11 قاراشا, 14:09 336 0 مادەنيەت انار لەپەسوۆا

ارۋجان جازىلبەكوۆا اقش-تا «ەڭ ۇزدىك ايەل ءرولى» اتالىمىندا جەڭىسكە جەتتى

قازاقستاندىق اكتريسا ارۋجان جازىلبەكوۆا اقش-تا وتكەن «Golden screen awards» ماراپاتتاۋ شاراسىندا «ەڭ ۇزدىك ايەل ءرولى» اتالىمىن جەڭىپ الدى. 

قازاقستان مەن قىتاي بىرلەسىپ تۇسىرگەن «كومپوزيتور» ءفيلمى اتالمىش شارادا «ەڭ ۇزدىك كينوسى»، «ەڭ ۇزدىك مۋزىكا»، «ەڭ ۇزدىك ەر ادام ءرولى» جانە «ەڭ ۇزدىك ايەل ءرولى» سىندى 4 نوميناتسيا بويىنشا جەڭىمپاز اتاندى.

«Golden screen awards» شاراسى China Film Co Production كورپوراتسياسى، Hollywood Reporter جانە امەريكا كينو قاۋىمداستىعىنىڭ قولداۋىمەن 2016 جىلدان بەرى وتكىزىلىپ كەلەدى. شارانىڭ باستى ماقساتى - قىتايلىق جانە شەتەلدىك كينو ستۋديانىڭ بىرىگىپ تۇسىرگەن ۇزدىك كينولارىن ماراپاتتاۋ.

ەسكە سالايىق، «كومپوزيتور» ءفيلمىنىڭ تۇساۋ كەسەرى اعىمداعى جىلدىڭ 17 مامىر كۇنى ەلوردادا وتكەن بولاتىن. اتالعان فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى سي سينحايدىڭ ءومىرى مەن ونەر جولىنا ارنالعان.

ەكىنشى دۇنيەجۇزىلىك سوعىس جىلدارىندا (1941-1943 جىلدار ارالىعىندا) كومپوزيتور قازاقستاندا تۇرىپ، قازاقتىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىنداعى ىنتىماقتاستىق پەن كومپوزيتورلاردىڭ دوستىعى تۋرالى سىر شەرتەدى. ءفيلمدى ش.ايمانوۆ اتىنداعى «قازاقفيلم» كينوستۋدياسى جانە قىتايلىق «Shineworks Pictures»، «China film coproduction corporation» كومپانيالارى بىرگە تۇسىرگەن.

 

سوڭعى جاڭالىقتار