10 قاراشا, 17:02 340 0 ساياسات انار لەپەسوۆا

بۇۇ توقاەۆتىڭ كوكجايلاۋ جوباسىن توقتاتۋ تۋرالى شەشىمىن قولدادى

كوكجايلاۋ جوباسىن جۇزەگە اسىرۋعا تىيىم سالۋ جونىندە شەشىم بۇۇ تاراپىنان دا قولداۋ تاپتى. بۇل تۋرالى قر پرەزيدەنتىنىڭ ءباسپاسوز حاتشىسى بەرىك ءۋالي مالىمدەدى. 

«جاقىندا عانا پرەزيدەنت قاسىم-جومارت كەمەلۇلى كوكجايلاۋ جوباسىن جۇزەگە اسىرۋعا تىيىم سالۋ جونىندە شەشىم شىعارعانى ءمالىم. بۇگىندە وسى ماڭىزدى ۇيعارىم ءوز ەلىمىزبەن قاتار الەم قاۋىمداستىعىنىڭ ايرىقشا نازارىن اۋدارتىپ وتىر. بۇل شەشىم بۇۇ تاراپىنان دا قولداۋ تاپتى. مەملەكەت باسشىسىنىڭ اتىنا بۇۇ باس حاتشىسىنىڭ ورىنباسارى، بۇۇ-نىڭ ەۋروپالىق ەكونوميكالىق كوميسسياسىنىڭ اتقارۋشى حاتشىسى ولگا الگاەروۆانىڭ حاتى كەلىپ ءتۇستى»، - دەيدى بەرىك ءۋالي ءوزىنىڭ پاراقشاسىندا.

بۇۇ-نىڭ مارتەبەلى وكىلى كوكجايلاۋ شاتقالىنداعى تاۋ-شاڭعى كۋرورتىنىڭ قۇرىلىسىنا قاتىستى شىعارىلعان شەشىمگە قولداۋ بىلدىرەتىنىن جەتكىزگەن.

«ءسىزدىڭ «بارلىق شەشىمدەردى قابىلداۋ كەزىندە حالىقتىڭ وي-پىكىرىن ەسكەرىپ، قوعامدىق تىڭداۋلار جۇرگىزۋ كەرەك جانە قابىلداناتىن ءىس-شارالاردىڭ ءمان-ماڭىزىن ازاماتتارعا جان-جاقتى ءتۇسىندىرۋ قاجەت» دەگەن ءسوزىڭىز ماعان ەرەكشە اسەر ەتتى.

بۇل تۇجىرىم قازاقستاننىڭ اشىق جانە ءوز ازاماتتارىنىڭ بەلسەندى رولىنە نەگىزدەلگەن شەشىمدەر قابىلداۋ ۇستانىمىن ىلگەرىلەتۋگە بەيىلدىلىگىن كورسەتەد» - دەپ جازادى ولگا الگاەروۆا.

مەملەكەت باسشىسىنىڭ شەشىمى الەم قاۋىمداستىعى تاراپىنان «قوعامنىڭ الاڭداۋشىلىعىن ەسكەرىپ جاسالعان ءتيىمدى ۇيعارىم» رەتىندە عانا ەمەس، ەلىمىزدىڭ ەكولوگيا سالاسىنداعى حالىقارالىق مىندەتتەمەلەردى، سونىڭ ىشىندە ورحۋس كونۆەنتسياسىنىڭ قاعيداتتارىن بەرىك ۇستانۋى رەتىندە قابىلدانعانى وتە ماڭىزدى. اتالعان حالىقارالىق ۇيىم ەلدىڭ دامۋىنا قولداۋ كورسەتۋ ءۇشىن قازاقستانمەن تىعىز جۇمىس ىستەۋگە نيەت تانىتىپ وتىر.

وسى ورايدا، قاسىم-جومارت توقاەۆ قىركۇيەكتە وتكەن بۇۇ باس اسسامبلەياسىنىڭ سەسسياسىندا سويلەگەن سوزىندە قازاقستان ەلىمىزدەگى جانە وڭىردەگى ەكولوگيا ماسەلەلەرىن شەشۋ، جاسىل ەكونوميكانى قالىپتاستىرۋ، تۇراقتى دامۋدى قامتاماسىز ەتۋ باعىتىندا بۇۇ-مەن جانە ونىڭ قۇرىلىمدارىمەن جەمىستى ىنتىماقتاستىقتى نىعايتا بەرەتىنىنە باسا ءمان بەرگەنىن اتاپ كورسەتكىم كەلەدى.

ەسكە سالساق، بۇعان دەيىن مەملەكەت باسشىسى قاسىم-جومارت توقاەۆ كوكجايلاۋ تاۋ-شاڭعى كۋرورتىنا قاتىستى پىكىر بىلدىرگەن بولاتىن.

سوڭعى جاڭالىقتار