14 قازان, 10:46 341 0 الەۋمەت انار لەپەسوۆا

قازاقستاندىققا 568 تەڭگە، شەتەلدىككە 6 500 تەڭگە: نۇرىمبەتوۆ اتىراۋداعى جالاقى تەڭسىزدىگىن سىنعا الدى

قازاقستاندىق جانە شەتەلدەن تارتىلاتىن مامانداردىڭ جالاقى تەڭسىزدىگى ماسەلەسىنىڭ كوتەرىلىپ جۇرگەنىنە تالاي جىلدىڭ ءجۇزى. اتىراۋعا ساپارى بارىسىندا بۇل تۇيتكىلگە ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ نازار اۋداردى. 

مينيستر «بولاشاق-اتىراۋ» جشس مۇناي مەن گاز ءوندىرۋ زاۋىتىنا باردى. ول ساپار بارىسىندا جۋرناليستەردىڭ سۇراعىنا جاۋاپ بەردى. ءوز سوزىندە نۇرىمبەتوۆ 50-دەن استام شەتەلدىك مامان جۇمىس ىستەيتىن قازاقستاندىق كاسىپورىندار ەڭبەك مينيسترلىگى مەن باس پروكۋراتۋرامەن تەكسەرىلەتىنىن مالىمدەدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، ەلىمىزدە 2 425 كومپانيا بەكىتىلگەن كۆوتا بويىنشا شەتەلدىك جۇمىسشىلاردى تارتىپ وتىر. اتالعان كاسىپورىنداردا 530 مىڭنان اسا قازاقستاندىق جۇمىس ىستەۋدە.

نۇرىمبەتوۆتىڭ ايتۋىنشا، بيىلعى جىلدىڭ قازان ايىنىڭ ورتاسىنا دەيىن 49 كاسىپورىن تەكسەرىلىپ، كوميسسيا 791 بۇزۋشىلىقتى انىقتاپتى. 24 كاسىپورىندا قازاقستاندىق جانە شەتەلدىك ماماندارعا جالاقى مەن سىياقى تولەۋگە قاتىستى 476 بۇزۋشىلىق انىقتالعان.

«وسىلايشا، اتىراۋ وبلىسىنداعى «مۇناقۇرىلىسقىزمەتى لتد» جشس-دا جەرگىلىكتى ينجەنەرەگە 568 تەڭگە كولەمىندە ساعاتتىق تاريفتىك مولشەرلەمە بەلگىلەنگەن. ال وسىنداي قىزمەتتەگى شەتەلدىك جۇمىسشىعا 6 500 تەڭگە بەلگىلەنىپتى. مۇنداي تاجىريبەگە جول بەرۋگە بولمايدى»، - دەيدى ەڭبەك ءمينيسترى.

ءبىرجان نۇرىمبەتوۆ قازاقستاندىق جانە شەتەلدىك جۇمىسشىلاردىڭ ەڭبەك جاعدايى مەن جالاقىسى تەڭ بولۋى كەرەكتىگىن ەسكەرتتى.

 

سوڭعى جاڭالىقتار