28 قازان, 12:28 426 0 تەحنولوگيالار انار لەپەسوۆا

قازاقستان 5G جەلىسىمەن قاشان تولىق قامتىلادى؟

2023 جىلدان باستاپ 5G جەلىسى قازاقستاننىڭ بارلىق وبلىس ورتالىعىندا ىسكە قوسىلادى. بۇل تۋرالى بۇگىن ماجىلىستەگى ۇكىمەت ساعاتىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ايتتى. 

"5G تەحنولوگياسىن ەنگىزۋ ءۇشىن تارتىلاتىن ينۆەستيتسيا كولەمى ۇلكەن بولعاندىقتان، ءبىرىنشى كەزەڭدە بۇل تەحنولوگيانى نۇر-سۇلتان، الماتى جانە شىمكەنت قالالارىندا ەنگىزۋ جوسپارلانىپ وتىر", - دەدى مينيستر.

ايتۋىنشا، 2021 جىلدىڭ سوڭىنا دەيىن ەلورداداعى نازارباەۆ ۋنيۆەرسيتەتى مەن "ەكسپو" كەشەنىندە، ال 2022 جىلى اۋەجاي مەن ۆوكزالدا، ساۋدا ورىندارى مەن الاڭداردا 5G تەحنولوگياسى ىسكە قوسىلماق.

"ودان ءارى 2023 جىلدان باستاپ بارلىق وبلىس ورتالىعىندا ەنگىزۋ جۇمىستارى جۇرگىزىلەدى", - دەدى جۇماعاليەۆ.

ول اۋىلداردا كەڭ جولاقتى ينتەرنەتپەن قامتۋ ءۇشىن 2018-2022 جىلدارى تالشىقتى-وپتيكالىق جانە LTE (4G) جەلىلەرىن سالۋ كوزدەلىپ وتىرعانىن اتاپ ءوتتى.

"2020 جىلدىڭ اياعىنا دەيىن حالىق سانى 250-دەن اساتىن 880 اۋىل كەڭ جولاقتى ينتەرنەتكە قوسىلادى. سونىمەن قاتار تۇرعىندار سانى 50-دەن كوپ 885 اۋىلدى ينتەرنەت جەلىسىنە قوسۋ جوسپارلانۋدا. ناتيجەسىندە 2022 جىلدىڭ سوڭىنا دەيىن 5089 اۋىلدىق ەلدى مەكەنگە ينتەرنەت تارتىلادى", - دەدى مينيستر.

اۋىلداردى ينتەرنەتكە قوسۋ ۇلتتىق ەكونوميكا مينيسترلىگى ازىرلەگەن پەرسپەكتيۆتى اۋىلدار تىزىمىنە سايكەس ورىندالادى.

جۇماعاليەۆتىڭ اقپاراتىنشا، قولعا الىنعان جوبالاردى ىسكە اسىرۋ ناتيجەسىندە 2022 جىلدىڭ سوڭىنا دەيىن قازاقستان حالقىنىڭ 97%-ءى كەڭ جولاقتى ينتەرنەتكە قوسىلادى. قالعان 3%-ءى سپۋتنيكتىك تەحنولوگيانى قولدانۋ ارقىلى ينتەرنەتپەن قامتىلادى.

قازىر رەسپۋبليكادا 117 قالا مەن 3 324 اۋىلدا كەڭ جولاقتى ينتەرنەت قولجەتىمدى. ول ءار ءتۇرلى تەحنولوگيالارمەن قامتاماسىز ەتىلگەن، سولاردىڭ ىشىندە تالشىقتى-وپتيكالىق جەلى، 3G جانە 4G جەلىلەرى.

بىلتىر قازاقستاندا ينتەرنەت پايدالانۋشىلار سانى 81,3%-كە جەتتى.

 

سوڭعى جاڭالىقتار