12 قاراشا, 15:33 324 0 نۇر وتان Túrkistan Gazeti

نۇروتاندىقتار ەلىمىزدىڭ ءار ايماعىنداعى تۇيتكىلدى ماسەلەلەردى تالقىلادى

«Nur Otan» پارتياسى ەلىمىزدىڭ بارلىق ايماقتارىنداعى اۋماقتىق دامۋ باعدارلامالارىن ىسكە اسىرۋدىڭ ارالىق ناتيجەلەرىنە تالداۋ جاسادى. پارتيا ليدەرى نۇرسۇلتان نازارباەۆ ۇكىمەت پەن پارلامەنت ماجىلىسىندەگى «Nur Otan» فراكتسياسىنىڭ مۇشەلەرىمەن وتكەن جيىن بارىسىندا ايماقتىق دامۋ باعدارلامالارىنىڭ ورىندالۋ بارىسى تۋرالى تىڭدالىم ۇيىمداستىرۋدى جانە  جۇرگىزىلگەن تالداۋ جۇمىستارىنىڭ ناتيجەلەرىن ەسكەرە وتىرىپ، 2025 جىلعا دەيىنگى اۋماقتاردى دامىتۋدىڭ جاڭا باعدارلاماسىن ازىرلەۋدى تاپسىردى.

سونىمەن، ەلوردادا قالالىق ماسليحاتتاعى فراكتسيانىڭ دەپۋتاتتارى 42 مىڭ تۇرعىن وزدەرىنىڭ الەۋمەتتىك مارتەبەسىن ءالى كۇنگە كورسەتپەگەنى تۋرالى ماسەلەنى جەرگىلىكتى بيلىك ورگاندارىنىڭ الدىنا كولدەنەڭ تارتتى. جاعداي وسى كۇيىندە قالسا، بۇل جاقىن ارادا قالالىق ەمحانالاردىڭ، مەكتەپتەر مەن ەڭبەك نارىعىنداعى جۇكتەمەنىڭ شامادان تىس ارتۋىنا اكەلۋى مۇمكىن. الماتىدا جولدارداعى ءولىم-ءجىتىم، ەنەرگيا تيىمدىلىگى جانە ينفراقۇرىلىمدى دامىتۋ ماسەلەلەرى كوتەرىلدى.

ال شىمكەنتتە فراكتسيا مۇشەلەرى اۋرۋحانالار مەن ءبىلىم وشاقتارىنىڭ جەتىسپەۋشىلىگى وزەكتى بولىپ وتىرعانىن ايتادى. بۇگىندە شىمكەنتتەگى توعىز مەكتەپتە ءۇش اۋىسىمدا وقيدى. بۇل قاتارعا جۋىق ارادا قالاداعى تاعى سەگىز ءبىلىم ورداسى قوسىلۋى مۇمكىن.

باتىس قازاقستان وبلىسىندا 111 ماقساتتى كورسەتكىشتىڭ 97-سىنە قول جەتكىزىلگەنىمەن،  اپاتتى جانە ءۇش اۋىسىمدى مەكتەپتەر پروبلەماسى مۇندا دا بار. سونىمەن قاتار، استىق جيناۋدىڭ كورسەتكىشى تومەندەپ، جول-كولىك وقيعالارى ارتقان. قاراعاندى وبلىسىندا جول جوندەۋ، ينفراقۇرىلىم مەن تۇرعىن ءۇي قۇرىلىسى وزەكتى بولىپ وتىر. باعدارلاماعا تۇرعىنداردىڭ ءومىر ءسۇرۋ ساپاسى مەن كىرىسىنىڭ ءوسۋىن ايقىندايتىن كورسەتكىشتەر قوسىلعان.

شىعىس قازاقستان وبلىسىنداعى «Nur Otan» فراكتسياسىنىڭ دەپۋتاتتارى قوعامدىق كولىكتەردىڭ ساپاسىن ارتتىرۋ جانە مەكتەپتەر سالۋ قاجەتتىلىگىن العا تارتتى.  اقمولا وبلىسىندا اعىندى سۋلار جەلىلەرىن دامىتۋدى جەدەلدەتىپ، تۇرمىستىق قاتتى قالدىقتارعا ارنالعان نىساندار سالۋ قاجەت. سونداي-اق، مۇندا ونەركاسىپتىك الەۋەتتى ارتتىرۋ مەن شاعىن جانە ورتا بيزنەستى دامىتۋ ءۇشىن ينۆەستيتسيا تارتۋ جۇمىستارىن كۇشەيتۋ ماسەلەسى تۇر. سولتۇستىك قازاقستان وبلىسى تۇرعىن ءۇي قۇرىلىسى مەن جول جوندەۋ جۇمىستارىنىڭ جانە اۋىلدىق جەرلەردەگى ينجەنەرلىك كوممۋنيكاتسيالاردىڭ قارقىنىن جەدەلدەتۋگە نيەتتى.

پارتيا باسشىلىعىنىڭ تاپسىرماسىنا جانە مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايتىلعان «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس، بارلىق ايماقتاردا «Nur Otan»-نىڭ دەپۋتاتتارى ءار ەلدى مەكەننىڭ پروبلەمالىق ماسەلەلەرىن تالداپ، 2025 جىلعا دەيىنگى اۋماقتىق دامۋدىڭ ايماقتىق باعدارلاماسىنا ۇسىنىستار جاسايدى.

سوڭعى جاڭالىقتار