19 قازان, 15:52 402 0 الەۋمەت انار لەپەسوۆا

باستاۋىش سىنىپ وقۋشىلارى تەگىن ىستىق تاماقپەن تولىق قامتىلادى

پاۆلودار وبلىسىندا باستاۋىش سىنىپ وقۋشىلارى تەگىن ىستىق تاماقپەن تولىق قامتىلماق. وعان بيۋدجەتتەن قارجى قاراستىرىلىپ، دەمەۋشىلەر مەن ينۆەستورلار تارتىلادى. بۇل تۋرالى پاۆلودار وبلىسىنىڭ اكىمى بولات باقاۋوۆ مەكتەپتەردىڭ قامقورشىلىق كەڭەس مۇشەلەرىمەن بولعان كەزدەسۋدە مالىمدەدى.

وبلىس اكىمى اتالعان كەزدەسۋ قارساڭىندا Instagram-داعى پاراقشاسىنا جازبا قالدىرىپ، جەرگىلىكتى تۇرعىنداردان مەكتەپتەرگە قاتىستى وزەكتى ماسەلەلەردى بۇكپەسىز ايتۋدى سۇراعان ەدى. بولات باقاۋوۆ قامقورشىلىق كەڭەستەرىمەن وتكىزىلگەن كەزدەسۋدى دە ءوز اتىنا كەلىپ تۇسكەن شاعىمدار مەن ۇسىنىستاردان باستادى.

«ماعان بۇگىنگى جيىننىڭ وتكىزىلۋ ءتارتىبى بەرىلگەن ەكەن. وندا ءبىلىم باسقارماسىنىڭ بايانداماسى، ءتىپتى ماعان قويىلاتىن سۇراقتار دا جازىلعان. بىراق، مەن اتالعان ءتارتىپتى ۇستانعىم كەلىپ تۇرعان جوق. سوندىقتان، Instagram-داعى جازبامنىڭ استىنا قالدىرىلعان كوممەنتاريلەردەن باستاعىم كەلەدى. ماعان 350-دەن استام كوممەنتاري كەلىپ ءتۇستى. ونىڭ باسىم بولىگى شاعىمدار مەن ۇسىنىستار. شاعىمدار مەن ۇسىنىستار نەگىزىنەن پارتالاردى جاڭارتۋ، كابينەتتەردىڭ تەرەزەلەرىن اۋىستىرۋ، جۇمىس ىستەمەي تۇرعان مەكتەپ باسسەيندەرىن قالپىنا كەلتىرۋ جانە وقۋ ورىندارىنىڭ جالپى اباتتاندىرۋ سەكىلدى وزەكتى ماسەلەلەردى قامتيدى»، – دەدى بولات باقاۋوۆ.

كوپتەگەن اتا-انا مەكتەپتەگى تاماق ساپاسىنا قاتىستى ماسەلە كوتەرىپتى.

تاماق ساپاسىنا قاتىستى ماسەلە قامقورشىلىق كەڭەستەرىمەن بىرلەسىپ شەشىلەتىن بولدى. اكىم جاقىن ۋاقىتتا وبلىس بويىنشا 1-4 سىنىپ وقۋشىلارىن تەگىن ىستىق تاماقپەن قامتاماسىز ەتۋگە ۋادە بەردى. سونداي-اق ول اتا-انالار قاۋىمداستىعىنان تاماقتىڭ ساپاسىن قاداعالاپ وتىرۋدى سۇرادى. سالماقتىڭ ءبارىن بيۋدجەتكە ارتپاي، جەرگىلىكتى جەرلەردەگى ينۆەستورلار مەن مەتسەناتتار دا بۇل ىسكە اتسالىسپاق.

سونىمەن قاتار، اكىم مەكتەپتەردىڭ ماڭىنداعى زاڭسىز تۇراقتار ماسەلەسىن شەشۋدى قولعا الاتىنىن ايتتى. ماسەلەن، پاۆلودار قالاسىنداعى №19 ورتا مەكتەپتىڭ ماڭىنان كولىكتەر ارىلمايدى. مەكتەپ تۇراعىندا كولىكتەر قاپتاپ تۇرادى. ويتكەنى، وقۋ ورنىنىڭ جاڭىندا حالىققا قىزمەت كورسەتۋ ورتالىعى ورنالاسقان.

«پوليتسيا قىزمەتكەرلەرىنەن وبلىسقا قاراستى ءۇش قالاداعى بارلىق مەكتەپتىڭ اۆتوتۇراقتارىن رەتكە كەلتىرۋدى سۇرايمىن. ولار بۇل جۇمىستى تۋرا ەرتەڭ باستايدى»، – دەدى ايماق باسشىسى.

كوپشىلىكتى تولعاندىرعان تاعى ءبىر ماسەلە – 15 جاستاعى مەكتەپ وقۋشىلارىنىڭ قوعامدىق كولىكتەردە جەڭىلدىكپەن ءجۇرۋى. وڭىردە پارادوكسالدى جاعداي قالىپتاسىپ وتىر.

كوللەدجدەردىڭ ءبىرىنشى-ەكىنشى كۋرس ستۋدەنتتەرى اۆتوبۋستار مەن ترامۆايلاردا جول اقىسىن 50 پايىزدىق جەڭىلدىكپەن تولەيدى. ال ءدال سولاردىڭ قۇرداستارى، ياعني مەكتەپتىڭ جوعارى سىنىپ وقۋشىلارىنا مۇنداي جەڭىلدىك قاراستىرىلماعان.

«ستۋدەنتتەرگە جەڭىلدىك قاراستىرۋ تۋرالى شەشىم قابىلداعان كەزدە مەكتەپتەردىڭ جوعارى سىنىپ وقۋشىلارى قاپەرگە الىنباعان. بۇل ماسەلەنى مىندەتتى تۇردە قاراستىراتىن بولامىز»، – دەدى بولات باقاۋوۆ.

اكىم قامقورشىلىق كەڭەستەرىن تىڭعىلىقتى جۇمىس ىستەۋگە شاقىردى. سونداي-اق ول كەڭەستەر مەكتەپتەردىڭ باستى باقىلاۋشىسى ءارى كومەكشىسى ەكەنىن ەسكەرتتى. اتا-انالار مۇنداي كەزدەسۋلەردى ءجيى وتكىزىپ تۇرۋدى سۇرادى. بولات باقاۋوۆ كەلىسىم بەردى.

سوڭعى جاڭالىقتار