6 قاراشا, 12:37 296 0 ايماق انار لەپەسوۆا

شىمكەنتتە كوپبالالى انالار نان باعاسىنىڭ قىمباتتاۋىنا نارازىلىق ءبىلدىردى

شىمكەنتتە كوپبالالى انالار نان باعاسىنىڭ قىمباتتاۋىن توقتاتۋدى سۇراپ وتىر. شەنەۋنىكتەر بۇعان دەيىن نان باعاسىن ءبىر قالىپتا ۇستاۋدى ۋادە ەتكەن ەدى. الايدا بۇل مۇمكىن بولمادى ما، ايتەۋىر ءبىر بولكە ناننىڭ باعاسى 60 تەڭگەدەن 80 تەڭگەگە قىمباتتاعان. اسىرەسە، جالعىزباستى انالار باعانىڭ ءوسۋى قيىن تيگەنىن ايتادى. بۇل تۋرالى  31 ارنا حابارلادى.

التى بالاسىن جالعىز ءوزى تاربيەلەپ وتىرعان كاريما قايداربەكوۆا اس اتاسىنىڭ ۇيدەگى نەگىزگى تاماق ەكەنىن ايتادى. سوندىقتان نان باعاسىنىڭ قىمباتتاۋى قالتاعا سالماق تۇسىرەدى دەيدى.

«شايعا ءبىر وتىرعاندا 3-4 تابا نان جەلىنەدى. ءبىر كۇندە 12 نان ساتىپ الامىن. كەيدە ۇن ساتىپ الىپ، ناندى ءوزىم پىسىرەمىن. كەي دۇكەندەردە نان باعاسى 85 تەڭگەگە دەيىن قىمباتتاپ كەتتى»، - دەيدى كوپبالالى انا.

ناۋبايشىلاردىڭ سوزىنشە، ناننىڭ قىمباتتاۋى ۇن باعاسىنىڭ وسۋىنە بايلانىستى. جازدا 50 كەلى ۇندى 5 200 تەڭگەگە ساتىپ السا، قازان ايىندا باعاسى 6 200 تەڭگەگە جەتىپتى.

ءوز كەزەگىندە اكىمدىكتەگىلەر نان باعاسىن ءبىر قالىپتا ۇستاۋ ماسەلەسىمەن اينالىسىپ جاتقاندارىن ايتتى.

«نان باعاسىنىڭ نەگىزسىز ءوسۋىن توقتاتۋ ءۇشىن، قالالىق اكىمدىك جۇمىس توبىن قۇردى. ولار كۇن سايىن ساۋدا نۇكتەلەرىن باقىلايدى. نان باعاسىنىڭ 75 تەڭگەگە جەتكەن كەزدەرى بولدى. مۇنى تومەندەتۋ ءۇشىن، شىمكەنت قالاسىنىڭ اۋىل شارۋاشىلىق باسقارماسى ءبىرىنشى سۇرىپتى ۇندى ساتىپ الۋ جۇمىستارىن جۇرگىزۋدە»، - دەيدى قالالىق اكىمدىكتىڭ كاسىپكەرلىك باسقارماسى باسشىسىنىڭ ورىنباسارى قايرات بازاربەكوۆ.

اكىمدىك ۇن ساتىپ الۋ ءۇشىن 300 ميلليون تەڭگە اقشا بولگەن. نان باعاسى وسپەۋ ءۇشىن، ونى ناۋبايحانالارعا تاراتۋ جوسپارلانۋدا.

سوڭعى جاڭالىقتار