12 قاراشا, 20:59 423 0 ساياسات انار لەپەسوۆا

مەملەكەت باسشىسى يراننىڭ سىرتقى ىستەر ءمينيسترىن قابىلدادى

قازاقستان پرەزيدەنتى يراننىڭ سىرتقى ىستەر ءمينيسترى مۇحاممەد دجاۆاد ءزاريفتى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى. 

قاسىم-جومارت توقاەۆ "اقوردا" رەزيدەنتسياسىندا "Astana Club" حالىقارالىق پىكىرتالاس الاڭىنا قاتىسۋ ءۇشىن نۇر-سۇلتان قالاسىنا كەلگەن يران يسلام رەسپۋبليكاسىنىڭ سىرتقى ىستەر ءمينيسترى مۇحاممەد دجاۆاد ءزاريفتى قابىلدادى.

تاراپتار ەكىجاقتى ىنتىماقتاستىقتىڭ قازىرگى احۋالى مەن پەرسپەكتيۆاسىن، سونداي-اق، وڭىرلىك جانە حالىقارالىق كۇن تارتىبىندەگى وزەكتى ماسەلەلەردى تالقىلادى.

مەملەكەت باسشىسى بيىلعى قازان ايىندا ەرەۆاندا وتكەن جوعارى ەۋرازيالىق ەكونوميكالىق كەڭەس اياسىندا پرەزيدەنت حاسان رۋحانيمەن تابىستى كەلىسسوز جۇرگىزگەنىن ايتتى. قازاقستان پرەزيدەنتى يراندىق ارىپتەسىنىڭ نۇر-سۇلتان قالاسىنا وزىنە ىڭعايلى ۋاقىتتا ساپارمەن كەلۋىن كۇتەتىنىن جەتكىزدى.

مۇحاممەد دجاۆاد زاريف قاسىم-جومارت توقاەۆقا قازاقستان استاناسىندا وزىنە كورسەتىلگەن قوناقجايلىلىق ءۇشىن العىس ايتتى.

يراننىڭ سىرتقى ىستەر ءمينيسترى "Astana Club" جۇمىسىنان العان اسەرىمەن بولىسە وتىرىپ، قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ فورۋمنىڭ پلەنارلىق وتىرىسىنداعى بايانداماسىن جانە جيىننىڭ سىندارلى اتموسفەراسىن جوعارى باعالادى.

سوڭعى جاڭالىقتار