11 قازان, 11:07 270 0 رۋحانيات انار لەپەسوۆا

اقتوبەدە ءداستۇرلى ءانشى-جىرشىلار بايقاۋى باستالدى

اقتوبەگە ءداستۇرلى ءانشى-جىرشىلاردىڭ  "جان سەرىگىم - دومبىرا" اتتى بايقاۋى باستالدى.

قاتىسۋشىلار اقتوبە وڭىرىنەن شىققان اقىن، سازگەر، جىراۋلاردىڭ شىعارمالارىن ورىنداپ، باق سىناسادى. جىرشىلار سايىسى ەلباسى نۇرسۇلتان نازارباەۆتىڭ "بولاشاققا باعدار: رۋحاني جاڭعىرۋ" باعدارلاماسىنىڭ جالعاسى "ۇلى دالانىڭ جەتى قىرى" ماقالاسىن اياسىندا ءوتىپ جاتىر. وعان قوسا، عازيزا جۇبانوۆا اتىنداعى اقتوبە وبلىستىق فيلورمونيانىڭ 75 جىلدىعى مەن اقتوبە قالاسىنىڭ 150 جىلدىعىنا ارنالعان.

"جان سەرىگىم - دومبىرا" ءداستۇرلى ءانشى-جىرشىلاردىڭ بايقاۋىنا اقتوبەدەن وزگە باتىس قازاقستان، اتىراۋ، ماڭعىستاۋ، قىزىلوردا وبلىستارى مەن نۇر-سۇلتان قالاسىنان ونەرپازدار كەلگەن. ۇمىتكەرلەر سارى باتاقۇلى، قىزىل تۇردالىۇلى، تاڭىربەرگەن مولدابايلاردىڭ شىعارمالارىن 15-20 مينۋت ورىندايدى. 

"وسى ۋاقىتقا دەيىن ايماقتىق دەڭگەيدە بايقاۋ وتكىزىپ كەلدى. بيىل "جان سەرىگىم – دومبىرا" انشى-جىرشىلار بايقاۋىن رەسپۋبليكا كولەمىندە وتكىزىپ وتىرمىز. ەكى جىلدان ءانشى، جىرشىلار، ونەر مايتالماندارى قاتىستى. اقتوبە وڭىرىنەن شىعىپ، حالىقتىڭ ىقىلاسىنا بولەنگەن دارىندى ونەر يەلەرى قىزىل تۇردالىۇلى، سارى باتاقۇلى، ناۋرىزبەك جىراۋ، نۇرپەيىس بايعانين، تاڭىربەرگەن مولداباي، شەرنياز جارىلعاسۇلى، باكىر تاجىباەۆ سەكىلدى بەلگىلى ونەر يەلەرىنىڭ شىعارمالارىن ورىنداۋى ءتيىس قاتىسۋشىلار. قازىر ەلىمىزدىڭ ءداستۇرلى ءانشى، جىرشى، تەرمەشىلەرى جان-جاقتى. كەز كەلگەن جىر-داستاندى عالامتور ارقىلى تاۋىپ، جاتتاۋعا مۇمكىندىك مول", - دەگەن ع.جۇبانوۆا اتىنداعى اقتوبە وبلىستىق فيلارمونيانىڭ ديرەكتورى ەلۋباي كەنجاليەۆ ۇمىتكەرلەرگە ساتتىلىك تىلەدى.

رەسپۋبليكالىق بايقاۋ ەكى كەزەڭنەن تۇرادى. قاتىسۋشىلاردىڭ جاس ەرەكشەلىكتەرى 18-55 جاس ارالىعىندا. تالاپ بويىنشا 1 كەزەڭدە ورىندالعان شىعارما قايتالانباۋى شارت.

"ەلدىڭ نەگىزگى رۋحى ونەر، جىر-ءسوز بولعاندىقتان وسى دۇنيەنى ارداقتاپ، بولاشاق ۇرپاققا جەتكىزۋ بارلىعىمىزدىڭ پارىزىمىز. بۇل – سونىڭ ءبىر جولى. بايقاۋدى بارىنشا ءادىل وتكىزۋگە، ەلگە، جۇرتقا ۇلگى ەتۋگە تىرىسامىز. ورتامىزدا كوپتىڭ كوزىن كورگەن اعالارىمىز وتىر. رەسپۋبليكالىق بايقاۋدى جاقسى وتكىزۋگە اتسالىسامىز", - دەدى ادىلقازىلار القاسىنىڭ توراعاسى، بەلگىلى جىرشى، كۇيشى ەلدوس ەمىل.

ادىلقازىلار قۇرامىندا ءانشى ع.قۇرمانعاليەۆتىڭ شاكىرتى حايدار وتەعاليەۆ، اقىن نۇرلىبەك قالاۋوۆ، ءانشى ىرىستى سۇلەيمەنوۆا بار. حايدار وتەعاليەۆ "جان سەرىگىم – دومبىرا" بايقاۋىنىڭ رەسپۋبليكالىق دەڭگەيدە ءوتىپ جاتقانىن قولدايتىنىن جەتكىزدى. قاتىسۋشىلاردى ءادىل باعالاۋعا ۋادە بەردى. ادىلقازىلار مۇشەلەرى ءوز وڭىرلەرىندەگى ءداستۇرلى ءان مەن جىردىڭ دامۋ دەڭگەيىن اتاپ ءوتتى.

"نەگىزىنەن جىر ەلىمىزدىڭ باتىس ءوڭىرى مەن سىر ەلىندە كەڭ تاراعانا. دەگەنمەن، نۇر-سۇلتان قالاسى دا ءۇش ءجۇزدىڭ باسى قوسىلعان جەر عوي. ول جاقتا دا ءداستۇرلى ءان مەن جىر بارىنشا ناسيحاتتالىپ جاتىر. نۇر-سۇلتان قالاسىندا جىردى دامىتۋ ماقساتىندا قازاق ۇلتتىق ونەر ۋنيۆەرسيتەتىندە 7 جىلدان بەرى جىر ءبولىمى اشىلدى. ستۋدەنتتەردىڭ قىزىعۋشىلىعى جوعارى. العاشقى تۇلەكتەرىمىز ونەر كورسەتىپ ءجۇر", - دەدى ءانشى ىرىستى سۇلەيمەنوۆا.

"قازاق تۋعاننان دۇنيەدەن وتكەنشە جىرمەن بەسىككە بولەنىپ، اقىرعى دەمى شىققانشا ولەڭمەن، جوقتاۋمەن وتەدى. بۇل – قازاق حالقىنىڭ ومىرىنە، تىرشىلىگىنە ارالاسىپ، ءسىڭىسىپ كەتكەن دۇنيە. ماڭعىستاۋ وبلىسىندا 1942 جىلى مۇرىن اتامىز الماتى قالاسىنا بارىپ، قىرىمنىڭ 40 باتىرىن جىرلاپ تاۋىسا الماعان. 35 باتىردى الماتىدا، قالعان 6 باتىردى اۋىلعا كەلىپ جىرلاعان. ءدال وسىنداي كۇيدە بولماعانىمەن ءالى دە باس قوسۋلاردا وڭىرىمىزدە جىر-داستاندار جىرلانادى. قازاق دالاسىندا سىڭىسكەن ادەت بولعانىمەن سىر بويىندا، ماڭعىستاۋدا، باتىس قازاقستان وڭىرىندە جىر ءالى ولگەن جوق. وزەكتى قالپىندا", - دەدى بەلگىلى جىرشى، كۇيشى ەلدوس ەمىل.

سوڭعى جاڭالىقتار