13 قاراشا, 09:56 300 0 الەۋمەت انار لەپەسوۆا

اقتوبەدە ءار تال-كوشەت تۇگەندەلىپ، جەكە قۇجاتپەن بەكىتىلەدى

رەسەيلىك ماماندار اقتوبە قالاسىنداعى جاسىل جەلەكتى تۇگەندەيدى، دەپ حابارلايدى قازاقپارات. 

اقتوبە قالاسىندا جاسىل جەلەك سانىن ارتتىرۋ، ەگۋ، سۋارۋ، كۇتىپ ۇستاۋ جۇمىسىن جۇيەلى جۇرگىزۋ ءۇشىن بار اعاشتىڭ سانىن ءبىلۋ جوسپارلاندى.

«اقتوبە — ءبارىمىزدىڭ ورتاق ءۇيىمىز. IT-تەحنولوگيانىڭ دامىعان كەزىندە مالىمەتتەردىڭ ەلەكتروندىق بازاسىن، اۆتوماتتاندىرۋ جۇيەسىن جاساۋ قاجەت. ءارى جاسىل جەلەك قالا اۋماعىندا قاتاڭ باقىلاۋعا الىنۋى ءتيىس. بۇل ءۇشىن ءبىز تەحنيكالىق مۇمكىندىكتەرىمىزدى جەتىلدىرۋىمىز كەرەك. ماسەلەن، قالادا تال-كوشەتتىڭ سانى مەن ساپاسى تۋرالى ناقتى مالىمەت جوق. بۇل جاسىل جەلەكتى سۋارۋعا، كۇتىپ ۇستاۋعا بولىنەتىن قارجىنى نەگىزدەۋگە كەدەرگى كەلتىرەدى. سونداي-اق، قالادا دەندرولوگيالىق زەرتتەۋ جۇرگىزىلمەيتىنى انىق. ينجەنەرلىك جەلىنى جۇرگىزگەن كەزدە، قۇرىلىس سالعاندا، قايتا جوندەۋ جۇمىسى كەزىندە تال-تەرەكتىڭ زارداپ شەگەتىنى بەلگىلى»، - دەدى قالا اكىمىنىڭ ورىنباسارى جانگەلدى اۋباكىروۆ. رەسەيدە اعاشتاردى ەسەپكە الۋدى باستاعان «ۋلمۋس» قوعامدىق بىرلەستىگىنىڭ باس ديرەكتورى پاۆەل ۆوروبەۆ جانە ماسكەۋ پەداگوگيكالىق مەملەكەتتىك ۋنيۆەرسيتەتىنىڭ دوتسەنتى ەكاتەرينا چەرنياەۆا ءوز تاجىريبەسىمەن ءبولىستى.

«رەسەيدە 10 جىلدان بەرى «جاسىل جەلەك ءتىزىمى» اتتى باعدارلاما جۇزەگە اسىرىلىپ كەلەدى. ءوسىپ تۇرعان تال-كوشەت باعالاۋ جۇيەسىنە ەنگىزىلەدى جانە مالىمەتى ارنايى اقپاراتتىق جۇيەگە تىركەلەدى. سونىڭ ارقاسىندا قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ قىزمەتكەرلەرى كەز كەلگەن ۋاقىتتا جاسىل جەلەكتىڭ سانىنا، ساپاسىنا قاتىستى مالىمەتتى ءبىلىپ وتىرادى»، - دەدى پاۆەل ۆوروبەۆ. اعاشتاردى تۇگەندەۋ جۇمىسىنا اۋىل شارۋاشىلىعى كوللەدجىنىڭ وقۋشىلارى جانە ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتتەرى قاتىسادى. اقتوبە وڭىرلىك مەملەكەتتىك ۋنيۆەرسيتەتىنىڭ بيولوگ، اگرونوم دەندرولوگتان قۇرىلعان جۇمىس توبى ماسكەۋلىك ماماندارمەن بىرگە «اقتوبە قالاسىنىڭ جاسىل بەلدەۋىن قۇرۋ، كۇتىپ ۇستاۋ جانە قورعاۋ ەرەجەسىن» جاسايدى. ەسكە سالساق، 2017 جىلى وتىرعىزىلعان 1 ميلليون ءتۇپ كوشەت سۋارىلماي، قۋراپ قالعان بولاتىن. بۇل ءۇشىن بيۋدجەتتىڭ 70 ميلليون تەڭگەدەن استام قارجىسى جۇمسالدى.

 

سوڭعى جاڭالىقتار