6 قاراشا, 12:24 316 0 ايماق انار لەپەسوۆا

ءولىم جايلاعان اۋىل: سقو-دا تۇرعىندار جۇمباق جاعدايدا كوز جۇمۋدا

سولتۇستىك قازاقستان وبلىسىنىڭ بۇلاق اۋلىندا ادامدار جۇمباق جاعدايدا كوز جۇمۋدا. سوڭعى جىلدا اۋداندا ونداعان ادام قاتەرلى ىسىكتەن كوز جۇمىپتى. ولاردىڭ كەيبىرىنىڭ التىن قازاتىن كاسىپورىنمەن بايلانىسى بولعان، دەپ حابارلايدى  «استانا» ارناسى.

بۇلاق اۋلىنىڭ تۇرعىندارى وڭىردەگى دەرتكە شالدىققانداردىڭ كوبەيۋىنە سول ماڭعا جاقىن ورنالاسقان التىن كەن ورنى سەبەپ ەكەنىن سەنىمدى.

ايتۋىلارىنشا، قاتەرلى دەرتتەن جاستار دا، كەن ورنىنداعى جۇمىسقا دەيىن ساۋ بولعان ادامدار دا كوز جۇمۋدا.

2014 جىلدان بەرى جۇمىس ىستەي باستاعان كەن ورنى رەسەيلىك ينۆەستورلارمەن جۇزەگە اسىرىلۋدا. كەن ورنىندا ءتۇرلى جۇمىستاردى ىستەپ جۇرگەندەردىڭ ىشىندە جەرگىلىكتى تۇرعىندار دا بار. الايدا ولاردىڭ كوبى مۇندا ۇزاق تۇراقتامايدى ەكەن. التىن قازۋ دەنساۋلىقتارىنا جىلدام اسەر ەتەتىن كورىنەدى. جەرگىلىكتى تۇرعىنداردىڭ سوزىنشە، جارتى جىل ىشىندە 7 اۋىلداسى قايتىس بولىپتى.

«كەن ورنى جۇمىسىن باستاپ الدىندا ەكولوگياعا قاتىستى قيىندىقتار بولمايتىنى ايتىلدى. ءار ءۇش اي سايىن ساراپتاما جۇرگىزىلەدى دەدى. ال ەندى مۇندا جۇمىس ىستەگەن ەر ادامدار جاستاي باقيلىق بولۋدا»، - دەيدى اۋىل تۇرعىنى قادىرجان شوپاناەۆ.

ال تىلەكتەس ەسجانوۆ ەسىمدى تۇرعىن اعاسىنىڭ از ۋاقىت ىشىندە كوز جۇمعانىن ايتادى. اعاسى كاسىپورىنعا جۇمىسقا ورنالسپاس بۇرىن دەنى ساۋ بولعان ەكەن. ول ءوزى دە ءبىراز ۋاقىت كەن ورنىندا جۇمىس ىستەگەن. از ۋاقىتتان كەيىن ءوزى دە دەرتتى بولىپتى.

«كەن ورنىندا قالاي جۇمىس ىستەي باستادىم، سولاي قان قىسىمىما قاتىستى قيىندىقتار پايدا بولدى. 160-170-كە دەيىن كوتەرىلىپ كەتەتىن. دارىگەرلەر مەنى ول جەرگە جىبەرمەدى. ءبىز ءوزىمىز كەن ورنىنان سىنامالاردى الىپ كوردىك. ءيىسى وتە وتكىر. اعام دا وسى كەن ورنىندا جۇمىس ىستەپ، كوز جۇمدى»، - دەيدى ەسجانوۆ.

التىن قازاتىن كومپانيا وكىلدەرىن جۇمىس ورنىنان تابۋ مۇمكىن بولمادى. ال اۋداندىق اكىمدىكتەگىلەر كەن ورنىنداعى رادياتسيا رۇقسات ەتىلگەن نورمادان اسپايتىنىن ايتتى. شەنەۋنىكتەردىڭ سوزىنشە، بۇلاق اۋلىنداعى ءولىم-ءجىتىم دەڭگەيى شىنىمەن دە جوعارى. الايدا ول تابيعي قۇبىلىس، دەيدى.

«ونكولوگيالىق دەرت بويىنشا ءوسىم بايقالمايدى. حالىق سانىنىڭ ازايۋى تۇرعىنداردىڭ قارتايۋىنا، بالا تۋ كورسەتكىشىنىڭ تومەندىگىنە بايلانىستى. سونىمەن قاتار كوشىپ كەتىپ جاتقاندار دا بار»، - دەيدى ەسىل اۋدانى اكىمنىڭ ورىنباسارى ەدىل تۇتقىشەۆ.

الايدا وبلىستىق ونكولوگيا بولىمىندەگىلەردىڭ مالىمەتى باسقا. ونداعىلار ەسىل اۋدانىنى دەرت بويىنشا رەيتينگتە كوش باستاپ تۇرعانىن ايتادى. بيىلعى جىلى 10 ايدىڭ ىشىندە 78 ادام دەرتتى بولىپ، 26-سى كوز جۇمىپتى. ال سەبەبىن ەشكىم انىقتاماعان.

سوڭعى جاڭالىقتار