26 قىركۇيەك, 14:41 628 0 زاڭ انار لەپەسوۆا

مەملەكەتتىك قىزمەتكە كىمدەر كونكۋرستان تىس قابىلدانادى؟

بۇگىن سەنات دەپۋتاتتارى "قازاقستاننىڭ كەيبىر زاڭنامالىق اكتىلەرىنە مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ءبىرىنشى وقىلىمدا قابىلدادى.

قازاقستاندا شەتەلدە دوكتورانتۋرانى تامامداعان جانە حالىقارالىق ۇيىمداردا جۇمىس ىستەگەن ازاماتتار مەملەكەتتىك قىزمەتكە كونكۋرستان تىس كىرۋى مۇمكىن. جاڭا نورما سەناتتا ءبىرىنشى وقىلىمدا قابىلدانعان مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى تۋرالى زاڭ جوباسىندا كوزدەلگەن، دەپ حابارلايدى Sputnik قازاقستان ءتىلشىسى.

"جەتەكشى شەتەلدىك جوعارى وقۋ ورىندارىندا دوكتورانتۋرا باعدارلاماسى بويىنشا وقىعان، سونداي-اق، حالىقارالىق ۇيىمداردا جۇمىس تاجىريبەسى بار تۇلعالارعا مەملەكەتتىك قىزمەتكە كونكۋرستان تىس كىرۋ مۇمكىندىگىن جاساۋ كەرەك. كونكۋرستان تىس كىرۋ دەگەن كونكۋرستان وتپەۋ دەگەن ءسوز ەمەس. ولار پرەزيدەنتتىڭ جانىنداعى ۇلتتىق كوميسسيانىڭ كونكۋرسىنان وتەدى. ول ازاماتتار ەگجەي-تەگجەي تەكسەرىلىپ، ارنايى تەكسەرۋلەردەن ءوتىپ، سودان كەيىن قابىلدانۋى مۇمكىن", - دەپ ءتۇسىندىردى ءماجىلىس دەپۋتاتى ەرسۇلتان بەكتۇرعانوۆ.

سونىمەن قاتار، زاڭ جوباسىندا ءتيىستى وڭىرلىك مەملەكەتتىك ورگانداردىڭ باسشىسى لاۋازىمىنا كونكۋرستىق ىرىكتەۋدەن ويداعىداي وتكەن كانديداتتاردى ۋاكىلەتتى ورتالىق مەملەكەتتىك ورگاندارمەن كەلىسۋ پراكتيكاسىن الىپ تاستاۋ قاجەتتىگى قاراستىرىلعان.

"سەبەبى مەملەكەتتىك قىزمەت تۋرالى جاڭا زاڭعا سايكەس، كونكۋرستىق كوميسسيانىڭ وڭ قورىتىندىسىن العان ۇمىتكەر ءتيىسى لاۋازىمعا ءسوزسىز ورنالاسۋ مۇمكىندىگىنە يە بولادى. ەكىنشىدەن، ازاماتتاردىڭ سىناق مەرزىمىن انىقتاۋ مەن ارنايى تەكسەرۋدەن وتكىزۋ شارالارىن كونكۋرستان ءوتىپ، جۇمىسقا كىرگەن كۇننەن باستاپ قاتار باستاۋدى ۇسىنىپ وتىرمىز", - دەدى ول.

ۇشىنشىدەن، ماجىلىسمەننىڭ ايتۋىنشا، مەملەكەتتىك قىزمەتتەن تەرىس سەبەپتەرمەن ەمەس جۇمىستان بوساعان ادامدارعا جۇمىستان شىعارعاننان كەيىن تەستەن وتپەي، 30 كۇن ىشىندە مەملەكەتتىك قىزمەت كونكۋرستارىنا قايتادان قاتىسۋعا مۇمكىندىك بەرىلمەك.

"سوندىقتان بۇرىن مەملەكەتتىك قىزمەتتە ىستەگەن، كەيىن قايتادان جۇمىسقا كەلگەن ازاماتتارعا سىناق مەرزىمىن قويماۋ جەڭىلدىكتەرى كوزدەلگەن. تورتىنشىدەن، ورتالىق مەملەكەتتىك ورگانداردىڭ مەملەكەتتىك قىزمەتشىلەرىنە، ولاردىڭ ۆەدومستۆولارى مەن اۋماقتىق بولىمشەلەرى وتكىزەتىن ىشكى كونكۋرستارعا قاتىسۋ قۇقىعىن بەرۋ. بەسىنشىدەن، مەملەكەتتىك ورگاندارعا ءاربىر كونكۋرسقا كونكۋرستىق كوميسسيانى قۇرماي، تۇراقتى جۇمىس ىستەيتىن كوميسسيا قۇرۋعا مۇمكىندىك جاساۋ", - دەپ اتاپ ءوتتى بەكتۇرعانوۆ.

بۇدان بولەك، زاڭ جوباسىندا ءبىرىنشى باسشىلار ءۇشىن وزدەرىنە تىكەلەي باعىنىستى ادامدارىنىڭ سىبايلاس جەمقورلىق قىلمىسىن جاساعانى ءۇشىن دەربەس تارتىپتىك جاۋاپكەرشىلىكتى ەنگىزۋ ناقتىلانادى.

"زاڭ جوباسى مەملەكەتتىك قىزمەتشىلەردىڭ الەۋمەتتىك قورعالۋىن ارتتىرۋعا، كونكۋرستىق راسىمدەردى جەتىلدىرۋگە، مەملەكەتتىك ورگانداردىڭ كادر ماسەلەسىن شەشۋ جونىندەگى موبيلدىكتى ارتتىرۋعا، مەملەكەتتىك قىزمەتشىلەردىڭ جەكە جاۋاپكەرشىلىگىن جوعارىلاتۋعا، كادر تاپشىلىعىن ازايتۋعا ىقپال ەتەتىن بولادى", - دەدى دەپۋتات.

ونىڭ ايتۋىنشا، تەك وتكەن جىلدىڭ ىشىندە مەملەكەتتىك قىزمەتكە قىزىعۋشىلىق تانىتقاندار سانى 53 مىڭ ادامنان اسىپ، 24 مىڭنان استامى تەستىلەۋدەن وتكەن. قىزمەتتەگى اۋىسپالىق ەكى ەسەگە ازايىپ، نەگىزىنەن، ءبىرىنشى باسشىلار اۋىسقاندا، باسقا مەملەكەتتىك ورگانداردان اۋىستىرۋ رەتىمەن كەلەتىندەردىڭ سانى 18 ەسە قىسقارعان.

سەنات دەپۋتاتتارى زاڭ جوباسىن ءبىرىنشى وقىلىمدا ماقۇلدادى.

 

سوڭعى جاڭالىقتار