15 قازان, 10:41 305 0 ادەبيەت انار لەپەسوۆا

قانىش ساتباەۆ-120: باياناۋىلدا رەسپۋبليكالىق جىر ءمۇشايراسى ءوتتى

باياناۋىل اۋدانىندا گەولوگ-عالىم، مينەرولوگيا عىلىمدارىنىڭ دوكتورى، پروفەسسور، قازاقتان شىققان تۇڭعىش اكادەميك قانىش ساتباەۆتىڭ 120 جىلدىعىنا ارنالعان رەسپۋبليكالىق اقىندار ءمۇشايراسىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى pavlodarnews.

"رۋحاني جاڭعىرۋ" باعدارلاماسى اياسىندا باياناۋىل اۋداندىق اكىمدىگى ۇيىمداستىرعان جىر دوداسىنا 20-دان استام اقىن قاتىستى.

- ءمۇشايرانىڭ ماقساتى – ۇلت تاريحىنا، قازاق عىلىمىنا، ونەرى مەن مادەنيەتىنە ولشەۋسىز ۇلەس قوسقان ۇلى تۇلعا قانىش ساتباەۆتىڭ ادامدىق بولمىسى مەن ەلەۋلى ەڭبەگىن ناسيحاتتاۋ، سول ارقىلى وسكەلەڭ ۇرپاقتى ەلى مەن جەرىن سۇيۋگە، وتانشىلدىققا تاربيەلەۋ، - دەدى اكىمدىكتە.

ءمۇشايرا ەرەجەسى بويىنشا 16-35 جاس ارالىعىنداعى اقىندار ءۇش ولەڭ جولداۋى كەرەك بولدى. ءبىرىنشى ولەڭ قانىش ساتباەۆقا ارنالسا، ەكىنشى ولەڭ - باياناۋىل تۋرالى جانە ءۇشىنشى ولەڭ ەلدىك، ەرلىك، ورلىك تاقىرىبىنداعى پاتريوتتىق ولەڭ بولۋى ءتيىس. ەكى ايعا جالعاسقان جىر بايگەسىنە اقىن، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» سىيلىعىنىڭ يەگەرى، قانىش ساتباەۆ تۋرالى ەستەلىكتەر توپتاستىرىلعان «زاڭعار» كىتابىنىڭ قۇراستىرۋشىسى، باياناۋىل اۋدانىنىڭ قۇرمەتتى ازاماتى، «جۇلدىز» جۋرنالىنىڭ باس رەداكتورى عالىم جايلىباي، اقىن، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ يەگەرى، قازاقستان جازۋشىلار وداعى پاۆلودار وبلىستىق فيليالىنىڭ ديرەكتورى ارمان قاني جانە اقىن، «نايزاتاس» جۋرنالىنىڭ باس رەداكتورى اسىل ءابىش قازىلىق ەتتى.

قازىلار القاسىنىڭ شەشىمىمەن باس جۇلدەگە قاراعاندىلىق جانىبەك ءاليمان يە بولدى. ءبىرىنشى ورىندى نۇر-سۇلتان قالاسىنان ولجاس قاسىم ەنشىلەسە، ەكىنشى ورىنعا بالقاش قالاسىنان ايدىن بايىس پەن تۇركىستاندىق مۇقاعالي كەنجەتايۇلى لايىق دەپ تانىلدى.

جۇلدەلى ءۇشىنشى ورىن شىعىس قازاقستاننان سەرىكجان قاجىتايعا، باياناۋىلدىق جولامان ايتكەن جانە باياناۋىل اۋدانى شومانكول اۋىلىنان مۇسابەك سەيسەنبەكۇلىنا بۇيىردى.

سونىمەن قاتار، ەكىباستۇزدىق راۋان قايدار وبلىستىق «نايزاتاس» ادەبي-كوركەم، قوعامدىق-ساياسي جۋرنالىنىڭ ارنايى جۇلدەسىن، ەرتىس اۋدانىنان باقبەرگەن داريعاۇلى اۋداندىق «بايانتاۋ» گازەتىنىڭ ارنايى جۇلدەسىن ەنشىلەدى. قاتىسۋشىلار مەن جۇلدەگەرلەرگە قارجىلاي سىيلىقتار تابىستالدى.

ءمۇشايرا قاتىسۋشىلارى اكادەميك ق.ساتباەۆتىڭ مەموريالدىق مۇراجايىندا ساقتالعان قۇندى جادىگەرلەرمەن تانىسىپ، باياناۋىلدىق وقىرماندارمەن كەزدەستى. باياناۋىل اۋىلىنداعى «دانالار داڭقى» اللەياسىنا ساياحات جاسادى.

 

سوڭعى جاڭالىقتار