3 قازان, 15:35 601 0 رۋحانيات "تۇركىستان" گازەتىنىڭ اۆتورلارى

ايتارى بار ايتالى

جەتىستىگى مەن تابىسى كوز قۋانتقان، سونىمەن قاتار ولقىلىقتارى مەن كەمشىلىكتەرى جانىمىزدى اۋىرتقان ءبىزدىڭ بۇگىنگى كۇردەلى قوعامدا «حالقىم» دەپ قابىرعاسى قايىساتىن، «قازاعىم» دەپ ۇلتتىق قۇندىلىقتارىمىزدى تۇگەندەپ جۇرەتىن ازاماتتار بار ەكەنى انىق. سونىڭ ءبىرى ءارى بىرەگەيى – امانگەلدى ءابدىراحمانۇلى ايتالى!

ءار ازاماتتىڭ كىسىلىك كەلبەتى كوپ جاعدايدا ادامگەرشىلىك قاسيەتتەرىنەن جانە حالقى ءۇشىن جاساپ جۇرگەن ىسىنەن كورىنەدى عوي. ەلىم مەن  جەرىمنىڭ، ءوسىپ كەلە جاتقان ۇرپاعىمنىڭ بولاشاعى، ءبىلىمى مەن تاربيەسى زامان تالابىنا ساي بولسا ەكەن دەپ قايىسپاس قارا نارداي ەڭبەكتەنىپ جۇرگەن ازاماتتار ارامىزدا از ەمەس.  دەسەك تە، مەن ءۇشىن سولاردىڭ اراسىندا شوقتىعى بيىك، ءبىلىمى تەرەڭ، قوعامىمىزداعى بولىپ جاتقان قۇبىلىستارعا ءدوپ باسىپ باعا بەرىپ قانا قويماي، ولاردىڭ شەشۋ جولدارىن دا ايقىن كورسەتىپ كەلە جاتقان امانگەلدى ءابدىراحمانۇلى ەكەندىگىنە ەشكىمنىڭ كۇمانى بولماس. سەبەبى ول ەلىنە بار ىقىلاسىمەن قىزمەت جاساپ كەلە جاتقان قايراتكەر.

ا.ايتالى قوعامنىڭ تامىرشىسى ىسپەتتەس. ول اركەزدە كوكەيكەستى ماسەلەلەر تۋرالى ماقالالار جازىپ كەلەدى. ونىڭ تەرەڭ تولعامدارىن قاي وقىرمان دا ءسۇيسىنىپ وقيتىنى، وزىنە مول عيبرات الاتىنى اقيقات. سانالى ادامعا وي سالاتىن كەيبىر ماقالالارىنا ارنايى توقتالعىم كەلىپ تۇر.

مەملەكەتتىك ءتىلدىڭ بۇگىنى مەن كەلەشەگى تۋرالى تولعانعان ويلارى كىم-كىمدى دە بەي-جاي قالدىرماسى انىق. ا.ايتالىنىڭ باستى ەرەكشەلىگى – باسقا ادام ايتا بەرمەيتىن ويلاردى ورتاعا سالاتىنى! مىسالى، 2018 جىلعى 29 ماۋسىمدا «ەگەمەن قازاقستان»  گازەتىنىڭ جاريالانعان ماقالاسىندا «قازاقستان بۇگىنگى  كۇنى تەك ەكى عانا ەمەس، ءۇش ءتىلدىڭ: قازاق، ورىس جانە اعىلشىن تىلدەرىنىڭ ءوزارا ارەكەتتەستىك الاڭىنا اينالدى. ءىس جۇزىندە، قازاق ءتىلى ەكى الەمدىك تىلمەن بايگەگە ءتۇستى جانە بۇل باسەكەلەستىك كۇرەستە عاسىرلار قيىنشىلىعىن كورىپ، ءالى ەڭسەسىن كوتەرە الماي كەلە جاتقان قازاق ءتىلىنىڭ امان قالۋى قيىن»،- دەپ وي تولعايدى. بۇل ويلار ءاربىر قازاقتى تولعاندىرۋى ءتيىس!

ال «انا ءتىلى» گازەتىنە شىققان ماقالاسىندا وسىنشا ۋاقىت بولسا دا، ەڭسەسى ءپاس ءتىلىمىزدى كوتەرۋدىڭ بىردەن-ءبىر ءتيىمدى جولى – «مەملەكەتتىك ءتىل تۋرالى» ارنايى زاڭ قابىلداۋ قاجەتتىگىن العا تارتادى. قازىر كەشەگى كەڭەس وداعىنا قاراعان، تىلدىك احۋالدارى بىزدەگىدەن الدەقايدا جاقسى ۇلتتىق رەسپۋبليكالاردىڭ بارلىعى دەرلىك مەملەكەتتىك ءتىل تۋرالى زاڭ قابىلداعانىن ەسكە سالادى. ال سولتۇستىك كورشىمىز رەسەيدىڭ ءوزى 1991 جىلى فەدەراتسيا حالىقتارىنىڭ تىلدەرى، ال 2005 جىلى مەملەكەتتىك ءتىل تۋرالى زاڭدار قابىلداعانى انىق. «بۇل جايلار ءبىزدى قاتتى ويلاندىرۋى قاجەت. «مەملەكەتتىك ءتىل تۋرالى» زاڭنىڭ كەرەكتىگى جونىندە ەكى پىكىر بولماۋى كەرەك. ونى تاۋەلسىزدىك جىلدارىنداعى تاجىريبەمىز دە، الەمدىك وركەنيەتتى ەلدەردىڭ شىندىعى دا ناقتى كورسەتىپ وتىر»،- دەپ ويىن تۇيىندەيدى.

سونداي-اق 1986 جىلى الماتىدا بولعان جەلتوقسان وقيعاسىنا ءالى دە تاريحي باعا بەرىلگەن جوق. كوشەدە بولا قالعان قاتارداعى وقيعا سياقتى ونىڭ اتاۋىن «جەلتوقسان وقيعاسى» دەپ جۇرگەنى انىق. «جەلتوقسان كوتەرىلىسى» دەۋگە كوبىنىڭ ءداتى بارا بەرمەيدى. ال ۇلت زەردەلىسى امانگەلدى ايتالى ونى «جەلتوقسان كوتەرىلىسى» دەپ اشىق جازىپ وتىر. 2016 جىلى «اقيقات» جۋرنالىندا جارىق كورگەن ماقالاسىندا «ايگىلى جەلتوقسان كوتەرىلىسىنە كەنەتتەن پايدا بولعان ستيحيالى قوزعالىس رەتىندە ەمەس، قوعامنىڭ  دامۋ بارىسىندا ومىرگە كەلگەن تابيعي، زاڭدى قۇبىلىس رەتىندە قاراۋىمىز  كەرەك. حح عاسىردىڭ 50-جىلدارى مەن 60-جىلداردىڭ باسىندا كەڭەس ۇلت ساياساتى قايشىلىققا تولى ەدى، ەڭ باستىسى ورتالىققا قارسىلىق كۇشەيدى.»،- دەي كەلىپ: «بۇل نارازىلىق كەڭەس وداعىندا ۇلت ماسەلەسى شەشىلدى دەگەن پارتيا تۇجىرىمىن جوققا شىعاردى.» دەگەن پايىم جاسايدى. ودان كەيىن «جەلتوقسان كوتەرىلىسىنىڭ باستى سەبەبى­نىڭ ءبىرى مەملەكەتتىڭ ۇلت ساياساتىنىڭ ەكىجۇزدىلىگىندە ەدى. مەملەكەت دەڭگەيىندەگى رەسمي، ءسوز جۇزىندەگى ستراتەگيالىق ساياسات حالىقتار دوستىعىن ۇلتتىق مۇددە مەن جالپىوداقتىق مۇددەنى ۇيلەستىرۋ، ۇلتتىق مادەنيەتتەر مەن تىلدەردى دامىتۋ نەگىزىندە  كەڭەس وداعىن نىعايتۋ بولسا، ءىس جۇزىندە كۇندەلىكتى ساياسات ول مۇددەمەن ۇيلەسە بەرمەيتىن»،-دەپ اشىق جازادى. سول كەزدە كوزبوياۋشىلىق پەن تسينيزم قارقىن العانىن، ۇلتتىق قۇندىلىقتاردىڭ كۇنى ءوتىپ بارادى دەۋشىلەردىڭ كوبەيگەنىن ايتا كەلىپ: «ۇلتتىق مۇددەگە قۇرمەتپەن قارايتىنداردان سەسكەنىپ، بيلىك ولارعا ءارتۇرلى جاعىمسىز ساياسي ايدار تاقتى، ءتىپتى، ايىپتادى، سوتتادى.»،- دەپ ساياسي-تاريحي اقيقاتتى العا توسىپ وتىر.

ول ۇنەمى «جاھاندانۋ داۋىرىندە ۇلتتىق قۇندىلىقتاردى قالاي ساقتاپ قالامىز، قالاي ەل بولىپ قالامىز؟» دەگەن سۇراقتارعا جاۋاپ ىزدەۋمەن جۇرەدى. وسى جىلعى «اقيقات» جۋرنالىنا جاريالانعان ماقالاسىندا ا.ايتالى تاۋەلسىزدىككە قول جەتكىزگەنىمىزبەن، ءالى وتارلانعان ۇلتتىڭ كەبىنىنەن شىعا الماي جۇرگەنىمىزگە جانى كۇيزەلەدى. «قازاق ەلىنىڭ كوبىنىڭ تاماعى توق، كويلەگى كوك بولار، بىراق، رۋحاني قۇلدىراۋ جالعاسۋدا، ۇلتتىڭ رۋحى السىرەپ بارادى. جانىن سالىپ ايانباي ىنتامەن كۇرەسكەن باتىرلاردىڭ ۇرپاعى ءجىبى بوستاۋ، كونگىش مومىنعا، جۋاستارعا اينالىپ بارادى»،- دەپ ۇلت ەڭسەسىن كوتەرۋدىڭ جولدارىن ىزدەيدى. رۋحاني جاڭعىرۋ – ساياسي بەلسىندىلىك، ۇلت ماقساتىنداعى الەۋمەتتىك – ەكونوميكالىق جاڭارۋمەن قاتار جۇرەتىنىن ەسكەرتەدى.

حالىقتى بىرىكتىرۋشى كۇشتىڭ ءبىرى ءدىن ەكەنى بەلگىلى. ا.ايتالى ەلدىڭ ءدىني دىڭگەگى – ءداستۇرلى يسلام دەپ ۇعىنادى. سوندىقتان مەملەكەت ءدىن سالاسىندا ءəدىل رەتتەۋشى بولۋى كەرەك ەكەنىن ايتىپ وتىر. «ەلدىڭ كونستيتۋتسياسىندا بەكىتىلگەن زايىرلىلىق ۇستانىمدارىنا سəيكەس، ستراتەگيالىق تۇرعىدان قازاقستاندىق بىرتەكتىلىكتى، ۇلتتىق مەملەكەت، ۇلتتىق مəدەنيەت، سالت-دəستۇرلەر، قالىپتاستىرۋ بارىسىندا ۇلتتىق ءدىني قايراتكەرلەردىڭ دە بەلسەندىلىگىن ارتتىرۋ اسا ماڭىزدى. بۇل ەكسترەميزمگە قارسى يممۋنيتەتتى قالىپتاستىرۋدىڭ جالعىز جولى»،- دەپ تۇجىرىم جاسايدى («ەگەمەن قازاقستان» گازەتى، 29.12.2016 جىل).

ەل پرەزيدەنتى قاسىم-جومارت توقاەۆتىڭ 2019 جىلعى 12 ماۋسىمداعى جارلىعىمەن ۇلتتىق قوعامدىق سەنىم كەڭەسى قۇرىلدى. بۇل كەڭەستىڭ قوعام ءۇشىن ماڭىزدىلىعى تۋرالى امانگەلدى ءابدىراحمانۇلى ارنايى ماقالا جازىپ، گازەتكە جاريالادى. ول: «بۇل كەڭەستىڭ الدىندا قىرۋار ءىس تۇر، ولاردى شەشۋ جولدارىنىڭ وڭاي بولمايتىنىن دا سەزەمىن. ونىڭ جۇمىسىنىڭ ناتيجەسىن دە ۋاقىت كورسەتەدى. دەگەنمەن، كوپشىلىك قالاعان ۇلتتىق قوعامدىق سەنىم كەڭەسى قۇرىلدى، ىسكە ءسات!»- دەيدى. حالىقتىڭ ءبىر وكىلى رەتىندە ۇلكەن سەنىم ارتىپ وتىر.

وسىنداي حالقىنىڭ قۇرمەتىنە بولەنگەن تۇلعانىڭ اقىل-كەڭەسىن تىڭداۋ، بىرگە قىزمەت جاساپ، ۇلگى-ونەگەسىن الۋدىڭ ءوزى عانيبەت ەمەس پە؟! وسى ورايدا، ەل تانىعان ازاماتپەن قالاي تانىس بولعانىم جونىندە قىسقاشا توقتالىپ كەتەيىن.

ءاربىر ادامنىڭ ءومىر جولىندا بولاشاق تاعدىرىنا ايتارلىقتاي اسەر ەتەتىن ەرەكشە تۇلعالار بولادى. مەن ءۇشىن جانە مەنىڭ ءومىر جولىمدا ايرىقشا ءرول اتقارعان جاننىڭ ءبىرى مەملەكەت جانە قوعام قايراتكەرى، قر پارلامەنتى ءماجىلىسىنىڭ بىرنەشە شاقىرىلىمىنىڭ دەپۋتاتى، فيلوسوفيا عىلىمىنىڭ دوكتورى، پروفەسسور امانگەلدى اعا دەپ ايتار ەدىم.

امانگەلدى اعامەن تانىستىعىمىز سوناۋ 1977 جىلدان باستالدى. جوعارى وقۋ ورنىن بىتىرگەننەن كەيىن، وتان الدىنداعى اسكەري بورىشىمدى وتەپ، اقتوبەگە ورالعان كەزىم ەدى. وسى قۋانىشتى ساتكە بايلانىستى انام اقجان نۇرپەيىسوۆا قالاداعى تۋما-تۋىستاردى شاقىرىپ، مول داستارحان جايدى. سىيلى قوناقتاردىڭ قاتارىندا امانگەلدى اعا مەن ايمان جەڭگەي دە بولدى. العاشقى كورگەنىمدە ۇزىن بويلى، دەنەلى، سابىرلى دا سىپايى جانە تۇيىقتاۋ مىنەزدى ادام بولىپ كورىندى. سول وتىرىستىڭ بارىسىندا اعامەن قوعام، ءومىر، ءبىلىم مەن عىلىم تۋرالى وي ءبولىسىپ، پىكىر الماسۋ مۇمكىندىگىنە يە بولدىم. ول كەزدە ابەكەڭ اقتوبە مەملەكەتتىك پەداگوگيكا ينستيتۋتىندا قوعامدىق پاندەر كافەدراسىنىڭ مەڭگەرۋشىسى بولىپ قىزمەت جاسايدى. حالقىمىز «جاقسىنىڭ جاقسىلىعىن ايت، نۇرى تاسىسىن» دەمەي مە؟ امانگەلدى اعا ماعان دا قامقورلىق جاساپ، عىلىم جولىنا تۇسۋىمە باعىت-باعدار سىلتەپ، جول اشتى. سودان بەرى امانگەلدى ءابدىراحمانۇلىنىڭ قول جەتكىزگەن تابىستارى مەن حالقىنا جاساعان ادال قىزمەتى كوز الدىمىزدا. ءومىرى ونەگەلى جاننىڭ تۋعان ەلىنە ايتار ويى دا، پايىمدى پىكىرى دە مول. ءوزىم دە ءماجىلىس دەپۋتاتتىعىنا كانديدات بولىپ، سايلاۋ ناۋقانىندا سايىسقا تۇسكەن كەزىمدە امانگەلدى اعا ىنتالى توپتى باسقارىپ، كەزدەسۋلەردە حالىق الدىنا شىعىپ، ەلدىڭ سەنىمىن ارتتىراتىن سىندارلى سوزدەرىن ايتىپ، سايلاۋشىلاردى ءبىر توقتام جاساۋعا، وڭ شەشىمگە كەلۋگە ۇگىتتەگەن ەدى. اعامىزعا رۋحاني شاكىرت بولعان، ونىڭ ساياسي جانە ۇلتتىق كوزقاراستاعى نىق ۇستانىمدارىن قولداپ، ءىزىن جالعاستىرعان ازاماتتار از ەمەس.

ا.ايتالى مەملەكەتتىك دەڭگەيدە، ودان قالدى قوعامدىق ورتادا بار بولمىسىمەن زور ابىروي مەن بەدەلگە يە بولدى. سونىڭ ناتيجەسىندە ۇلكەن جەتىستىكتەرگە قول جەتكىزدى. كەڭەس وكىمەتىنىڭ قىلىشىنان قانى تامىپ تۇرعان ۋاقىتتا ۇلتارالىق ماسەلەلەرگە بايلانىستى ماسكەۋ قالاسىندا دوكتورلىق ديسسەرتاتسياسىن ابىرويمەن قورعاپ شىقتى. سول كەزدەگى كەزدەسكەن قيىندىقتاردىڭ ءبارىن جەڭە بىلگەنىنىڭ كۋاسى بولدىم. بار بولعانى ەكى-ءۇش جىلدىڭ ىشىندە، ياعني، 1980 جىلداردىڭ باسىندا كەڭەستەر وداعىنىڭ ءبىرىنشى حاتشىلارى و دۇنيەلىك بولىپ، ۇلتارالىق قاتىناستاردا ۇستاناتىن قاعيدالار قۇبىلىپ، جازعان عىلىمي ەڭبەكتەرىن قورعاپ شىققاندار بىرەن-ساران ەدى. سول ساناۋلى عالىمداردىڭ ءبىرى امانگەلدى اعا بولاتىن.

ول كەزدەردە عىلىمي ەڭبەگىڭدى قورعاپ شىققاننان كەيىن ءبىر جىل ىشىندە جوعارى اتتەستاتسيالىق كوميسسيادان «بەكىتىلدى» دەگەن حابار كەلەدى. كوپ ۇزاماي بەكىتۋ قاعازى كەلىپ، امانگەلدى اعا اقتوبە پەداگوگيكا ينستيتۋتى رەكتورىنىڭ عىلىم جونىندەگى پرورەكتورلىق جۇمىسىنا تاعايىندالدى.  ارادا بەس-التى جىل وتكەننەن سوڭ اعانىڭ ءىزىن قۋىپ مەن دە رەكتوردىڭ الەۋمەتتىك سالانى رەتتەۋ جونىندەگى پرورەكتورى بولدىم. سول كەزدەردەگى بىرگە اتقارعان جۇمىستارىمىزدى ىستىق ىقىلاسپەن ەسكە الامىن.

امانگەلدى اعانىڭ ومىرىندەگى ەلەۋلى كەزەڭدەردىڭ ءبىرى دەپ اقتوبە تۇرعىندارىنىڭ قولداۋىنا يە بولىپ، حالىق قالاۋلىسى اتانىپ، قر پارلامەنتى ءماجىلىسىنىڭ ەكىنشى جانە ءۇشىنشى شاقىرىلىمدارىنىڭ دەپۋتاتى بولعان تۇستاعى اتقارعان قىزمەتىن ايتار ەدىم. ءماجىلىستىڭ ءاربىر شاقىرىلىمىنىڭ ورنى بولەك.  دەگەنمەن امانگەلدى اعا بولعان دەپۋتاتتىق كورپۋستىڭ مۇشەلەرى ەلىمىزدىڭ وركەندەۋىنە، ساياسي تۇراقتىلىقتى ساقتاۋعا، ازاماتتىق بەيبىتشىلىك پەن ۇلتتىق كەلىسىمدى نىعايتۋعا باعىتتالعان ماڭىزدى زاڭداردىڭ قابىلدانۋىنا وراسان زور ىقپالىن تيگىزگەنىن اتاپ وتكەن ءجون. امانگەلدى ءابدىراحمانۇلى الەۋمەتتىك سالالاردى رەتتەيتىن زاڭدارعا ومىرشەڭ ۇسىنىستار بەرىپ، كەلەلى وتىرىستاردا ءسوز الىپ، بايسالدى بايىپتىلىعىمەن تانىلدى. ءاردايىم ۇلتتىق جانە مەملەكەتتىك ماسەلەلەردىڭ زاڭدارعا قاتىستى ءتۇيىنىن ۇتىمدى تارقاتىپ، ولاردىڭ باپ رەتىندە قابىلدانۋىنا بويىنداعى بار كۇش-قايراتى مەن ءبىلىمىن ايامادى. اسىرەسە ۇلتتىق ماسەلەگە كەلگەندە امانگەلدى ءابدىراحمانۇلى سالماقتى دا سىندارلى ويلارىن العا تارتقان دەپۋتات بولدى.

كەزىندە حالىق جازۋشىسى شەرحان مۇرتازانىڭ امانگەلدى ايتالى ۇلكەن ابىرويعا يە بولعان دەپۋتات ەكەنىن ايتا كەلىپ: «پارلامەنتتە وتكەن بەس جىل ىشىندە ايتالى — ەل مۇددەسى ءۇشىن، ۇلت مارتەبەسى ءۇشىن ايانباي كۇرەسكەن ازامات. باسقا كوپتەگەن ەڭبەگىن بىلاي قويعاندا، تەك مەملەكەتتىك ءتىل – قازاق ءتىلىنىڭ بەدەلى ءۇشىن جانتالاسقان ايتىستارىنىڭ ابىروي-اتاعىن بيىككە كوتەردى. امانگەلدى ايتالىنى حالىق قاھارمانى دەۋگە ابدەن لايىق. حالىق مۇددەسىن ارداقتاعان ازاماتقا سەنىم مول» دەگەن پىكىرىنە الىپ-قوسارىمىز جوق.

«ەر ەلىمەن ايدارلى، ەل ەرىمەن ايبارلى» دەمەكشى، ەلىنە ايانباي قىزمەت جاساپ كەلە جاتقان امانگەلدى ءابدىراحمانۇلىنىڭ ءومىر جولى ىزىنە ەرىپ كەلە جاتقان بولاشاق ۇرپاققا ونەگە.

ا.ايتالى بيىل 80 جاستىڭ سەڭگىرىنە كوتەرىلىپ وتىر. جۋىردا عالىمنىڭ مەرەيتويى اقتوبە وڭىرىندە جوعارى دەڭگەيدە اتالىپ ءوتتى. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى كوپتەگەن يگى شارالار وتكىزدى.

سونىڭ ىشىندە اقىندار مۇحتار شاحانوۆ جانە ءحانبيبى ەسەنقاراقىزىنىڭ قاتىسۋىمەن دوڭگەلەك ۇستەل جانە كەزدەسۋ كەشتەرى، مەملەكەتتىك قىزمەت سالاسىنداعى استانا حابى باسقارۋشى كوميتەتىنىڭ توراعاسى ءاليحان بايمەنوۆتىڭ قاتىسۋىمەن «ءبىلىم جۇيەسى جانە زامان تالابى» اتتى جاستارمەن كەزدەسۋ كەشى بولدى. امانگەلدى ايتالىنىڭ «شاكىرت. ۇستاز. عالىم» جانە «رۋحاني كەمەلدىك» كىتاپتارىنىڭ تۇساۋكەسەرى ءوتتى. «حابار» تەلەارناسى تۇسىرگەن «قازاقتى نامىسى قامشىلاسىن» اتتى ءفيلمنىڭ كورسەتىلىمى بولدى.

اقتوبە وبلىسىنىڭ اكىمى وڭداسىن ورازالين مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن تابىس ەتتى. وسى تۇستا، وڭداسىن سەيىلۇلى وسى ا.ايتالىنىڭ تانىمال شاكىرتتەرىنىڭ ءبىرى ەكەنىن ايتا كەتكەن ءجون.

امانگەلدى ءابدىراحمانۇلى ءوز سوزىندە وسىنداي قۇرمەت كورسەتىپ، ەڭبەگىن باعالاپ وتىرعان وبلىس باسشىلىعىنا، ۋنيۆەرسيتەت ۇجىمىنا، اقتوبە جۇرتشىلىعىنا شىنايى ريزاشىلىعىن ءبىلدىردى.

بەلگىلى اقىن ءحانبيبى ەسەنقاراقىزىنىڭ:

«قارا نارىسىڭ حالىقتىڭ،

جولىندا جۇگىن قالدىرماس.

ار-اجارىسىڭ حالىقتىڭ،

ساۋىرعا قامشى سالدىرماس!» دەگەن كەسەكتى ويلارى ا.ايتالىنىڭ بولمىس-ءبىتىمىن ايقىن كورسەتىپ تۇر.

ءىزىن باسىپ كەلە جاتقان ءىنىسى رەتىندە وسى اتاۋلى كۇنگە بايلانىستى ايتارىم – حالقىنىڭ جۇرەگىنەن ورىن العان ازامات امانگەلدى ايتالى ەگەمەن ەلىمىزدىڭ دامۋى مەن  كوركەيۋىنە بەرگەنى مول، بەرەرى ءالى دە مول بولعاي. دەنساۋلىعى مىقتى بولىپ، ەلدىڭ ورتاسىندا جارقىلداپ جۇرە بەرۋىن تىلەيمىن. ۇلتتىق مۇددەنى كوزدەگەن ارمان-ماقساتتارى ورىندالۋىنا تىلەكتەسپىن.

قازاق حالقىنا ولشەۋسىز ەڭبەك سىڭىرگەن الاش قايراتكەرلەرى ءاليحان بوكەيحان، احمەت بايتۇرسىنۇلى جانە باسقا دا ارىستارىمىزدىڭ سالىپ كەتكەن دارا جولىن جالعاستىرعان ۇلت زيالىلارى بار. قاشاندا ۇلتتىق مۇددەنى، ەلدىك ماقساتتى ءبىرىنشى ورىنعا قويعان نار تۇلعالى ازاماتتارىمىزدىڭ ءبىرى وسى امانگەلدى ايتالى ەكەنى داۋسىز!

ەندەشە، ەل تاۋەلسىزدىگى مەرەكەسى قارساڭىندا امانگەلدى ايتالى قازاقستاننىڭ ەڭبەك ەرى اتاعىنا ۇسىنىلسا، ورىندى بولار ەدى. بۇل پىكىرىمىزدى حالىق تا، مەملەكەت باسشىسى دا قولدايدى دەپ ويلايمىن.

تولەگەن قۋانىشەۆ،

قر پارلامەنتى ءماجىلىسىنىڭ I شاقىرىلىمىنىڭ

دەپۋتاتى، پەداگوگيكا عىلىمىنىڭ كانديداتى، پروفەسسور

سوڭعى جاڭالىقتار