15 قازان, 15:07 300 0 سىرتقى ساياسات انار لەپەسوۆا

ەلباسى باكۋدە يلحام اليەۆپەن كەزدەستى

قازاقستاننىڭ تۇڭعىش پرەزيدەنتى نۇرسۇلتان نازارباەۆ باكۋدە ازەربايجان پرەزيدەنتى يلحام اليەۆپەن كەزدەستى، دەپ حابارلادى ەلباسىنىڭ رەسمي سايتى. 

كەزدەسۋ بارىسىندا ەلباسى ەكى ەل قاتىناستارىنىڭ دامۋىنداعى وڭ ديناميكانى اتاپ ءوتتى.

"بۇل مەنىڭ قازاقستاننىڭ تۇڭعىش پرەزيدەنتى مارتەبەسىندە سىزدەرگە العاش كەلۋىم. ەلىمىزدە ەكونوميكالىق دامۋ باعدارلامالارىن جۇزەگە اسىرۋ جانە تاۋەلسىزدىكتى نىعايتۋ جۇمىستارى جالعاسۋدا. ءبىزدىڭ قارىم-قاتىناسىمىز قارقىندى دامىپ جاتىر، – دەدى نۇرسۇلتان نازارباەۆ.

ەلباسى قازىر ەكى ەلدىڭ ىنتىماقتاستىقتى كەڭەيتۋ ءۇشىن ءبىراز مۇمكىندىگى بار ەكەنىن اتاپ ءوتتى. ساۋدا كولەمىن ارتتىرۋ ماڭىزدى.

ء"بىز ءتيىستى لوگيستيكانى قۇردىق. ەرتەڭ تۇركى كەڭەسىنىڭ وتىرىسى وتەدى. مەن قۇرمەتتى توراعا مارتەبەسىن قۋانا قابىلدادىم، ويتكەنى مەملەكەتتەرىمىزدىڭ اراسىنداعى ىنتىماقتاستىقتى نىعايتۋعا ۇلەس قوسۋدى جالعاستىرعىم كەلەدى", – دەپ تولىقتىردى نازارباەۆ.

ال يلحام اليەۆ ەلباسىعا تۇركى كەڭەسىنىڭ وتىرىسىنا كەلگەنى ءۇشىن العىس ءبىلدىردى جانە ونىڭ ەكىجاقتى قاتىناستاردى نىعايتۋعا قوسقان ۇلەسىن اتاپ ءوتتى.

"قازاقستاننىڭ تۇڭعىش پرەزيدەنتىن ازەربايجان جەرىندە قارسى الۋ ءبىز ءۇشىن زور مارتەبە. ءسىز ازەربايجاننىڭ ۇلكەن دوسىسىز. كوپتەگەن حالىقارالىق ماسەلە بويىنشا ارقاشان ءبىزدىڭ ەلىمىزدى قولدادىڭىز. ءسىزدىڭ تۇركى تىلدەس ەلدەر اراسىنداعى ىنتىماقتاستىقتى نىعايتۋداعى ۇلەسىڭىز وراسان. مەرەيتويلىق ءسامميتتىڭ باكۋدە ءوتىپ جاتقانىنا ءبىز وتە قۋانىشتىمىز", – دەدى ازەربايجان رەسپۋبليكاسىنىڭ پرەزيدەنتى.

سونىمەن قاتار، يلحام اليەۆ قازاقستان استاناسىنىڭ سالىنۋى باكۋ قالاسىنىڭ دامۋىنا ۇلگى بولعانىن ايتتى.

"مەن قازاقستان استاناسىنىڭ تەز وزگەرگەنىن بايقادىم. ەكسپو كورمەسىن تاماشالاعان كەزدە قۇرىلىستىڭ اۋقىمى مەن ساۋلەتتىك شەبەرلىگىنە ريزا بولدىم. قازاقستاننىڭ بارلىق جەتىستىگى ءسىزدىڭ اتىڭىزبەن بايلانىستى", – دەدى ازەربايجان رەسپۋبليكاسىنىڭ پرەزيدەنتى.

 

سوڭعى جاڭالىقتار