14 قازان, 10:04 252 0 نارىق انار لەپەسوۆا

بولىنگەن قارجىنى يگەرە الماعان مينيسترلىكتەر اتالدى

قارجى ءمينيسترى ءاليحان سمايىلوۆ ۇكىمەت وتىرىسىندا بيىلعى جىلدىڭ قاڭتار-قىركۇيەك ايلارىنداعى مەملەكەتتىك بيۋدجەتتىڭ كىرىسى مەن شىعىندارى جونىندە ەسەپ بەردى. 

«رەسپۋبليكالىق بيۋدجەت 19% جانە جەرگىلىكتى بيۋدجەتتەر 7% وسكەنىن اتاپ ءوتۋ كەرەك. ۇلتتىق قوردىڭ اكتيۆتەرى 2018 جىلدىڭ 9 ايىمەن سالىستىرعاندا 15 پايىزعا ءوسىپ، 26 ترلن 447 ملرد تەڭگەنى قۇرادى. شىعىندار بيۋدجەتتىڭ بارلىق دەڭگەيلەرىندە جوعارى پروتسەنتپەن يگەرىلدى. ەسەپتى كەزەڭنىڭ كورسەتكىشتەرى وسى جىلدى جوعارى دەڭگەيدە اياقتاۋعا بارلىق مۇمكىندىك بار ەكەنىن كورسەتەدى»، - دەدى ءاليحان سمايىلوۆ ۇكىمەت وتىرىسىندا. ونىڭ ايتۋىنشا، جىل باسىنان بەرى رەسپۋبليكالىق بيۋدجەتكە 4 ترلن 817 ملرد تەڭگە تابىس تۇسكەن. بۇل جوسپاردان 61 ملرد تەڭگەگە كوپ.

«2018 جىلعى 1 قازانداعى جاعدايمەن سالىستىرعاندا كىرىستىڭ ءوسۋ قارقىنى 118,5%، ياعني 751 ملرد تەڭگەنى قۇرادى. بۇل سومانىڭ 738 ملرد تەڭگەسى - سالىق. سالىق بولىنىسىندە نەگىزگى ءوسۋ قوسىلعان قۇن - 421 ملرد تەڭگە، كورپوراتيۆتىك تابىس - 184 ملرد تەڭگە جانە حالىقارالىق ساۋدا مەن سىرتقى وپەراتسيالارعا سالىناتىن 125 ملرد تەڭگە سالىققا كەلەدى»، - دەدى ول. ءاليحان سمايىلوۆ اتاپ وتكەندەي، كىرىس بويىنشا جوسپار نۇر-سۇلتان قالاسىن قوسپاعاندا بارلىق وڭىرلەردە ارتىعىمەن ورىندالعان.

«ال رەسپۋبليكالىق بيۋدجەتتىڭ شىعىندارى 8 ترلن 541 ملرد تەڭگەنى قۇرادى. ورىندالماۋ سوماسى - 14,3 ملرد تەڭگە. ونىڭ 5,7 ملرد تەڭگەسى - ۇنەمدەلگەن قاراجات. 8,6 ملرد تەڭگە يگەرىلمەي جاتىر. بۇل 2018 جىلدىڭ 9 ايىمەن سالىستىرعاندا بەس ەسە از. ەڭ كوپ يگەرىلمەگەن سوما مىنا اكىمشىلەردە قالىپتاستى: ەكولوگيا، گەولوگيا جانە تابيعي رەسۋرستار مينيسترلىگى - 1,5 ملرد تەڭگە، جوعارعى سوت - 1,2 ملرد تەڭگە، مادەنيەت جانە سپورت مينيسترلىگى - 992 ملن تەڭگە، ساۋدا جانە ينتەگراتسيا مينيسترلىگى - 947 ملن تەڭگە. قارجى يگەرمەۋدىڭ نەگىزگى سەبەپتەرى - كونكۋرستىق راسىمدەردى ۇزاق وتكىزۋ، ورىندالعان جۇمىس اكتىلەرىن ۋاقتىلى ۇسىنباۋ، قازىناشىلىق ورگاندارىنا تىركەۋگە شارتتار مەن قوسىمشا كەلىسىمدەردى كەش ۇسىنۋ»، - دەدى ول.

 

سوڭعى جاڭالىقتار