27 قازان, 19:15 493 0 تەحنولوگيالار انار لەپەسوۆا

قازاقستاندا كيبەرشابۋىلعا ءجيى ۇشىرايتىن سالالار اتالدى

قازاقستاندا قاي سالالار كيبەرشابۋىلعا ءجيى ۇشىرايدى؟ بۇل سۇراققا «كيبەرشابۋىلدى تالداۋ جانە تەرگەۋ ورتالىعىنىڭ» پرەزيدەنتى ولجاس ساتيەۆ جاۋاپ بەردى، دەپ حابارلايدى قازاقپارات.

ونىڭ سوزىنشە، ورتالىق اي سايىن ۇرلانعان مالىمەتتەر تۋرالى اقپارات جاريالاپ وتىرادى. «مىسالى بىرنەشە جىل بۇرىن قورعانىس، سىرتقى ىستەر مينيسترلىكتەرىنىڭ جانە استانا اۋەجايىنىڭ سايتى بۇزىلدى. ونداي جاعدايلار بولىپ تۇرادى. ءبىر نارسەنى ەسكەرۋ كەرەك – حاكەرلەر «الىنبايتىن قامال جوق، بۇزىلمايتىن جۇيە جوق» دەگەن ۇستانىمدى ۇستانادى. شىن مانىندە حاكەرلەر ءتىپتى پەنتاگوندى دا بۇزا الادى. بۇزاتىن ادام ارقاشان تابىلادى. بىراق ماسەلە مىنادا. بىزدە ۋاقىتىندا ءىس-ارەكەتكە كوشۋدىڭ بەلگىلەنگەن رەگلامەنتى جوق. مىسالى مەملەكەتتىك سايت بۇزىلىپ، ەكى-ءۇش اپتا بويى قولدانۋشىلارعا ۆيرۋس جۇقتىرعان كەزى بولدى. بىراق ول ءۇشىن ەشكىم جاۋاپقا تارتىلعان جوق»، – دەدى ولجاس ساتيەۆ ەلوردادا وتكەن Digital Bridge فورۋمىندا.

سپيكەر حاكەرلەرگە جۇيەنى بۇزىپ، جەكە مالىمەتتەردى ۇرلاۋ نە ءۇشىن قاجەت ەكەنىن ءتۇسىندىرىپ ءوتتى. «بىرقاتار فاكتورلار بار. ونىڭ ءبىرى – الاياقتىق. مىسالى، حاكەر جەكە مالىمەتتەردى، مەكەنجاي-تەلەفونىڭىزدى، بانك مالىمەتتەرىن ۇرلاپ، بانك قىزمەتكەرى رەتىندە سىزگە حابارلاسۋى مۇمكىن. ءسويتىپ ءسىزدى الداپ، اقشاڭىزدى جىمقىرادى. حاكەرلەر ادامعا اسەر ەتۋ ءۇشىن بيگ-داتانى جيناقتايدى. ادام تۋرالى بۇكىل اقپاراتتى جيناپ العان سوڭ ول ونىڭ ءپروفيلىن قالىپتاستىرۋى مۇمكىن. ءبىر سوزبەن ايتقاندا، قازىر اۋقىمدى مالىمەتتەر زامانى جانە ول مالىمەتتەردىڭ نارىقتا ءوز باعاسى بار»، – دەيدى ورتالىق باسشىسى.

ونىڭ سوزىنشە، قازاقستاندا حاكەرلەر شابۋىلى جيىلەپ كەتكەن. «ويتكەنى بىزدە تسيفرلاندىرۋ زور قارقىنمەن ءجۇرىپ جاتىر. ادامدار ەلەكتروندى كوممەرتسيانى كوپ قولداناتىن بولدى، بارلىعى ونلاين-الاڭدا كارتامەن اقشا تولەيدى. بۇل شەتەلدىك حاكەرلەردى ەلەڭ ەتكىزدى. ونىڭ ۇستىنە قازاقستاندا كيبەرگيگيەنا ونشا دامىماعان. تاياۋدا ءبىز HomeBank-كە جاسالعان شابۋىلدى زەرتتەدىك. ءبىزدىڭ ماماندار بانكتىڭ حاكەرلىك جۇيەگە كىرۋىنە كومەكتەستى. ءدال وسى جاعدايدا حاكەرلەر 1000 ادامنىڭ ينتەرنەت-بانكينگىن بۇزىپ كىرگەن. ءبىز بازانى تازالاپ، بانككە ەسكەرتىپ قويدىق. ايتا كەتەيىن، بۇل شابۋىلدى جاساعان تۇرىك حاكەرلەرى. بۇگىندە حاكەرلىك توپتاردىڭ قازاقستانعا قىزىعۋشىلىعى ارتىپ كەلەدى، ويتكەنى بىزدە تسيفرلىق اقشا بەلسەندى قولدانىلادى، ارينە بۇل ولاردىڭ نازارىن اۋدارماي قويمايدى»، – دەپ اتاپ ءوتتى ولجاس ساتيەۆ.

ول سونداي-اق قازاقستاندا قاي سالالارعا حاكەرلىك شابۋىل ءجيى جاسالاتىنىن ءسوز ەتتى. «مەديتسينا سالاسى وتە سەزىمتال، سەبەبى بۇل سالادا دا اقپاراتتىق تەحنولوگيالار بەلسەندى ەنگىزىلىپ جاتىر. حاكەرلەردىڭ ادام دەنساۋلىعى تۋرالى مالىمەتتەردى ۇرلاعان كەزى بولعان. بىراق ونىڭ ءبارى پاتسيەنت قۇپياسى رەتىندە قورعالۋى كەرەك. قارجى جۇيەسى دە شابۋىلعا كوپ ۇشىرايدى. جەكە قارجى سەكتورىن ءجيى بۇزىپ تۇرادى. مىسالى، بىرنەشە جىل بۇرىن حاكەرلەر قازاقستان بۋحگالتەرلەرىنىڭ فورۋمىنا بۇزىپ كىرگەن ەدى. بۇل – حاكەرلەر ءۇشىن ۇلكەن ولجا، سەبەبى بۋحگالتەرلەر كومپانيا قارجىسىن ءوز قولىندا ۇستايدى. سوندىقتان جاۋاپكەرشىلىكتى قاتاڭداتۋ كەرەك»، – دەپ تۇيىندەدى ولجاس ساتيەۆ.

سوڭعى جاڭالىقتار