13 قازان, 17:05 344 0 ادەبيەت انار لەپەسوۆا

ءىلياس شىعارمالارىنىڭ 20 تومدىعى وقىرمانعا جول تارتتى

تالدىقورعاندا اقىن، دراماتۋرگ، اۋدارماشى ءارى جۋرناليست ءىلياس جانسۇگىروۆتىڭ 20 تومدىق جيناعى وقىرمانعا جول تارتتى، دەپ حابارلايدى الماتى وبلىسى اكىمدىگىنىڭ ءباسپاسوز قىزمەتى.

اقىننىڭ 125 جىلدىعى اياسىندا جارىق كورگەن جيناق 10 مىڭ دانامەن باسىپ شىعارىلدى. «ءوز ەلى ءوز ەرلەرىن ەسكەرمەسە، ەل تەگى السىن قايدان كەمەڭگەردى» عىلىمي-پراكتيكالىق كونفەرەنتسيا شەڭبەرىندە وتكەن تۇساۋكەسەرگە وبلىس اكىمى اماندىق باتالوۆ قاتىستى.

«وسكەلەڭ ۇرپاققا قالدىرعان باي مۇرانى ناسيحاتتاۋ ماقساتىندا وبلىستا كوپتەگەن جۇمىس اتقارىلىپ جاتىر. ەلباسىنىڭ «رۋحاني جاڭعىرۋ» باعدارلاماسى اياسىندا وتكەنىمىزدى، تاريحىمىزدى، مادەني مۇرامىزدى جان-جاقتى تالداپ، زەردەلەۋگە مۇمكىندىك تۋدى. پرەزيدەنت قاسىم-جومارت توقاەۆ: «رۋحاني جاڭعىرۋ ءبىزدىڭ باستى باعدارىمىز بولىپ قالا بەرەتىنىن»، - اتاپ ءوتىپ، باعدارلامانىڭ ەلدىڭ ودان ءارى دامۋى ءۇشىن ماڭىزدىلىعىن ايتىپ وتكەن ەدى.

بۇل باعدارلاما قازاقتىڭ ۇلى اقىننىڭ مۇراسىن، قازاق ادەبيەتىنىڭ التىن قورىنىڭ قازىنالارىن ساقتاۋعا، كوبەيتۋگە مۇمكىندىك بەردى»، - دەدى وبلىس اكىمى جيىندا. ءوڭىر باسشىسىنىڭ ايتۋىنشا، ءىلياس جانسۇگىروۆتىڭ ەڭبەكتەرىن ناسيحاتتاۋ ماقساتىندا ايماقتا كوپتەگەن ماڭىزدى شارالار، ونىڭ ىشىندە ارنايى عىلىمي ەكسپەديتسيا دا جۇرگىزىلگەن.

«ەكپەديتسيا مۇشەلەرى ماسكەۋگە دەيىن بارىپ، اقىننىڭ ەرەكشە مۇراعات قۇجاتتارى مەن كىتاپتارىنىڭ كوشىرمەلەرىن اكەلدى»، - دەدى ول. اماندىق باتالوۆ سونىمەن قاتار، ءىلياس جانسۇگىروۆ اتىنداعى قوردىڭ قولداۋىمەن بيىل تانىمال اعىلشىن اقىنى بەليندا كۋكتىڭ اۋدارماسىمەن «قۇلاگەر» پوەماسى اعىلشىن تىلىنە اۋدارىلعانىن ءمالىم ەتتى. اتالمىش پوەمانى ورىس ادەبيەتىنىڭ كلاسسيكتەرى پاستەرناك، ماندەلستام، تسۆەتاەۆا ءوز تىلىنە اۋدارعان بولاتىن. سونىمەن قاتار، بۇعان دەيىن نەمىس اقىنى گەرد حايدەنرەيحتىڭ ارقاسىندا تۋىندى گەتە تىلىندە دە جارىققا شىققان.

وسىدان كەيىن ءسوز العان قازاقستان جازۋشىلار وداعىنىڭ توراعاسى، مەملەكەتتىك سىيلىقتىڭ يەگەرى، اقىن ۇلىقبەك ەسداۋلەت ەكپەديتسيانىڭ ارقاسىندا ماسكەۋدەن اقىننىڭ 18 كىتابى اكەلىنگەنىن اتاپ ءوتتى.

ءوز كەزەگىندە فيلولوگيا عىلىمدارىنىڭ دوكتورى، قازاقستان جازۋشىلار وداعى باسقارماسى توراعاسىنىڭ ورىنباسارى باۋىرجان جاقىپ اقىننىڭ ءومىرى مەن شىعارماشىلىعىنا ەگجەي-تەگجەيلى توقتالىپ، ونىڭ ۇلاعاتتى عۇمىرىنداعى ەڭبەگى جايلى سىر شەرتتى.

ال فيلولوگيا عىلىمدارىنىڭ دوكتورى، ءىلياس جانسۇگىروۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى نۇرداۋلەت اقىش اقىننىڭ شىعارماشىلىق الەمى تۋرالى ءسوز قوزعادى. اقىن شىعارماشىلىعىن زەرتتەۋدەگى سوڭعى جەتىستىكتەرى بويىنشا فيلولوگيا عىلىمدارىنىڭ دوكتورى، پروفەسسور، «ءىلياستانۋ» عىلىمي-پراكتيكالىق ورتالىعىنىڭ جەتەكشىسى مۇراتبەك يمانعازينوۆ بولىسسە، جازۋشى، «قازاق ادەبيەتى» رەسپۋبليكالىق گازەتىنىڭ باس رەداكتورى، تۇركى بەيبىتشىلىك سىيلىعىنىڭ يەگەرى داۋرەن قۋات اقىننىڭ جۋرناليستىك تالانتى تۋرالى ايتىپ بەردى.

يگى شارا اقىننىڭ مەرەيتويىنا ارنالعان رەسپۋبليكالىق «جازبا اقىندار» بايقاۋىنىڭ جەڭىمپازدارىن ماراپاتتاۋ راسىمىمەن جالعاستى. پوەتيكالىق بايقاۋدىڭ باس جۇلدەسىن اقىن بايبوتا كوشىم-نوعاي يەلەنسە، ءبىرىنشى ورىندى اقىن سەرىك اقسۇڭقار يەلەندى.

كونفەرەنتسيادان كەيىن مەرەكەلىك شارالار ۇلتتىق ات سپورتى جارىستارىنا ۇلاستى.

سوڭعى جاڭالىقتار