27 قىركۇيەك 2019, 15:47 868 0 ىشكى ساياسات انار لەپەسوۆا

ارۋجان ساين: ەش پايداسى جوق كونتسەرتتەردى توقتاتۋ كەرەك!

قر بالا قۇقىقتارى جونىندەگى ۋاكىل ارۋجان ساين اكىمدەرگە ۇندەۋ جاسادى. ورتالىق كوممۋنيكاتسيالار قىزمەتىندە وتكەن بريفينگتە ول  باسشىلاردى بيۋدجەت قارجىسىن كونتسەرتتەرگە شاشا بەرمەي، بالالاردىڭ يگىلىگىنە جۇمساۋعا شاقىردى.

«بالالاردىڭ بوس ۋاقىتتارى وتە كوپ. سوندىقتان ءبىر-بىرىمەن توبەلەسەدى. كوزدەرىن شىعارىپ، اراسىندا ورتەپ جىبەرگەندەرى دە بار. ءتىپتى، جىنىستىق قاتىناسقا ءتۇسىپ، جانۋارلاردى ازاپتاپ جاتقاندارى دا جەتىپ ارتىلادى. سوندىقتان بالالاردىڭ ءوز ۋاقىتتارىن ءتيىمدى پايدالانۋعا مۇمكىندىك بەرۋىمىز كەرەك. بالالاردىڭ ونەر، سپورت، عىلىممەن اينالىسۋىنا جاعداي جاساۋىمىز قاجەت»، - دەيدى ارۋجان ساين.

ونىڭ ايتۋىنشا، وتباسىنداعى قارجىلىق مۇمكىندىكتەر، الەۋمەتتىك دەڭگەيگە جانە اتا-اناسىنىڭ بىلىمىنە قاراماستان بالالار وزدەرىن دامىتاتىن بارلىق مۇمكىندىكتەرگە قول جەتكىزۋى ءتيىس.

«وسى كۇنى قوسىمشا ءبىلىم دەپ ايتىپ ءجۇرمىز عوي. ونىڭ بالالاردى تاربيەلەۋدەگى ماڭىزى زور. ءار وبلىستاعى مادەنيەت ۇيلەرى، سپورت سارايلارى قالپىنا كەلتىرىلۋى كەرەك. ءبىلىم بەرۋ ۇيىمدارى جۇيەسى ارقىلى بارلىق ۇيىرمەلەر مەن سپورت سەكتسيالارى قولجەتىمدى بولۋ كەرەك»، - دەيدى ۋاكىل.

ول وسى رەتتە جەرگىلىكتى اكىمدىكتەگىلەرگە بيۋدجەت قارجىسىن كونتسەرتتەر مەن يميدجدىك شارالارعا شاشا بەرمەي توقتاتۋ كەرەكتىگىن ايتتى.

«ءبارىمىز سالىق تولەپ وتىرمىز. سوندىقتان مەملەكەتتە اقشا بار. بىراق ونى ەلدى تانىتۋ باعىتىنداعى يميدجدىك ءىس-شارالارعا شاشا بەرۋدى توقتاتۋ قاجەت. ەشقانداي پايداسى جوق توپىرلاعان كونتسەرتتەردى توقتاتۋ كەرەك. ونىڭ ءبارى بيۋدجەت قارجىسىن شاشۋ، باسقا پايداسى جوق. وسى رەتتە اكىمدەرگە ءوتىنىشىم بار. وسىنداي ءىس-شارالاردى توقتاتىپ، قارجىنىڭ بارلىعىن بالالاردىڭ يگىلىگىنە جۇماساسىن. ءبىر جىلدان كەيىن-اق ناتيجەسىن كورەسىزدەر»، - دەدى ارۋجان ساين.

سوڭعى جاڭالىقتار