9 قازان, 11:59 209 0 ءبىلىم انار لەپەسوۆا

فيزيكا سالاسىنداعى نوبەل ءۇش استرونومعا بۇيىردى

فيزيكا سالاسى بويىنشا 2019 جىلعى نوبەل سىيلىعى لاۋرەاتتارىنىڭ ەسىمدەرى بەلگىلى بولدى، دەپ حابارلايدى «حابار 24».

سىيلىق عارىشتىق زەرتتەۋلەر جۇرگىزگەنى ءۇشىن 3 بىردەي عالىمعا بۇيىرعان. ميشەل مايور مەن ديدە كەلو سوناۋ 1995 جىلى العاشقى ەكزوعالامشاردىڭ، ياعني كۇن جۇيەسىنەن تىس عالامشاردىڭ بارىن انىقتاعان. قوس عالىمنىڭ ورتاق جۇمىسىنىڭ ارقاسىندا استرونوميادا رەۆوليۋتسيالىق جاڭالىقتار اشىلىپ، قۇس جولىندا 4 مىڭنان اسا ەكزوعالامشاردىڭ بارى انىقتالعان. ال ءۇشىنشى عالىمنىڭ ەسىمى – دجەيمس پيبلس. ول فيزيكالىق عارىشناما سالاسىندا تەوريالىق جاڭالىقتار اشقانى ءۇشىن سىيلىققا لايىق دەپ تانىلعان.

گوران حەنسون، نوبەل كوميتەتىنىڭ باس حاتشىسى:

- بيىلعى لاۋرەاتتار ءبىزدىڭ عارىش تۋرالى تۇسىنىگىمىزدىڭ كەڭەيۋىنە سەپتىگىن تيگىزدى. اقشالاي سىيلىقتىڭ جارتىسىن كۇن ءتيپتى جۇلدىز توڭىرەگىندە اينالاتىن ەكزوعالامشاردى اشقان شۆەيتساريالىق عالىمدار ميشەل مايور مەن ديدە كەلو ءوزارا بولىسەتىن بولادى. ال ەكىنشى بولىگى ۇلكەن جارىلىستان كەيىن عالامنىڭ قالاي دامىعانى تۋرالى ءبىزدىڭ تۇسىنىگىمىزدىڭ قالىپتاسۋىنا ۇلەسىن قوسقان دجەيمس پيبلسقا بەرىلەدى.

سوڭعى جاڭالىقتار