10 قازان, 22:00 300 0 زاڭ انار لەپەسوۆا

سۋحانبەرديەۆا مەن قۇربىسى وقۋشىلاردى جەرتولەدە وقۋعا ماجبۇرلەگەن

سىبايلاس جەمقورلىققا قارسى قىزمەت بۇرىنعى ءبىلىم جانە عىلىم ۆيتسە-ءمينيسترى ەلميرا سۋحانبەرديەۆانىڭ مەن ونىڭ قۇربىسى، №3 مەكتەپتىڭ ديرەكتورى ەلەنا شەۆەرنياەۆانىڭ قىلمىستىق سحەماسى تۋرالى ايتتى. 

اگەنتتىكتىڭ اسا ماڭىزدى ىستەرى بويىنشا تەرگەۋشىسى رينات ايمۇقانوۆتىڭ ايتۋىنشا، نۇر-سۇلتان قالاسىنىڭ №3 گيمنازياسىندا ۇزاق ۋاقىتتان بەرى جەكە مەكتەپ جۇمىس ىستەپ كەلگەن.

«بۇل مەكتەپ ءىس جۇزىندە ە. شەۆەرنياەۆاعا تيەسىلى بولعان. ءىستى كەدەرگىسىز جۇرگىزۋ ءۇشىن ە. شەۆەرنياەۆا ءوزىنىڭ قۇربىسى ۆيتسە-مينيستر سۋحانبەرديەۆامەن بىرلەسىپ جۇمىس ىستەگەن. ولار وزدەرىنىڭ قىزمەتتىك وكىلەتتىگىن پايدالانىپ، مەكتەپكە «قامقورلىق» جاساپ كەلگەن. 2016 جىلى ءبىلىم باسقارماسى ءوز وقۋشىلارىنا ورىن جەتپەي جاتقان مەملەكەتتىك مەكتەپتە جەكە مەكتەپتىڭ جۇمىس ىستەپ تۇرعانىن سىنعا الىپ، ديرەكتور ە. شەۆەرنياەۆاعا شارا قولدانۋدى تاپسىرعان. ديرەكتور قۇربىسى ە. سۋحانبەرديەۆاعا جۇگىنىپ، ءبىلىم باسقارماسىنا ىقپالىن تيگىزگەن»، - دەدى رينات ايمۇقانوۆ ەلوردادا اگەنتتىك پەن قالالىق ءبىلىم باسقارماسىنىڭ بىرلەسكەن جينالىسىندا.

سىبايلاس جەمقورلىققا قارسى قىزمەتتىڭ تەكسەرۋى بارىسىندا سىنىپ جەتپەگەن وقۋشىلاردىڭ جەرتولەدە وقىعانى انىقتالعان. «سانيتارلىق-ەپيدەميالىق باقىلاۋ مەن ءورت قاۋىپسىزدىگى قىزمەتى مەكتەپتەن بىرقاتار زاڭبۇزۋشىلىقتار تاپتى.

انىقتالعانداي، گيمنازيانىڭ 48 وقۋ كابينەتى جەكە مەكتەپكە جالعا بەرىلگەن، 10 كابينەت پەن تاعى بەس كابينەت بىرىكتىرىلگەن. بۇل جالپى سىنىپتار سانىنىڭ 20% قۇرايدى. بۇل مەكتەپتە وقۋشىلاردىڭ كوپتىگى بۇرىن دا بايقالعان. ال ە. شەۆەرنياەۆا مەملەكەتتىك ورگاندارعا مەكتەپتىڭ ءوز سىنىپتارىن جالعا بەرە الاتىنى تۋرالى دەرەك وتكىزگەن. مەملەكەتتىك مەكتەپ وقۋشىلارى كابينەت جەتىسپەۋشىلىگىنەن جەرتولەدە، بالا تولى سىنىپتا وقۋعا ءماجبۇر بولعان. اتاپ ايتقاندا، «العاشقى اسكەري دايىندىق» پەن «تەحنولوگيا» ساباقتارىنا ۇلدار مەن قىزدار جەرتولەدە ءبىر سىنىپتا وقىعان»، - دەدى ر. ايمۇقانوۆ.

ودان بولەك، تەرگەۋشىنىڭ ايتۋىنشا، 3 جىلدا مەكتەپتىڭ بوس ورىن جوق دەگەن جەلەۋمەن بالالاردى قابىلداماۋ فاكتىلەرى بولعان. نۇر-سۇلتان قالالىق ءبىلىم باسقارماسىنىڭ باسشىسى مىندەتىن اتقارۋشى گۇلجان ايتجانوۆا №3 مەكتەپتىڭ قازىرگى جاعدايى تۋرالى سۇحبات بەردى. «قازىر ءبارى وزگەردى، جەكە مەكتەپ ۇجىمى عيماراتتان شىعارىلدى. ونىمەن كەلىسىمشارتى بىتكەن بالالار مەملەكەتتىك مەكتەپكە اۋىستى. قازىرگى ۋاقىتتا مەكتەپ ديرەكتورى مىندەتىن قارلىعاش قاليمجانقىزى ۋاقىتشا اتقارادى»، - دەدى گ. ايتجانوۆا.

سوڭعى جاڭالىقتار