14 قاراشا, 21:13 295 0 سپورت انار لەپەسوۆا

دوپينگ داۋىنىڭ سالقىنى: توكيو وليمپياداسىنا قازاقستاننان ەكى-اق زىلتەمىرشى قاتىسادى

حالىقارالىق اۋىر اتلەتيكا فەدەراتسياسى دوپينگ داۋىنا بايلانىستى قازاقستان قۇراماسىنا 2020 جىلعى وليمپياداعا 2 كۆوتا عانا بولگەن، دەپ حابارلايدى قازاقپارات.

«قازىرگى ۋاقىتتا دوپينگ داۋىنا بايلانىستى حالىقارالىق اۋىر اتلەتيكا فەدەراتسياسى قازاقستانعا تەك ەكى كۆوتا (1 ايەل، 1 ەر ادام – اۆت.) ءبولىپ وتىر. قاي سپورتشىلاردىڭ باراتىنى ءالى ايقىندالعان جوق. ءبىزدىڭ فەدەراتسيا سپورتشىلاردى ناتيجەسى بويىنشا عانا تاڭدايتىن بولادى. كىم بارىنشا كوپ سالماق كوتەرىپ، مەدالدان ءۇمىتتى بولسا – سول وليمپيادا ويىندارىنا بارادى»، - دەدى وكق-دا وتكەن ءباسپاسوز ءماسليحاتىندا سپورت جانە دەنە شىنىقتىرۋ ىستەرى كوميتەتى توراعاسى سەرىك ساپيەۆ.

كوميتەت توراعاسىنىڭ ايتۋىنشا، پارلامەنت ماجىلىسىندە دوپينگ قولدانعان سپورتشىلارعا جازانى كۇشەيتۋ تۋرالى زاڭ ءبىرىنشى قارالىمدا ماقۇلدانىپ قويعان.

«وليمپيادا الدىندا سپورتشىلارىمىز ەكى-ءۇش مارتە تەكسەرىلەدى. ولاردان وسى قازاقستاندا دوپينگ-سىناما الامىز. ول دوپينگ-سىنامالار گەرمانياعا جولدانىپ، قارالادى. كىمدە-كىم دوپينگتى تۇتىنعانى انىقتالسا – ءسوزسىز ولار وليمپياداعا بارمايدى. ول ماسەلەگە قاتتى قاراپ وتىرمىز»، - دەدى سەرىك ساپيەۆ.

ايتا كەتسەك، ءدال قازىرگى ۋاقىتتا جاپونيا استاناسى توكيودا وتەتىن جازعى وليمپيادا ويىندارى بويىنشا ۇلتتىق قۇراما ەنشىسىندە ازىرگە 14 تۇرىنەن 25 ليتسەنزيا بار.

 

سوڭعى جاڭالىقتار