11 قازان, 15:34 296 0 سپورت انار لەپەسوۆا

ەركىن كۇرەس: قىتاي چەمپيوناتىندا قازاقتىڭ ۇلى توپ جاردى

لانجوۋ قالاسىندا وتكەن 2019 جىلعى ەركىن كۇرەس تۇرىنەن قىتاي چەمپيوناتىندا قازاق بالۋانى ەرلانبەك كاتەيۇلى تاعى دا التىن مەدالعا يە بولدى. بۇل تۋرالى قىتايدىڭ CNR اقپاراتتىق پورتالى حابارلادى.

ەرلانبەك كاتەيۇلى ەركىن كۇرەستەن التىن مەدالدى جەڭىپ الدى. قىتايداعى بالۋانداردىڭ كىل مىقتىسىن انىقتايتىن بۇل جولعى رەسپۋليكالىق بايراقتى باسەكەگە 137 كوماندادان 1120 سپورتشى قاتىسقان. 9 كۇن بويى 10 ءتۇرلى سالماق بويىنشا باق سىناعان چەمپيوناتتا قانداسىمىز، گانسۋ ولكەسىنىڭ بالۋانى ەرلانبەك كاتەيۇلى 65 كەلى سالماعىندا باس جۇلدەنى ەنشىلەگەن.

ەرلانبەك كاتەيۇلى 2009 جىلدان بەرى قىتاي چەمپيوناتتارىندا جەڭىس تۇعىرىنان تۇسپەي كەلە جاتقان بالۋان. ول قىتايدىڭ التاي ايماعىنا قاراستى قىزىلتاس قالاشىعىندا دۇنيەگە كەلگەن. 2010 جىلى قىتاي بىرىنشىلىگىندە 65 كەلى سالماق دارەجەسى بويىنشا چەمپيون اتانعان. 2014 جىلى وڭتۇستىك كورەيانىڭ ينچحون قالاسىندا وتكەن ازيا ويىندارىندا قولا مەدال يەلەنگەن.

ەرلانبەك قىتايداعى قازاقتار اراسىنان وليمپياداعا جولداما العان ءۇشىنشى قانداسىمىز. وعان دەيىن گرەك-ريم كۇرەسىنەن ءالنۇر تورگەۇلى، بوكستان قانات يسلام وليمپيادادا قىتاي اتىنان ونەر كورسەتكەن بولاتىن.

 

سوڭعى جاڭالىقتار