10 قازان, 12:29 416 0 شوۋ-بيزنەس انار لەپەسوۆا

گۇلناز جولانوۆا: ءوزىمنىڭ ويىمنان شىعاتىن ءرولدى ءالى سومداعان جوقپىن

ونىڭ ۇلكەن ونەرگە العاشقى ءتاي-ءتايى «قازاق ارۋى» بايقاۋىنان باستالدى. قازاق قىزىنا ءتان يباسى، اقىلى مەن كوركى ۇيلەسكەن بويجەتكەن سول بايقاۋداعى جەڭىسىنەن كەيىن كينو ونەرىنىڭ تابالدىرىعىن اتتادى. بۇگىندە ول ۇلتتىق كينونارىقتا سۇرانىسقا يە اكتريسالاردىڭ ءبىرى. قورجىنىندا كورەرمەننىڭ جوعارى باعاسىن العان 10-عا تارتا ساپالى ءرول بار. كوپشىلىكتى تالانتىمەن عانا ەمەس، «جۇلدىزبىن» دەپ كەۋدە كەرمەيتىن قاراپايىمدىلىعىمەن دە باۋراعان گۇلناز جولانوۆا «تúrkistan» وقىرماندارىمەن شىعارماشىلىعىنداعى جاڭالىقتارمەن ءبولىستى.  

 – وتكەن اپتادان باستاپ كوپتەن كۇتكەن «توميريس» پروكاتقا شىقتى. فيلم­دى كورىپ ۇلگەرگەن بولارسىڭ. كوڭى­لىڭنەن شىقتى ما؟

– ءيا، تۇساۋكەسەرگە ارنايى بارىپ، ارىپتەستەرىممەن بىرگە كوردىم. فيلم كوڭىلىمنەن شىقتى. اۋقىمى كەڭ، ساپاسى جوعارى. اكتەرلىك قۇرام وتە ءساتتى جاساقتالعان. كوس­تيۋمدەر، لوكاتسيالار، مۋزىكا – بارلىعى ساۋاتتى تاڭدالعان، شەبەر ۇيلەستىرىلگەن. ەكى جارىم ساعات بويى كورەرمەندى جالىقتىرماي، ەكرانعا تەلمىرتۋ وڭاي شارۋا ەمەس. كوپىرمە سوزگە ەمەس، ەكشنعا كوبىرەك كوڭىل بولگەنى ۇنادى. اقان ساتاەۆتىڭ جۇمىسىنان كورەرمەن ءدال وسىنداي دەڭگەي كۇتتى دەپ ويلايمىن.

– ارىپتەسىڭ الميرانىڭ ويىنىن قالاي باعالايسىڭ؟ ءتوميريستىڭ ءتۇر-تۇلعاسى ءدال سونداي بولعانىنا سەندىرە الدى ما؟

– سەندىردى، سەندىم. الميرا ءوزىنىڭ فاكتۋراسىمەن، ءتۇر-تۇلعاسىمەن عانا ەمەس، شى­نايى ويىنىمەن دە باۋرادى. كينو الەمىندەگى دەبيۋتى بولسا دا كاسىبي اكتەرلەردەن ارتىق ويناماسا، كەم تۇسكەن جوق. تىڭعىلىقتى دايىندالعانى، جۇمىسىنا ۇلكەن جاۋاپكەرشىلىكپەن قاراعانى كورىنىپ تۇر. قازاق كينوسىندا جۇرگەن باسقا اكتريسالاردىڭ ەشقايسىسىن ءتوميريستىڭ رولىندە ەلەستەتە المايمىن. رەجيسسەردىڭ باستى بەينەنى ءدوپ تابۋى – ءوزىنىڭ عانا ەمەس، كۇللى قازاق كينوسىنىڭ جەڭىسى دەۋگە بولاتىن شىعار.

–  ءوزىڭدى تاريحي فيلمدەردەن قاشان كورەمىز؟

– وسىدان ەكى-ءۇش جىل بۇرىن شوقان ءۋاليحانوۆ تۋرالى «قاشقارعا ساياحات» اتتى اۋقىمدى  فيلمگە تۇسكەم. وكىنىشكە قاراي، ءتۇسىرىلىم اياقتالماي قالدى. الداعى ۋاقىتتا جاقسى ءبىر تاريحي كينوعا ءتۇسۋ بۇيىرار دەپ ويلايمىن.  ەڭ ۇلكەن ارماندارىمنىڭ ءبىرى وسى.

–  تاريحتا اتى قالعان قازاق قىزدارىنان كىمنىڭ وبرازىن سومداعىڭ كەلەدى؟

– ءاليا مولداعۇلوۆانىڭ ءرولىن سومداۋدى ارماندايمىن. ەگەر قازاقتىڭ داڭقتى باتىر قىزى تۋرالى فيلم تۇسىرىلەر بولسا، مىندەتتى تۇردە كاستينگكە قاتىسىپ، بارىنشا دايىندالىپ، وتۋگە تىرىسام.

–  جاقىندا ينستاگرامنان «كىشكەنتاي ءرول بولمايدى» دەگەن جازباڭدى كوزىمىز شالدى. جالپى، قانداي دا ءبىر تۇسىرىلىمگە شاقىرتۋ العاندا كەلىسىم بەرمەس بۇرىن قانداي تالاپتارعا باسا كوڭىل بولەسىڭ؟ 

–  ەڭ اۋەلى ستسەناريدى مۇقيات وقىپ شى­عامىن. ول باسى مەن اياعى، شارىقتاۋ شەگى، دراماتۋرگياسى بار دۇنيە بولۋى كەرەك. ەكىنشىدەن، رەجيسسەردىڭ كىم ەكەنىنە، تالعامى مەن كوزقاراسى قانداي ەكەنىنە كوڭىل بولەمىن.

ۇشىنشىدەن، جوبانى تۇسىرەتىن پروداكشننىڭ بۇرىن تۇسىرگەن تۋىندىلارىنا نازار اۋدارامىن. كورەرمەن كوڭىلىنەن شىققان، سۇرانىسقا يە فيلمدەر ءتۇسىرىپ جۇرگەن توپپەن جۇمىس ىستەۋگە تىرىسام. تورتىنشىدەن، گونورارعا قارايمىن. ەگەر تولەنەتىن اقى جۇمىستىڭ اۋقىمىنا ساي بولسا، ەش قارسىلىقسىز كەلىسىم بەرەم.

– «بيزنەس-پو كازاحسكي» ءفيلمىنىڭ جاڭا ءبولىمىن ءتۇسىرىپ كەلگەندەرىڭ تۋرالى دا كوزى قاراقتى كورەرمەن الەۋمەتتىك جەلىلەر ارقىلى حاباردار. كورەياداعى ءتۇسىرىلىم قالاي ءوتتى؟ قانداي قيىندىقتار بولدى؟

– «بيزنەس-پو كازاحسكي» ءفيلمى ون كۇندەي الماتىدا، ەكى اپتا كورەيادا ءتۇسىرىلدى. ءتۇسىرىلىم وتە قىزىقتى ءارى جەڭىل ءوتتى. تاۋلىگىنە 2-3 ساعات ۇيىقتاعان ساتتەرىمىز بولسا دا، شاعىمدانباي، شارشاماي، جۇمىلا كوتەردىك بار قيىندىقتى. جۇمىسىمىزدىڭ ناتيجەسى مونتاجدان كەيىن بەلگىلى بولادى. ءۇش بولىمنەن كەيىن ءتورتىنشىسىن كورەرمەن قالاي قابىلدار ەكەن دەگەن قورقىنىش جوق ەمەس. دەسە دە، جاڭا ءبولىم كوپشىلىكتىڭ قىزىعۋشىلىعىن تۋدىرادى دەپ سەنەمىن. ويتكەنى ستسەناريى الدىڭعى بولىمدەردەن ەرەكشە. پروبلەمالىق تۇستارى كوپ. وقيعا، قيمىل-ارەكەت بەلسەندى. كورەرمەندى جالىقتىرمايمىز دەپ ويلايمىن.

– ۇلكەن كينوعا كەلگەنىڭە اسا كوپ بولا قويماسا دا، قورجىنىڭا ءبىرشاما ساپالى رولدەر جيناپ ۇلگەردىڭ. ارقايسىسى ءبىر توبە شىعار، دەسە دە پورتفوليوڭنىڭ ەڭ جوعارعى جاعىنان ورىن الاتىنى قايسى؟

– شىنى كەرەك، ءوزىمنىڭ ويىمنان شىعاتىن كەرەمەت ءرولدى ءالى سومداعان جوقپىن. «مەنىڭ جۇمىسىم!» دەپ اۋىز تولتىرىپ ايتاتىن ءرول الداعى ۋاقىتتىڭ ەنشىسىندە دەپ ويلايمىن.  دەگەنمەن، پورتفوليومداعى جۇمىستاردىڭ اراسىندا اتموسفەراسى، دايىندىعى جونىنەن باسقالاردان ەرەك تۇراتىنى – «تاراز» ءفيلمى.

– كوبىنە رومانتيكالىق كومەديا، مەلودراما جانرلارىنداعى كينولارعا ءتۇستىڭ. ءبىر سارىننان جالىققان جوقسىڭ با؟ قاي جانردا باق سىناپ كورگىڭ كەلەدى؟

– كومەديادان جالىقتىم دەپ ايتا المايمىن. ءار فيلم – ءبىر تاجىريبە. ءار ءتۇرلى ورتادا، ءتۇرلى ادامدارمەن جۇمىس ىستەيسىڭ. ارقايسىنان ءبىر ساباق الاسىڭ. سوندىقتان كومەدياعا تاعى شاقىرسا، باس تارتپايمىن. الداعى ۋاقىتتا ءوزىمدى اۆتورلىق فيلمدە جانە تاريحي تۋىندىلاردا سىناپ كورگىم كەلەدى. فيلموگرافيامدا وسى جانرلارداعى كينولار كوبىرەك بولسا دەيمىن.

ونەردە كاسىبي/كاسىبي ەمەس دەگەن بولىنۋشىلىك بارىن اڭعارامىز. اسىرەسە، انشىلەر ديپلومسىز ءان ايتىپ جۇرگەن ارىپتەستەرىن شەتتەتىپ جاتادى. اكتەرلەر اراسىندا دا بار ما وسىنداي جىك؟

– بار، ارينە. مەنىڭشە، مۇنداي جىك بارلىق سالادا بار، بولا بەرەدى دە. الايدا كاستينگ ديرەكتورلار اكتەرلەردى ىرىكتەۋ كەزىندە ءبىلىمىڭ جوق، ديپلومىڭ جوق دەپ بىرەۋدى شەتتەتكەنىن كورگەن ەمەسپىن. ءتۇر-تۇلعاسى مەن تالانتى ءرولدى الىپ شىعاتىن دەڭگەيدە بولسا، كەۋدەسىنەن نەگە يتەرەدى؟ اركىمنىڭ ءوز باعى، بۇيىرعان ءرولى بار.

– وتاندىق كينووندىرىستىڭ نەگىزگى تاۋارى – كومەديا. كورەرمەننىڭ سۇرانىسى سول دەيدى رەجيسسەرلەر. ال حالىق ارزان كۇلكىدەن شارشاعانىن ايتادى. رەجيسسەرلەر ەكسپەريمەنت جاساۋدان قورقا ما؟ الدە ءبارى اقشاعا كەلىپ تىرەلە مە؟

– رەجيسسەرلەر ەكسپەريمەنت جاساپ ءجۇر. كومەديا عانا ەمەس، تريللەر، دراما جانرلارىندا تۇسىرىلگەن فيلمدەر بار. الايدا جارناماسى ءالسىز بولدى ما، الدە اكتەرلىك قۇرام اسا تانىمال بولماعاندىقتان با، كوپ كاسسا جيناي المادى. تانىمال، قولتاڭباسى قالىپتاسقان رەجيسسەرلەردىڭ كوبى كومەديا تۇسىرەتىنى جاسىرىن ەمەس. ولار تۇسىرگەن كينولاردىڭ جارناماسى ايقايلاپ تۇرادى. سوندىقتان كومەديانىڭ كورەرمەنى كوپ بولۋى زاڭدىلىق. الدىڭعى جىلى قازاقستان مەن قىرعىزستان بىرلەسىپ تۇسىرگەن «كوكپار» سپورتتىق دراماسىنا تۇستىك. ۇلتتىق ويىنىمىز تۋرالى مازمۇندى فيلم. جارناماسى دا جامان بولماعان سياقتى. وكىنىشكە قاراي، فيلمگە كوپ ادام كەلمەدى. بىراق كاسسا جيناي المادى دەپ جەڭىلمەۋ كەرەك دەپ ويلايمىن. تاجىريبە جاساپ، ءتۇرلى باعىتتتا، ءتۇرلى جانردا تۇسىرە بەرسەك، سانمەن بىرگە بىرتىندەپ ساپا پايدا بولادى. كورەرمەن ساپالى مەن ساپاسىزدى ايىرىپ، تالعام قالىپتاسادى.

– سەنىڭشە، قازاق كينوسى تاربيە قۇرالى رەتىندە ءوز مىندەتىن لايىقتى اتقارىپ وتىر ما؟

– قازاقستاننىڭ كينونارىعى ەندى عانا اياقتانىپ كەلەدى. بەس جىلدىڭ ىشىندە كينووندىرىستىڭ ايتارلىقتاي وسكەنى اڭعارىلادى. باسەكە پايدا بولدى. دەسە دە، ءالى كوممەرتسيالىق دەڭگەيدە ەكەنىمىزدى مويىنداۋ كەرەك. كينوگەرلەر قانداي دا ءبىر دۇنيە ۇسىناردا ەڭ اۋەلى نارىقتا ءوتىمدى مە دەگەن سۇراققا باس قاتىرادى. قوعامعا كەرەكتى، قۇندى تاقىرىپتاردى كوتەرەتىن دەڭگەيگە ءتاي-ءتايلاپ بولسا دا كەلە جاتىرمىز دەپ ويلايمىن.

 – سۇحباتىڭا راحمەت! شىعارماشىلىق تابىس تىلەيمىز!

سۇحباتتاسقان

انار لەپەسوۆا

سوڭعى جاڭالىقتار