13 قازان, 17:14 269 0 ايماق انار لەپەسوۆا

قوستانايدا پيروتەحنيكا كەسىرىنەن مادەنيەت ءۇيى ورتەندى

قوستاناي وبلىسىندا اۋىلدىق مادەنيەت ۇيىنەن ءورت شىقتى. الدىن الا مالىمەت بويىنشا، جالىن پيروتەحنيكالىق زاتتاردى قولدانۋ كەزىندە قاۋىپسىزدىك ساقتاماۋدان تۇتانعان، دەپ حابارلايدى قازاقپارات.

«12 قازان كۇنى ساعات 22:18-دە ورتكە قارسى قىزمەتتىڭ پۋلتىنە قوستاناي وبلىسىنىڭ قارابالىق اۋدانىنداعى قارابالىق كەنتىندە مادەنيەت ءۇيى ورتەنىپ جاتقانى تۋرالى حابارلاما ءتۇستى. العاشقى قۇتقارۋشىلار جەتكەن ۋاقىتتا شاتىرداعى جىلىتۋ ماتەريالدارى بىقسىپ جاتقانى، سالدارىنان عيماراتتىڭ شاتىرىندا جالىن تۇتانعانى انىقتالدى. ءورتتىڭ تارالۋى 02:12-دە توقتاتىلىپ، ساعات 05:06-دا تولىعىمەن ءسوندىرىلدى. جالىن شارپىعان اۋماق 700 شارشى مەتردى قۇرادى. وقيعانىڭ الدىنا الا سەبەبى - پيروتەحنيكالىق بۇيىمداردى قولدانۋدا قاۋىپسىزدىكتى ساقتاماۋ»، - دەپ ءمالىم ەتتى قر ىشكى ىستەر مينيسترلىگى توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ.

ءتىلسىز جاۋدى اۋىزدىقتاۋعا وبلىستىق توتەنشە جاعدايلار دەپارتامەنتىنىڭ جەكە قۇرامىنان 30 ادام مەن 8 كولىك جۇمىلدىرىلدى. پوليتسيا قىزمەتكەرلەرى مادەنيەت ءۇيىنىڭ اۋماعىن قورشاۋعا العان.

سوڭعى جاڭالىقتار