15 قاراشا, 09:34 286 0 جاھان انار لەپەسوۆا

داريعا نازارباەۆا جۇمىس ساپارىمەن ارمەنياعا باردى

سەنات سپيكەرى ارمەنيا پرەمەر-ءمينيسترى نيكول پاشينيان، ارمەنيا پرەزيدەنتى ارمەن ساركيسيان جانە ۇلتتىق جينالىس توراعاسى ارارات ميرزويانمەن كەزدەسىپ، ەكى ەل اراسىنداعى ىنتىماقتاستىقتى، ونىڭ ىشىندە پارلامەنتارالىق بايلانىستاردى دامىتۋ جولدارىن تالقىلاماق، دەپ حابارلايدى «حابار 24».

قازاقستان سەناتورلارى ارمەنيا ۇلتتىق جينالىسى توراعاسىنىڭ شاقىرۋىمەن ەرەۆانعا باردى. مۇندا داريعا نازارباەۆا مەن ارارات ميرزويان ساياسي، ەكونوميكالىق جانە مادەني ىنتىماقتاستىق جانە حالىقارالىق ماسەلەلەردى تالقىلادى.

– ارمەنيا مەن قازاقستان اراسىنداعى قارىم-قاتىناستار بارلىق سالا بويىنشا دامىپ كەلە جاتقانى قۋانتادى. ارا-قاتىناستى جاقىنداستىرۋدا پارلامەنتارالىق ىنتىماقتاستىقتىڭ ءرولى زور، - دەيدى ارمەنيا ۇلتتىق جينالىسىنىڭ توراعاسى ارارات ميرزويان. 

ءوز كەزەگىندە داريعا نازارباەۆا ارمەنيا تاۋەلسىز مەملەكەتتەر دوستاستىعى مەن ەۋرازيالىق ەكونوميكالىق وداقتاعى قازاقستاننىڭ سەنىمدى ارىپتەسى ەكەنىن اتاپ ءوتتى. سەنات توراعاسى قازاقستان مەن ارمەنيا پارلامەنتتەرى اراسىنداعى ىنتىماقتاستىق توبىنىڭ جۇمىسىنا ەرەكشە كوڭىل ءبولىپ، زاڭ شىعارۋ جۇمىسىندا بۇل توپتىڭ الەۋەتىن ءتيىمدى قولدانۋ قاجەتتىگىن جەتكىزدى. ايتا كەتەر ءجايت، ارميان دەپۋتاتتارىنىڭ ءبىر توبى بيىل مامىر ايىندا نۇر-سۇلتان قالاسىندا بولعان ەدى.

– حالىقتارىمىز اراسىنداعى تاريحي قاتىناستارىمىزدى ناعىز باۋىرلاستىق دەپ باتىل ايتا الامىن. تاريحي جانە مادەني تامىرلارىمىز ورتاق. ءتىپتى ارميان تىلىندە قازاقشاعا ۇقساس كوپ ءسوزدى ەستيمىن. قىپشاق مادەنيەتى ارمەنيا جەرىنە دە جەتكەن ەدى. ەلدەرىمىز اراسىنداعى تاۋار اينالىمى جوعارى، قازاقستاندىق ونىمدەردىڭ ارمەنياعا ەكسپورتى قازاقستانعا ارميان ونىمدەرىنىڭ يمپورتىنان ءسال اسىپ تۇر. جالپى ستاتيستيكاعا سۇيەنسەك، 2018 جىلى تاۋار اينالىمى 14 جارىم ميلليون دوللارعا جەتتى. بۇل كورسەتكىش وتكەن كەزەڭمەن سالىستىرعاندا ەداۋىر ءوستى. الايدا مۇنىمەن شەكتەلۋگە بولمايدى. وسى قاتىناستارىمىزدى دامىتۋدا الەۋەتىمىز زور دەپ سانايمىن، - دەدى داريعا نازارباەۆا.

ەكونوميستەردىڭ پىكىرىنشە، تاۋار اينالىمىن ءالى دە ارتتىرۋعا مۇمكىندىك جەتكىلىكتى. ەگەر بۇل جۇمىستار جۇيەلى تۇردە جۇزەگە اسسا، كوپ ۇزاماي ەكى ەلدىڭ ءوزارا ارەكەتتەسۋىنىڭ ەكونوميكالىق كورسەتكىشتەرى دە كوتەرىلە تۇسپەك.

سوڭعى جاڭالىقتار