8 قازان, 10:36 418 0 زاڭ انار لەپەسوۆا

جاڭاارقا اكىمىنىڭ ورىنباسارى العان پاراسىن 30 ەسەلەپ قايتارادى

جاڭاارقا اۋدانى اكىمىنىڭ ءبىرىنشى ورىنباسارى پارا العانى ءۇشىن سوتتالدى، دەپ حابارلايدى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى. 

«قاراعاندى وبلىسىنىڭ سىبايلاس جەمقورلىققا قارسى قىزمەتى پارا العان جاڭاارقا اۋدانى اكىمىنىڭ ءبىرىنشى ورىنباسارى – جەر كوميسسياسىنىڭ توراعاسى ب.ق. سەرىكوۆكە قاتىستى سوتقا دەيىنگى تەرگەۋدى اياقتادى.ول جەكە تۇلعالاردىڭ پايدالانۋىنا جاتپايتىن قوسىمشا جەر ۋچاسكەسىن جالعا بەرۋ تۋرالى وڭ شەشىم قابىلداعانى ءۇشىن ازاماتتان 200 مىڭ تەڭگە سوماسىندا پارا الدى دەگەن كۇدىككە ىلىنگەن. اعىمداعى جىلدىڭ 7 قازانىندا جاڭاارقا اۋداندىق سوتىنىڭ ۇكىمىمەن ب.ق. سەرىكوۆ پارا العانى ءۇشىن كىنالى دەپ تانىلىپ، وعان 6 ملن تەڭگە كولەمىندە ايىپپۇل سالىندى» - دەلىنگەن حابارلامادا.

سوتتالۋشى مەملەكەتتىك قىزمەتتە لاۋازىمدى قىزمەتپەن اينالىسۋ قۇقىعىنان ءومىر بويىنا ايىرىلدى.

 

سوڭعى جاڭالىقتار