9 قاراشا, 11:54 176 0 دەنساۋلىق انار لەپەسوۆا

شىمكەنتتە توپىراق وپىرىلىپ، ەكى ادام قازا بولدى

شىمكەنتتە شۇڭقىردى قازۋ كەزىندە توپىراقتىڭ وپىرىلىپ تۇسۋىنەن ەكى جۇمىسشى قازا بولدى، دەپ حابارلادى ءىىم تجك ءباسپاسوز قىزمەتى. 

قايعىلى وقيعا 8 قاراشا كۇنى قاراتاۋ اۋدانىنداعى نۇرسات-3 شاعىن اۋدانىندا نازارباەۆ داڭعىلىندا بولعان. ساعات 20.54-تە قۇتقارۋشىلاردىڭ پۋلتىنە حابارلاما كەلىپ ءتۇستى.

"يۋگسترويسەرۆيس-ن"  جشس جۇمىسشىلارى شۇڭقىردى قازۋ كەزىندە توپىراق وپىرىلىپ ءتۇستى. توپىراق استىندا 3 تەحنيكا بىرلىگى جانە 3 جۇرگىزۋشى قالىپ قويدى. شۇڭقىردىڭ تەرەڭدىگى 20-25 مەتر، كولەمى -  37ح37 مەتر، - دەپ حابارلادى تجك.

ۇيىندىدەن ءبىرىنشى بولىپ 1993 جىلعى ەر ادامدى الىپ شىقتى. ونىڭ جاعدايى قاناعاتتانارلىق دەپ باعالانىپ وتىر. ال ونىڭ ارىپتەستەرىن امان الىپ قالۋ مۇمكىن بولمادى. 1969 جىلعى ەر ادامنىڭ دەنەسىن ۇيىندىدەن 21.40-تا الىپ شىقسا،  1965 جىلعى ءۇشىنشى جۇمىسشىنى ساعات 22.49-عا  دەيىن ىزدەدى. ىزدەۋ قۇتقارۋ جۇمىستارىنا 5 ساعات كەتتى.

وقيعا ورنىندا شىمكەنت قالاسىنىڭ توتەنشە جاعدايلار دەپارتامەنتىنىڭ 40 قىزمەتكەرى مەن 11 تەحنيكا بىرلىگى جۇمىلدىرىلدى. وپەراتسياعا پوليتسيا دەپارتامەنتتەرى، جەرگىلىكتى اتقارۋشى ورگاندارى، جەدەل جاردەم قىزمەتكەرلەرى جانە جشس جۇمىسشىشارى دا قاتىستى، - دەپ حابارلادى ۆەدومستۆو.

سوڭعى جاڭالىقتار