22 قازان, 10:09 374 0 الەۋمەت انار لەپەسوۆا

ەلوردادا جۇمىسسىزدار 18 ماماندىق بويىنشا وقىتىلادى

جۇمىسپەن قامتۋ ورتالىعى قىسقا ۋاقىت ىشىندە ەلورداداعى جۇمىسسىز ازاماتتاردى نارىقتاعى قاجەتتى ماماندىقتارعا وقىتۋ كۋرستارىن ۇيىمداستىرادى، دەپ حابارلايدى  ەلوردا اكىمدىگىنىڭ رەسمي سايتى.

بۇل شارا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا جۇزەگە اسادى. وقۋ كۋرستارى 18 ماماندىق بويىنشا قالاداعى 11 وقۋ ورنىندا وتەدى. بيىلعى جوسپارعا سايكەس، 913 ازاماتتى وقىتۋ كوزدەلۋدە. وسى ۋاقىتقا دەيىن ولاردىڭ 742-ءى قامتىلىپ، ونىڭ 346-سى وقۋىن اياقتاپ، 129-ى جۇمىسقا ورنالاسقان.

جوسپارعا ەنگىزىلگەن تۇزەتۋگە سايكەس، ەڭبەك جانە حالىقتى الەۋمەتتىك قورعاۋ مينيسترلىگى وقىتۋ كۋرسىنا تاعى 450 ادامدى قوسۋ كوزدەلىپ وتىر. بۇل تۇرعىدا ۆەدومستۆوارالىق كوميسسيانىڭ شەشىمىنە سايكەس، باعدارلاما قاتىسۋشىلارىنا 220 ادام ەنگىزىلدى. ولار ەندى 21-22 قازاندا وقۋعا كىرىسەدى. سونداي-اق نۇر-سۇلتان قالاسى كاسىپكەرلەر پالاتاسىنىڭ مالىمەتىنە سايكەس، «اتامەكەن قولداۋ ورتالىعى» ءموبيلدى جۇمىسپەن قامتۋ ورتالىقتارىندا 1400 ازامات كەڭەس الىپ، ولاردىڭ 350-ءى جۇمىسپەن قامتۋ ورتالىعىنا جۇگىنگەن.

ايتا كەتەيىك، «اتامەكەن قولداۋ ورتالىعى» ءموبيلدى جۇمىسپەن قامتۋ ورتالىقتارى ادام كوپ جينالاتىن جەرلەردە، بازارلار مەن ۆوكزالدار جانىندا، قوزعالىسى كوپ كوشەلەردە، حالىق كوپ شوعىرلانعان اۋدانداردا ورنالاسقان. ءموبيلدى جۇمىسپەن قامتۋ ورتالىقتارى ازاماتتاردىڭ ءوتىنىش بەرۋ مۇمكىندىگىن جەڭىلدەتۋگە جانە جۇمىسقا ورنالاسقان ادامداردىڭ سانىن ارتتىرۋعا مۇمكىندىك بەردى.

بۇگىنگى كۇنى ەلوردادا 8 ءموبيلدى جۇمىسپەن قامتۋ ورتالىعى جۇمىس ىستەيدى. ولار: تەمىرجول ۆوكزالىنىڭ جانىندا; «تۇلپار» ساۋدا ورتالىعى; «ۆسترەچا» ساۋدا ورتالىعى; «ساپار» بازارى; «ۇلجان» بازارى; «ەتالون» قۇرىلىس بازارى; پرومىشلەننىي كەنتى; «ازيا پارك» سوو جانىندا ورنالاسقان.

سوڭعى جاڭالىقتار