11 قازان, 10:55 316 0 زاڭ انار لەپەسوۆا

الماتىدا تەراكت جاساماق بولعان ادام 10 جىلعا سوتتالدى

الماتى قالاسى المالى اۋداندىق قىلمىستىق سوتىنىڭ ا.ج.بيتيمباەۆتى تەرروريزم اكتىسىنە دايىندالۋ، تەرروريزمدى ناسيحاتتاۋ، ءدىني الاۋىزدىقتى قوزدىرۋ جانە اتىس قارۋىن زاڭسىز ساقتاۋ فاكتىلەرى بويىنشا 10 جىلعا سوتتاۋ تۋرالى ۇكىمى زاڭدى كۇشىنە ەندى. بۇل تۋرالى قر ۇقك ءباسپاسوز قىزمەتى حابارلادى. 

"ول ۇقك نازارىنا دەسترۋكتيۆتى ءدىني يدەولوگيانى ۇستانۋشى جانە قازاقستان رەسپۋبليكاسىندا تىيىم سالىنعان "دايش" حالىقارالىق تەرروريستىك ۇيىمىنىڭ جاقتاسى رەتىندە ىلىكتى. تەكسەرۋ بارىسىندا ونىڭ ينتەرنەتتە "دايش" ۇگىت-ناسيحاتىنىڭ ىقپالىمەن حالىق كوپ شوعىرلانعان ورىنداردا جارىلعىشتى پايدالانۋمەن تەراكتىلەر دايىنداۋى تۋرالى اقپارات الىندى. قارۋلى شابۋىل جاساعاننان كەيىن ول شەتەل سودىرلارىنىڭ قاتارىنا ءوتۋ جانە تەرروريستىك ارەكەتىن جالعاستىرۋ ءۇشىن سيرياعا جەتۋدى جوسپارلاعان. بيتيمباەۆتىڭ ويلارىن ىسكە اسىرماۋ ءۇشىن ونى وسى جىلدىڭ ساۋىرىندە الماتىدا ىشكى ىستەر ورگاندارىن تارتا وتىرىپ، ۇقك ۇستادى", - دەلىنگەن حابارلامادا.

ءتىنتۋ كەزىندە ودان اتىس قارۋى مەن تراۆماتيكالىق قارۋ، قولدان جاسالاتىن جارىلعىش قۇرالدار جاساۋعا ارنالعان قۇرامداس بولشەكتەر، ءۇش ساۋدا-ويىن-ساۋىق ورتالىعىنىڭ سىزبالارى، بەتپەردە مەن قولعاپ الىنعان.

بيتيمباەۆتىڭ كىناسى كۋاگەرلىك تۇسىنىكتەرمەن، زاتتاي جانە وزگە دە دالەلدەرمەن تولىقتاي دالەلدەندى.

سوڭعى جاڭالىقتار