29 قازان, 15:41 444 0 ايماق انار لەپەسوۆا

باقىتجان ساعىنتاەۆ پرەزيدەنتكە ءوتىنىش جاسادى

قر پرەزيدەنتى قاتىسقان جيىندا الماتىداعى جول-كولىك ينفراقۇرىلىمىن دامىتۋ تۋرالى بايانداعان باقىتجان ساعىنتاەۆ قاسىم-جومارت توقاەۆتان 124 جەر ۋچاسكەسىن ساتىپ الۋعا 9,4 ملرد تەڭگە بولۋگە تاپسىرما بەرۋدى ءوتىندى.

«قازىرگى ۋاقىتتا ۇكىمەتتىڭ قولداۋىنىڭ ارقاسىندا قالادا 3 جول ايرىعىنىڭ قۇرىلىسى جالعاسۋدا (سەيفۋللين داڭعىلى - جانسۇگىروۆا كوشەسى، رىسقۇلوۆ داڭعىلى - ەمتسوۆا كوشەسى، بۇقتىرما كوشەسى – قۇلجا تاس جولى) جانە 3 كوشەنى ۇزارتۋ جۇمىستارى ءجۇرىپ جاتىر. بىزگە 2020 جىلعا ارنالعان رەسپۋبليكالىق بيۋدجەتتەن 28,6 ملرد تەڭگە قاجەت. ۇكىمەت 2020 جىلعا جول ايىرىعىنىڭ قۇرىلىسى مەن كوشەنى ۇزارتۋ جۇمىستارىنا 17,2 ملرد تەڭگە ءبولىپ وتىر. سونىمەن قاتار، جول تۇسەتىن جەر ۋچاسكەسىن ساتىپ الۋ ماسەلەلەرىن الدىن-الا شەشۋگە ءتيىسپىز. وسىعان بايلانىستى، سىزدەن قارجى مينيسترلىگىنە 2020-2021 جىلدارعا ارنالعان بيۋدجەتتىك تسيكلدى ناقتىلاۋ كەزىندە 124 جەر ۋچاسكەسىن ساتىپ الۋعا 9,4 ملرد تەڭگە ءبولۋىن تاپسىرۋدى سۇرايمىن»،- دەدى الماتى اكىمى باقىتجان ساعىنتاەۆ.

ونىڭ ايتۋىنشا، ەگەر 2021 جىلعا دەيىن قالاداعى ءتيىستى جەردى ساتىپ الىنباسا، وندا كوشەلەردەگى قۇرىلىس جۇمىستارى تاعى دا توقتاپ قالۋى مۇمكىن.

ءوز كەزەگىندە، قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ بيىل جول-كولىك ينفراقۇرىلىمىن دامىتۋعا 24 ميلليارد تەڭگە قاراستىرلعانىن ، ونىڭ 11 ميللياردى جولداردى قالپىنا كەلتىرۋگە بولىنگەنىن اتاپ ءوتتى. ءمينيستردىڭ ايتۋىنشا، الماتىدا مەترو ستانساسىنىڭ قۇرىلىسى جالعاسۋدا، جولاۋشىلار كولىگى جاڭارتىلىپ جاتىر. حالىقارالىق اۆياتسيالىق حابتى دامىتۋ جوسپاردا. جول جەلىسىنىڭ ۇزىندىعى - 3023 شاقىرىمدى قۇرايدى. ونىڭ 75% -ى جاقسى جانە قاناعاتتانارلىق جاعدايدا.

 

سوڭعى جاڭالىقتار