18 قازان, 18:56 466 0 مادەنيەت انار لەپەسوۆا

م.اۋەزوۆ تەاترى جاڭا ماۋسىمىن اشتى

مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى 94-ءشى  ماۋسىمىن اشىپ، كورەرمەنمەن قايتا قاۋىشتى. 

جاڭا ماۋسىمنىڭ باستى جاڭالىعى – قازاقستاننىڭ ەڭبەك سىڭىرگەن قايراتكەرى، «الاش» حالىقارالىق ادەبي سىيلىعىنىڭ لاۋرەاتى ءاليا بوپەجانوۆانىڭ اۋدارماسىنداعى، گريگوري ۆ.تومسكيدىڭ «اتتيلا مەن اەتسي» قويىلىمى كورەرمەنگە جول تارتتى. جاڭا سپەكتاكل قازاقستاننىڭ ەڭبەك سىڭىرگەن قايراتكەرى الما ارعىننىڭ رەجيسسەرلىعىمەن قويىلدى.

94-ماۋسىمنىڭ رەسمي اشىلۋى الدىندا تەاتر باسشىلىعى مەن ۇجىمى ءباسپاسوز كونفەرەنتسياسىن وتكىزىپ، جۋرناليستەرگە جاڭا ماۋسىمعا جاسالعان جوسپارلارى، جاڭالىقتار مەن وزگەرىستەر جايلى اقپارات بەردى.

تەاتر ديرەكتورى ءسابيت ءابدىمۇتالىۇلى «اتتيلا مەن اەتسي» سپەكتاكلى يتاليادا وتەتىن فەستيۆالگە قاتىسۋعا جولداما العاندىعىن جەتكىزدى.

ايتا كەتەيىك، اتتيلا – ەدىل قاعان، باتىس عۇندار مەن ەۋروپالىق كوپتەگەن تايپالاردىڭ باسىن بىرىكتىرىپ، ۇلكەن قاعانات قۇرعان (ب.ز. 434-453 جج.), الەمدىك تاريحتا ەرەكشە ورنى بار تۇلعا. بەلگىلى اتتيلاتانۋشى، فرانتسۋز جازۋشىسى ب. تيۋرگەننىڭ تاريحي دراماسىن ساحنالاپ وتىرعان تەاتر ينتەرپرەتاتسياسىندا اتتيلا باسقىنشى ەمەس، كەرىسىنشە، ەۋروپادا قۇل يەلەنۋشىلىك قۇرىلىستىڭ شايقالۋىنا اسەر ەتكەن، ونداعى حالىقتارعا ازاتتىق اپەرگەن ۇلى قولباسشى، عۇن-ريم يمپەرياسىن قۇرۋدى ارمانداعان كورنەكتى مەملەكەت قايراتكەرى، ءدىني سەنىمدەردى قادىرلەيتىن ديپلومات بەينەسىندە كورىندى. مۇنىڭ ءتۇپ تامىرىندا ونىڭ اتا-بابا وسيەتىنە ادالدىعى، ومىرلىك جانە بيلىك قاعيدالارىنا بەرىكتىگى جاتىر. بۇگىنگى كۇنمەن ۇندەسەتىن، تاڭبالىق ماعىنالارى مول قويىلىمدا اتتيلانىڭ سۇيىكتى جارى كەرە-كوعا ماحابباتى، ريمدىك اتاقتى گەنەرال اەتسيمەن دوستىعى دا كوركەم كورىنىس تاپقان.

ءباسپاسوز كونفەرەنتسياسىنان كەيىن تەاتر ۇجىمى حالقىمىزدىڭ ۇلى پەرزەنتى – مۇحتار اۋەزوۆتىڭ ەسكەرتكىشىنە گۇل قويىپ، رۋحىنا تاعزىم ەتتى.

سوڭعى جاڭالىقتار