29 قازان 2019, 12:09 827 0 رۋحانيات انار لەپەسوۆا

ەل دامۋىنا ۇلەس قوسقان قازاقستاندىق ەتنوس وكىلدەرى جايلى ەلەكتروندى دەرەكقور جاسالماق

قازاقستاندا ەلدىڭ تۇعىرىن بيىكتەتىپ، ابىرويىن اسقاقتاتىپ جۇرگەن وزگە ۇلت وكىلدەرى كوپ. ولاردىڭ قىزمەتى مەن ەڭبەگىنە ءتيىستى باعا بەرۋ، جالپىحالىقتىق نازاردا ۇستاۋ ارەكەتىن قولعا العان «رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق-سى بۇگىندە ەلىمىزدىڭ ءتورت بۇرىشىن ارالاپ، ۇلكەن ءىس تىندىرۋ ۇستىندە. ينستيتۋت وكىلدەرى ەلىمىزدىڭ باتىسى مەن شىعىسىندا بولىپ، جاقىندا تەرىسكەيدەگى وڭىرگە ات باسىن تىرەدى. وتكەن جۇما كۇنى ينستيتۋت توراعاسىنىڭ ورىنباسارى روزا كارىبجانوۆا باستاعان توپ م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «قازاقستان ەتنوستارى: ەلىمىزدىڭ تاريحي-مادەني دامۋىنا قوسقان ۇلەستەرى» تاقىرىبىندا سۇحبات الاڭىن ۇيىمداستىردى. شاراعا نۇر-سۇلتان قالاسى مەن قاراعاندى، اقمولا، قوستاناي وڭىرلەرىنەن ارنايى وكىلدەر شاقىرىلدى.

قولعا الىنىپ وتىرىلعان شارانىڭ توقەتەرى – XIX-XXI عاسىرلاردا ەلىمىزدىڭ دامۋىنا ۇلەس قوسقان قازاقستاندىق ەتنوستاردىڭ ەڭ كورنەكتى وكىلدەرىنىڭ ءومىرى مەن قىزمەتى تۋرالى اقپاراتتى ەلەكتروندىق دەرەكقور قۇرۋ. بۇل جوبانىڭ قيىندىعى جۇزدەگەن ادامداردىڭ ىشىنەن ەڭ تۇلعالىسىن تاڭداپ الۋدا بولىپ وتىر. سوندىقتان ەلەكتروندىق دەرەكقورعا ەنگىزىلەتىن ازاماتتاردىڭ قىزمەتى مەن ەڭبەگىن تەرەڭ زەرتتەپ، بەلگىلى ءبىر تالاپتارعا ساي كەلۋىن قاداعالاپ، ۇلكەن جۇمىس جۇرگىزۋ مىندەتتەلەدى. 

«رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق باس ساراپتاماشى-مەنەدجەرى رۋزيا كاماروۆا ينستيتۋت ءار وڭىرمەن حابارلاسىپ، لايىقتى تۇلعالاردىڭ ءتىزىمىن جيناستىرىپ جاتقاندىعىن جەتكىزدى. بۇگىندە تىزىمگە 213 ازاماتتىڭ ەسىمى ۇسىنىلعان. بۇل ساننىڭ ءالى دە ەسەلەنە تۇسەتىنىنە كۇمان جوق. زەرتتەۋشىلەردىڭ ايتۋىنشا، ەلەكتروندىق دەرەكقورعا ەڭ كورنەكتى وكىلدەر ەنگىزىلۋى ءتيىس. ول ءۇشىن تاڭدالاتىن تۇلعالاردىڭ سىڭىرگەن ەڭبەگىنە قويىلاتىن كريتەريلەر ناقتىلانا ءتۇسۋى كەرەك. پەتروپاۆل قالاسىندا وتكەن سۇحبات الاڭىنا جينالعاندار قازاقستاننىڭ سولتۇستىك جانە ورتالىق ايماقتارىنداعى تانىمال وتانداستاردىڭ ءومىرى مەن قىزمەتىن زەرتتەۋ بويىنشا پىكىر ءبىلدىرىپ، تاجىريبە الماستى. سونداي-اق، زەرتتەۋ جۇمىستارىن وڭتايلى جۇرگىزۋ ءۇشىن پراكتيكالىق ۇسىنىستار جاسالدى.

«قازاقستان ەتنوستارى: ەلىمىزدىڭ تاريحي-مادەني دامۋىنا قوسقان ۇلەستەرى» اتتى سۇحبات الاڭى قازاقستاندىق زيالىلار تىزىمىندە ويىپ الار ورنى بار ءىرى تۇلعا گ.بەلگەردىڭ 85 جىلدىعىنا ارنالعان رەسپۋبليكالىق عىلىمي-پراكتيكالىق كونفەرەنتسيامەن جالعاستى.

سوڭعى جاڭالىقتار