27 ناۋرىز 2015, 09:15 3905 0 ەكونوميكا ەركەجان جۇماتاي

ساۋىردەن باستاپ اۆتونەسيەلەر 6 پايىزبەن بەرىلمەك

بيىل ساۋىردەن باستاپ ەلىمىزدە اۆتوكولىكتى نەسيەلەۋ كەمىندە 10 پايىزعا ارزانداماق. ول ءۇشىن وتاندىق كولىك قۇراستىرۋشىلاردى قولداۋعا ۇكىمەت 20 ميلليارد تەڭگە بولمەك. ونىڭ 15 ميللياردى نەسيەلەۋ سالاسىنا باعىتتالعان، دەپ حابارلايدى ۇلت كز الماتى ارناسىنا سىلتەمە جاساپ. قوماقتى قارجى، الدىمەن، جەكە تۇلعالارعا ارنالعان نەسيەنى تومەن پايىزبەن بەرۋگە باعىتتالادى. پايىزدىق كورسەتكىش 4-6 پايىز دەڭگەيىندە دەپ جوسپارلانعان.

«سولتۇستىگىمىزدەگى كورشى ەلدەگى اۆتوكولىك باعاسى ارزان. سوندىقتان سۇرانىس تا سول جاقتا. ال ۇكىمەتتىڭ وتاندىق كولىك قۇراستىرۋشىلارعا سۋبسيديا ءبولۋى ايتارلىقتاي قولداۋ بولماق. بىراق ەكى ەلدەگى كولىكتىڭ باعاسىندا ءبارىبىر كوپ ايىرماشىلىق بار. تىپتەن باعالار ۇقساس بولدى دەگەنننىڭ وزىنە اۆتوكولىك نەسيەگە الىنعاندىقتان، تۇتىنۋشى ءبارىبىر كوپ اقشا تولەيدى»،- دەيدى قازاقستانداعى تاۋەلسiز اۆتوبيزنەس وداعىنىڭ باسقارما توراعاسى پاۆەل كيم. ەلىمىزدە بىلتىر 37 مىڭ جەڭىل كولىك قۇراستىرىلسا، كوممەرتسيالىق ماقساتتا شىعارىلعان كولىكتەردىڭ سانى 2 جارىم مىڭ.

ەسەسىنە، قينالا قۇراستىرىلعان كولىكتەردى ساتۋ ەكى ەسەگە دەيىن قىسقارىپ كەتكەن. ويتكەنى 3-4 ايدا رەسەيدەن 50 مىڭنان استام كولىك كىرگىزىلگەن. بۇل ءبىزدىڭ ىشكى ونىمنەن 20 پايىزعا جوعارى. ال، ەلىمىزدە ورتاشا كورسەتكىشپەن العاندا ءبىر جەڭىل ماشينانى قۇراستىرۋعا 10 مىڭ دوللار كولەمىندە قارجى جۇمسالادى ەكەن. «تاريفتىك پايىز قازاقستاندا تومەن بولادى دەپ ەسەپتەگەننىڭ وزىندە بىزدەگى باعا رەسەيدەن جوعارى بولادى. تۇتىنۋشى الدىمەن وسىنى ەسەپتەيدى. بىراق رۋبل تۇراقتانا باستاسا، رەسەيدە كولىك قىمباتتاماق. ول جاقتا قازىردىڭ وزىندە باعا تۇراقتانا باستادى»،- دەيدى اۆتوموبيل حولدينگىنىڭ ديرەكتورى ماقسات مەيىرمانوۆ. ارنايى ديللەرلەردىڭ مالىمەتىنشە، وتكەن جىلى 163 مىڭ جەڭىل كولىك يمپورتتالعان. ال وتاندىق ماشينا قۇرىستىرۋشىلاردى قولداۋعا بولىنگەن قارجى بۇل كورسەتكىشتى 110 مىڭعا دەيىن تومەندەتەدى دەپ ەسەپتەيدى.

ءساۋىر ايىنان باستالاتىن جاڭا نەسيەلەۋدە اۆتوموبيلدەردىڭ جىلدىق پايىزى 7 جارىم پايىزدان جوعارى بولماۋى ءتيىس. بىراق رەسەيدەگى ماشينا باعاسى ارزانداعاندا تۇتىنۋشىلارىنان ايىرىلماۋ ءۇشىن ءبىزدىڭ كومپانيالار «نەسيەنى ارزانداتتىق» دەپ بۇعان دەيىن دە جار سالعان ەدى. بىراق ولار ءاۋ باستاعى قىمبات كولىكتىڭ قۇنىن ءسال تۇسىرگەنىمەن، بانك ارقىلى نەسيەلەۋدى 25-30 پايىزعا دەيىن كوتەرىپ، حالىقتىڭ قالتاسىنان سوندىق شىعىن شىققان بولاتىن. ەندى بۇل ماسەلە دە ءوز شەشىمىن تاۋىپ اۆتونەسيلەر ايتارلىقتاي ارزانداماق. قر ۇلتتىق ەكونوميكا ءمينيسترى ەربولات دوساەۆ كەلتىرگەن مالىمەتكە سۇيەنسەك، نەبارى 6 پايىزدىق مولشەرمەن جاڭا كولىك الۋعا مۇمكىندىك تۋماق.

«وتكەن جىلدىڭ سوڭعى 2 ايىندا رەسەي ءرۋبلىنىڭ دەۆالۆاتسياسىنان كەيىن قازاقستانعا رەسەيدەن 50 مىڭعا جۋىق كولىك الىپ كەلىندى. مەملەكەت باسشىسى ۇكىمەت وتىرىسىندا مۇنى قۇپتاسا دا، ول كولىكتەر ەۋرو-2, ەۋرو-5 ستاندارتتارعا سəيكەستەندىرىلىپ، تەحنيكالىق رەگلامەنتپەن ءوتۋى كەرەك دەدى. پرەزيدەنتتىڭ تاپسىرماسىمەن ۇلتتىق قوردان ءبولىنىپ جاتقان 5 ملرد تەڭگە لابوراتوريالىق بازانى وڭدەۋگە ءبولىنىپ وتىر. سونىمەن قاتار، الدىندا ايتقانىمداي، ءوزىمىزدىڭ كولىك شىعاراتىن ەكى زاۋىتىمىزعا 20 ملرد تەڭگە ءبولىنىپ جاتىر.

بۇل قاراجات بىرىنشىدەن ەكىنشى دەڭگەيلى بانكتەر ارقىلى 6 پايىزدىق مولشەرمەن جاڭا اۆتونەسيەلەر بەرەمىز جانە ليزينگپەن الاتىندارعا نەسيە 4 پايىزبەن بەرىلەتىن بولادى»،- دەدى دوساەۆ. ءسويتىپ، تەمىر تۇلپار تىزگىندەۋگە نيەتتى قاۋىمنىڭ قاراسى قالىنداماق. ۇزىنقۇلاقتار ەۋرازيالىق وداققا قىرعىزستان كىرگەن جاعدايدا، اۆتوكولىكتىڭ باعاسى تىپتەن ايزاندايدى دەپ جورامالداپ وتىر. قالاي بولعان كۇندە دە، الداعى ماۋسىمدا ءبىرشاما قازاقستاندىق تەمىر تۇلپاردىڭ يەسى اتانۋى بەكمۇمكىن.

سوڭعى جاڭالىقتار