11 قازان, 12:07 257 0 ەكونوميكا انار لەپەسوۆا

ۇلتتىق بانك تەڭگەنىڭ قۇنسىزدانۋىنا قاتىستى تۇسىنىك بەردى

ۇلتتىق بانك توراعاسىنىڭ ورىنباسارى ەسجان ءبىرتانوۆ «2019-2021 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى بويىنشا بايانداما جاسادى. 

"2019-2021 جىلدارعا ينفلياتسيانىڭ نىسانالى ءدالىزى 4-6% اۋقىمىندا بەلگىلەنگەن. قىركۇيەك ايىنىڭ قورىتىندىسى بويىنشا جىلدىق ينفلياتسيا 5,3% دەڭگەيدە بولدى. جەمىس پەن كوكونىس باعاسىنىڭ ماۋسىمدىق تومەندەۋىنە قاراماستان، دەفلياتسيالىق پروتسەستەر بايقالمادى. ازىق-تۇلىك تاۋارلارىنىڭ باعاسى جىلدىق ماندە 9,1%-عا ءوسىپ، ينفلياتسياعا بارىنشا كوپ ۇلەس قوسۋىن جالعاستىرۋدا. باسقا فاكتورلاردىڭ ىشىندە ازىق-تۇلىككە الەمدىك باعانىڭ جوعارىلاۋىن، ىسكەرلىك بەلسەندىلىكتىڭ ءوسۋىن جانە تولەم بالانسىنىڭ اعىمداعى شوتىنىڭ ناشارلاۋىن اتاپ وتۋگە بولادى", - دەدى ەسجان ءبىرتانوۆ. 

ونىڭ باعالاۋىنشا، ينفلياتسيا بيىلعى جىلدىڭ قورىتىندىسى بويىنشا نىسانالى ءدالىزدىڭ جوعارعى شەكاراسىنا جاقىن – 5,7-5,8% دەڭگەيىندە قالىپتاسادى.

"ۆاليۋتا نارىعىندا مۇناي باعاسىنىڭ تومەندەۋى اياسىندا تەڭگەنىڭ بىرتىندەپ السىرەۋ ءۇردىسى بايقالادى. وسى جىلدىڭ 9 ايىندا مۇناي باعاسى ورتاشا ەسەپپەن باررەلىنە 65 اقش دوللارى دەڭگەيىندە قالىپتاستى، بۇل 2018 جىلعا قاراعاندا 12%-عا تومەن. 9 قازانداعى جاعداي بويىنشا تەڭگە باعامى مۇنايدىڭ اعىمداعى باعاسى باررەلىنە 58,3 دوللار بولىپ، 390,04 تەڭگەنى قۇرادى. جىل باسىنان بەرگى السىرەۋ 1,5%-دى قۇراپ وتىر. 1 قازاندا ۇلتتىق بانكتىڭ جالپى التىن ۆاليۋتا رەزەرۆتەرى 28,8 ملرد دوللار بولدى. ەلدىڭ حالىقارالىق رەزەرۆتەرى جيىنتىعىندا، ۇلتتىق قوردىڭ اكتيۆتەرىن قوسا العاندا، 88,2 ملرد دوللاردى قۇرادى", - دەدى ءبىرتانوۆ.

ماماننىڭ مالىمەتىنشە، 2018 جىلدىڭ 1 جارتىجىلدىعىمەن سالىستىرعاندا تاۋارلار ەكسپورتى 0,8%-عا ارتىپ، 28,6 ملرد دوللاردى قۇرادى. تاۋارلار يمپورتى 7,2%-عا ءوسىپ، 17,2 ملرد دوللاردى قۇرادى.

"كرەديتتىك بەلسەندىلىك بىرتىندەپ قالپىنا كەلۋدە. بانك سەكتورىنىڭ جالپى كرەديت پورتفەلى جىل باسىنان بەرى 1%-عا ءوسىپ، 13,2 ترلن تەڭگەگە جەتتى. وتكەن جىلدىڭ وسىنداي كەزەڭىمەن سالىستىرعاندا وسى جىلدىڭ 8 ايىندا بانكتەر 10,9%-عا ارتىق جاڭا نەسيەلەر بەردى", - دەپ تۇيىندەدى ەسجان ءبىرتانوۆ.

سوڭعى جاڭالىقتار