2 قاراشا, 19:32 383 0 زاڭ انار لەپەسوۆا

ءبىر قاپ قارۋ جيناپ، اسا اۋىر قىلمىسقا دايىندالعان الماتى تۇرعىنى ۇستالدى

12 كاليبرلى ەكى شولاق جانە تەگىس ۇڭعىلى مىلتىقتار، كارابين، 15 وق-ءدارى. وسىنشا قارۋ-جاراق ارقالاعان الماتىلىق اسا اۋىر قىلمىسقا دايىندالعان. ءتارتىپ ساقشىلارى زاڭسىز قارۋدى "دۋمان" ىقشام اۋدانىنان، كۇدىكتىنى ءتىنتۋ كەزىندە Audi كولىگىنەن تاپتى. بۇل تۋرالى  "استانا" ارناسى حابارلادى. 

قالالىق پوليتسيا دەپارتامەنتى قارۋ-جاراقتى ساقتاعان 27 جاستاعى كۇدىكتىنى ۋاقىتشا وقشاۋ اباقتىسىنا قامادى.  ونىڭ ارەكەتى قىلمىستىق كودەكستىڭ 287 بابى، 3-بولىگى بويىنشا قاراستىرىلىپ جاتىر. تەرگەۋ جۇمىستارى باستالىپ كەتتى.  كۇدىكتىنىڭ بۇرىن بوپسالاۋ فاكتىسى بويىنشا ءىستى بولعانى انىقتالدى.

"كريمينالدىق پوليتسيا باسقارماسىنىڭ قىزمەتكەرلەرى قارۋ-جاراقتى ءوزىنىڭ ۇيىندە جانە اۆتوكولىگىندە ساقتاعان 92 جىلى تۋعان ت. ەسىمدى ازاماتتى قۇرىقتاعان. بۇل ازامات اسا اۋىر قىلمىسقا بەل بۋىپتى. قاراقشىلىق، شابۋىل، توناۋ ارەكەتتەرىن جاساماقشى بولدى. بىراق قىلمىستىق پيعىلىن جۇزەگە اسىرىپ ۇلگەرگەن جوق. ۇستالدى", — دەيدى الماتى قالاسىنداعى پوليتسيا دەپارتامەنتىنىڭ رەسمي وكىلى سالتانات ازىربەك.

"قورامساق" قارۋ-جاراق قاۋىمداستىعىنىڭ ۆيتسە-پرەزيدەنتى سەرگەي كاتنوۆتىڭ ايتۋىنشا، قازىر پنەۆماتيكالىق قارۋ-جاراقتى ساتىپ الۋ قيىن ەمەس. وسىدان ءبىر اي بۇرىن "اققەنت" شاعىن اۋدانىندا 15 جاستاعى بوزبالا سۋىق قارۋمەن ءبۇتىن ءبىر وتباسىن اسىراۋشىسىنان ايىرعان ەدى. قارۋ-جاراقتى ساتىپ الۋ ءۇشىن قاتاڭ ءتارتىپ ورناتىلۋى قاجەت.

"قىلمىسكەرلەر نەگىزىنەن تاپانشاعا اۋەس كtkلەدى. قازىر پنەۆماتيكالىق قارۋلار ەمىن-ەركىن ساتىلادى.  اسىرەسە عالامتوردا. وسىنى شەكتەۋ كەرەك. قاتاڭ تالاپتار قويىلۋى كەرەك", — دەيدى ۆيتسە-پرەزيدەنت.

كۇدىكتىدەن تاركىلەنگەن قارۋلار سوت-بالليستيكالىق ساراپتاماعا جىبەرىلدى. قارۋلاردىڭ بۇرىن قاندايدا ءبىر قىلمىسقا قاتىسى بار-جوعى انىقتالماق.

سوڭعى جاڭالىقتار