5 قاراشا, 18:31 323 0 دەنساۋلىق انار لەپەسوۆا

قاسىم-جومارت توقاەۆ ارۋجان سايندى قابىلدادى

پرەزيدەنت قاسىم-جومارت توقاەۆ بالا قۇقىقتارى جونىندەگى ۋاكىل ارۋجان سايندى قابىلدادى، دەپ حابارلايدى  اقوردا. 

كەزدەسۋ بارىسىندا بالالاردىڭ دەنساۋلىعىن ساقتاۋ مەن الەۋمەتتىك قورعاۋ، سونداي-اق، كامەلەت جاسىنا تولماعان جاسوسپىرىمدەرگە زورلىق-زومبىلىق كورسەتۋگە قارسى كۇرەس سەكىلدى وزەكتى ماسەلەلەر جان-جاقتى تالقىلاندى.

ارۋجان ساين شالا تۋعان ءارى رەتينوپاتيا اۋرۋىنا شالدىعۋ سالدارىنان زاعيپتىققا ۇشىراعان سابيلەردىڭ پروبلەماسىن كوتەردى. رەسپۋبليكا بويىنشا ورتا ەسەپپەن 20 مىڭعا جۋىق بالا شالا تۋادى. ونىڭ ىشىندە 4 مىڭ بالانىڭ سالماعى جەتىلمەي دۇنيەگە كەلەدى. بالا قۇقىقتارى جونىندەگى ۋاكىلدىڭ ايتۋىنشا، اتالعان ماسەلەنى شەشۋ ءۇشىن وڭىرلەردەگى پەريناتالدى ورتالىقتار مەن پەرزەنتحانالار بازاسىندا ءتيىمدى وفتالمولوگيالىق جاردەم بەرۋ جۇمىسىن ۇيىمداستىرۋ قاجەت، سونىمەن قاتار، جەرگىلىكتى اتقارۋشى ورگاندارمەن ساپالى بايلانىس ورناتىپ، دياگنوستيكالىق قۇرالدارمەن جابدىقتاپ، مەديتسينا قىزمەتكەرلەرىنىڭ بىلىكتىلىگىن ارتتىرۋ كەرەك.

ارۋجان ساين قازاقستاندا اعزانىڭ فۋنكتسيونالدىق مۇمكىندىكتەرى تۇزىلەتىن حالىقارالىق كلاسسيفيكاتسيانى جەدەل ەنگىزۋدىڭ ماڭىزدى ەكەنىن اتاپ ءوتىپ، ونىڭ بتسپ-عا شالدىققان، ەستۋ، كورۋ جانە باسقادا اۋرۋ بەلگىلەرى بار بالالاردىڭ پروبلەمالارىن جۇيەلى شەشۋگە ىقپال ەتەتىنىن ايتتى. قاسىم-جومارت توقاەۆ بالالاردىڭ قۇقىقتارى مەن دەنساۋلىعىن ساقتاۋ ءىسى اسا ماڭىزدى ەكەنىنە توقتالىپ، بۇل ماسەلەنى ءاردايىم ءوزى ءجىتى باقىلاپ وتىراتىنىن اتاپ ءوتتى.

 

سوڭعى جاڭالىقتار