11 قاراشا, 18:10 631 0 مۋلتيمەديا انار لەپەسوۆا

اباي-175: "استانا" ارناسى ۇلى اقىن مەرەيتويىن اتاپ ءوتۋدى العاشقى بولىپ باستادى

اباي الەمى - اقىلدىڭ كەنى! «استانا» ارناسى وسىنداي ۇرانمەن اباي قۇنانبايۇلىنىڭ 175 جىلدىق مەرەيتويىن اتاپ ءوتۋدى ءبىرىنشى بولىپ باستاپ كەتتى. وسىلايشا، ارنا ۇجىمى ۇلى اقىننىڭ شىعارمالارىن جاس ۇرپاق بويىنا سىڭىرۋگە، قادىر-قاسيەتىن تۇسىندىرۋگە ات سالىسپاق. سەبەبى، ءوزى ولسە دە، ارتىندا ولمەيتۇعىن ءىز قالدىرعان اقىن شىعارماشىلىعى حالىق جۇرەگىنەن ەش وشپەك ەمەس. سوندىقتان "استانا" ارناسى ۇلتتىق پاتريوتيزم يدەياسى اياسىندا ۇلتتىق يدەولوگيانى دارىپتەيتىن ارنا رەتىندە جاڭا جوبالاردى قولعا الادى.

تەلەارنا 11 قاراشادان باستاپ جاڭا فورماتتى ىسكە قوستى. بۇگىننەن باستاپ ارنانىڭ ستيليستيكاسى وزگەردى. مەديا  نارىقتاعى ترەندكە ساي ارنا لوگوتيپى مەيلىنشە قاراپايىم ءارى تارتىمدى ۇلگىگە اۋىستىرىلدى. جاڭا ماۋسىمدا ارناداعى ءار باعدارلامانىڭ روليكتەرى حاكىم ابايدىڭ شىعارماشىلىعىمەن ۇشتاسىپ، كورەرمەن نازارىنا ۇسىنىلادى. ماسەلەن، «ASTANA TIMES»  اتاۋىمەن جاڭا فورماتتا جاڭالىق تاراتاتىن اقپارات قىزمەتىنىڭ جۇمىسى ۇلى اقىننىڭ «سەگىز اياق» ولەڭىمەن استارلاس. قوعامدا بولىپ جاتقانىن ءار وقيعانى ءبىزدىڭ ارنا تىلشىلەرى دەرەك پەن دايەككە سۇيەنىپ جەتكىزەدى. ەندى قازاق جانە ورىس تىلىندەگى جاڭالىقتار شىعارىلىمى شىرايىن تۇرلەندىرىپ، ءبىر ۋاقىتتا شىعادى.

"استانا" ارناسى حالىقتىق ارنا رەتىندە ۇستانىمدارىن وزگەرتەدى. تۇرعىندارمەن كەرى بايلانىس ورناتۋ ماقساتىندا تىكەلەي ەفيردە تۇرعىنداردى تولعاندىرىپ جۇرگەن سۇراقتاردىڭ جاۋابىن ىزدەمەك. كەز-كەلگەن ۋاقىتتا ماسەلەڭىزدى ايتىپ، رەداكتسياعا حابارلاسۋعا مۇمكىندىك بار. ارنا تىلشىلەرى تۇيىتكىلدىڭ ءتۇيىنىن تارقاتۋ ءۇشىن شەنەۋنىكتەرگە تىكەلەي تەلەفون شالادى. بۇدان بولەك، «ءموبيلدى رەپورتەر» ايدارى اشىلادى. قانداي دا ءبىر وقيعانىڭ كۋاگەرى بولساڭىز،  تاسپانى «استانا» ارناسىنىڭ “WhatsApp” نەمەسە الەۋمەتتىك جەلىدەگى پاراقشاسىنا جولداڭىز.

سونداي-اق، جاڭا ماۋسىمدا «ساياسي رينگ» توك-شوۋىنىڭ الاڭى جاڭارىپ، كەلەلى كەلىسسوزدەردىڭ كوكجيەگى كەڭەيەدى. ساراپشىلار قوعامدا قىزۋ تالقىعا تۇسكەن ساياسي، الەۋمەتتىك، ەكونوميكالىق تاقىرىپتاردى تارازىلايدى. «استانا اپتاسى» ءار سەنبى، جەكسەنبىنىڭ كەشىندە اپتانىڭ ايشىقتى وقيعالارىن سارالايدى. سىن مەن شىن «استانا» ارناسىندا.

بۇدان بولەك، كوڭىلدى باعدارلامالاردىڭ كوكجيەگى كەڭەيەدى. ايگىلى ازىلكەش تۇرسىنبەك قاباتوۆ «قىزىق بولعان»  شوۋىنا ونەر ادامدارىن شاقىرىپ، ءازىلدىڭ الەمىنە ساياحات جاسايدى. تەلەارنا الداعى ۋاقىتتا الەۋمەتتىك جاعىنان از قامتىلعان، مۇمكىندىگى شەكتەۋلى جاندارعا قول ۇشىن سوزباق. وسى ماقساتتا 1 ناۋرىز «العىس ايتۋ كۇنىنە» وراي قايىرىمدىلىق كونتسەرتى وتەدى. شارادان تۇسكەن قارجى مۇقتاج جانداردىڭ قاجەتىنە جۇمسالادى.

"جىل تاڭداۋى-2019" ۇلتتىق تەلەۆيزيالىق مۋزىكالىق جۇلدەسىن ەندى "استانا" ارناسى كورسەتەدى. ەلىمىزدىڭ جارقىن جۇلدىزدارىن ءبىر ساحنادا توعىستىراتىن شارا "الماتى ارەنا" سپورت كەشەنىندە 1 جەلتوقسان كۇنى وتەدى. سونىمەن قاتار كورەرمەننىڭ سۇراۋى بويىنشا وتاندىق تەلەحيكايالاردىڭ جاڭا جەلىسىن ۇسىنا وتىرىپ، تالابى بيىك، تالعامى زور كورەرمەن نازارىنا اتى الەمگە ءماشھۇر «WARNER BROS.PICTURES» كينوكومپانياسى مەن كەڭەس كينوسىنىڭ التىن قورىنا ەنگەن كينو تۋىندىلار مەن تۇرىكتىڭ ۇزدىك ۇشتىگىنە ەنگەن تەلەسەريالدار جول تارتادى.

سوڭعى جاڭالىقتار