە شەتەلدىك كومپوزيتورلارىنىڭ اريالارى، حالىق اندەرى جانە رومانستەر ورىندالدى.

حالقىمىزدىڭ سۇيىكتى ءانشىسىن مەرەكەلىك مەرەيتويىمەن قۇتتىقتاۋعا كەلۋشىلەردىڭ سانى وتە كوپ. ءتىپتى، كونتسەرتتىك زالدا ينە شانشار ورىن دا قالعان جوق، دەپ حابارلايدى "الماتى" ارناسى.

اتى اڭىزعا اينالعان ءانشىنىڭ داۋىسىن ەستۋ ءۇشىن جينالعان ءانشىنىڭ ونەرىنە تاعزىم ەتۋشىلەر بيبىگۇل تولەگەنوۆاعا ىستىق ىقىلاستارىن ءبىلدىرىپ، قۇتتىقتاۋ ءبىلدىردى. كونتسەرتتىك شارا بارىسىندا ارىپتەستەرى مەن شاكىرتتەرى دە ونەر كورسەتتى. سەمەي وبلىسىنىڭ تۋماسى بيبىگۇل تولەگەنوۆا ءوزىنىڭ ونەگەلى ءومىر جولىندا مۇعالىم دە بولعان، قازاق راديوسىندا دا جۇمىس جاساپ، فيلمدەرگە دە تۇسكەن ەدى. بيبىگۇل تولەگەنوۆانىڭ رەپەرتۋارىندا تەك قانا قازاقتىڭ حالىق اندەرى عانا ەمەس، سونىمەن قاتار شەتەلدىك كلاسسيكالىق شىعارمالار دا بار.

«ءالى كۇنگە دەيىن قولىمنان كەلگەنشە ەلىمە پايدامدى تيگىزگىم كەلەدى. ويتكەنى مەن ساحناعا شىعىپ، ءان ايتقاندا قانشاما ادام وسىندا وتىرىپ، ءنار، كۇش الىپ كەتتى. مەن ءۇشىن سول – وتە ۇلكەن دارەجە. سودان ارتىق ەشتەڭە جوق. ءاردايىم ەل الدىندا تىزەمدى بۇگىپ، ءيىلىپ سالەم بەرگەن سايىن حالىققا سۇيسىنەتىنمىن. جاسىم ۇلكەيگەن سايىن حالىق اياعىنان تىك تۇرىپ، مەنى قارسى الادى. ودان وتكەن باقىت، ودان ۇلكەن بايلىق جوق»، – دەدى كسرو جانە قر حالىق ءارتىسى بيبىگۇل تولەگەنوۆا.

مەرەيتوي كونتسەرتتە حالىقتىڭ ىستىق ىقىلاسىنا بولەنگەن بيبىگۇل تولەگەنوۆا ساحناعا ءوزى شىعىپ، اباي قۇنانباەۆتىڭ «جەلسىز تۇندە جارىق اي» ءانىن ورىندادى. جەزتاڭداي ءانشىنىڭ جاسى ۇلعايعانىمەن، ءالى دە قۇدىرەتتى تالانتىنا ءتانتى بولعان كورەرمەندەر دۋ قول شاپالاق ۇرۋدان شارشاعان جوق.

كونتسەرتتىڭ وسى قۇرمانعازى اتىنداعى كونسەرۆاتوريادا ءوتۋىنىڭ وزىندىك ەرەكشە سەبەبى بار ەكەن. مۇندا بيبىگۇل تولەگەنوۆا ءبىلىم الىپ، قازىرگى ۋاقىتقا دەيىن ستۋدەنتتەرگە ساباق بەرگەن.

«ۇلىلارىمىزدى دارىپتەپ، وسى قازىرگى جاستارعا ۇلگى ناسيحات بولاتىنداي قىلىپ جەتكىزۋ كەرەك. سونىڭ ءبىرى، ارينە، ءبىزدىڭ اق جارقىن، قازاقتىڭ بۇلبۇل ءانشىسى بيبىگۇل احمەتوۆنا تولەگەنوۆا. 90 جىلدىعى قۇتتى بولسىن اپامىزدىڭ. مەرەي جاسى ۇزاق بولسىن. وسى 90 جىلدىقتىڭ قارساڭىندا كوپتەگەن ءىس-شارالار ءجۇرىپ جاتىر»، - دەدى قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ.

كونتسەرتتە بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسىنىڭ لاۋرەاتتارى راسۋل جارماعامبەتوۆ، مادينا ورازباي، بالۋان بەركەنوۆ، حالىقارالىق كونكۋرستاردىڭ لاۋرەاتى مادي مادياروۆ، قر ەڭبەك سىڭىرگەن قايراتكەرى تولقىن زابيروۆا، يان رۋدكوۆسكي جەتەكشىلىك ەتەتىن كونسەرۆاتوريانىڭ ارالاس حورى، جانە ت.ب دارىندى جاستار ونەر كورسەتكەن بولاتىن. كونتسەرت بارىسىندا ساحنادا ءانىن ۇستازىنا ارناعان تولقىن زابيروۆا ءوزىنىڭ بيبىگۇل تولەگەنوۆا سياقتى قازاقتىڭ ءبىرتۋار ءانشىسىنىڭ شاكىرتى بولعانىن ماقتان تۇتاتىنىن ايتتى.

«اپايىمىزدىڭ قازاقستان بويىنشا قانشاما فيلارمونيالاردا، جالپى ونەر سالاسىندا ىستەپ جۇرگەن شاكىرتتەرى وتە كوپ. ياعني، مەن جالعىز شاكىرتى ەمەسپىن. الايدا «بيبىگۇل احمەتقىزى تولەگەنوۆانىڭ شاكىرتى دەگەن» ۇلى اتاققا يە بولعانىمدى ماقتان ەتەمىن. مەن ءۇشىن ول – ۇلكەن مارتەبە»، – دەدى ءانشى تولقىن زابيروۆا.

حالقىنىڭ جۇرەگىندە ماىڭگىلىك مەكەندەيتىن بيبىگۇل احمەتقىزىنىڭ ونەر جولىن جالعاستىرامىن دەيتىندەر كوپ. بۇلبۇل ءانشىنىڭ كوپتەگەن شاكىرتتەرى بۇگىندە ەلىمىزگە ەڭبەك سىڭىرگەن ارتىستەر اتانىپ، قازاقستان مادەنيەتى مەن مۋزىكا ونەرىنىڭ دامۋىنا ءوز ۇلەستەرىن قوسۋدا.

سوڭعى جاڭالىقتار