24 قىركۇيەك, 16:23 561 0 جاھان انار لەپەسوۆا

بۇۇ باس حاتشىسىنىڭ ورىنباسارى قازاقستانعا العىس ايتتى

بۇۇ باس اسسامبلەياسىنىڭ 74-ءشى سەسسياسى اياسىندا قر سىرتقى ىستەر ءمينيسترى مۇحتار تىلەۋبەردى بۇۇ باس حاتشىسىنىڭ ورىنباسارى، از دامىعان ەلدەر، تەڭىزگە شىعا المايتىن دامۋشى ەلدەر جانە شاعىن ارالدىق دامۋشى ەلدەر بويىنشا جوعارى وكىل فەكيتاموەلوا ۋتويكامانۋمەن كەزدەستى، دەپ حابارلادى قر ءسىم ءباسپاسوز قىزمەتى. 

باس حاتشىنىڭ ورىنباسارى قازاقستانعا تەڭىزگە شىعا المايتىن دامۋشى ەلدەر توبى اياسىنداعى رەسپۋبليكامىزدىڭ بەلسەندى قىزمەتى ءۇشىن العىس ءبىلدىردى.

سىرتقى ساياسي ۆەدومستۆوسىنىڭ باسشىسى بۇۇ وكىلىن تەڭىزگە شىعا المايتىن دامۋشى ەلدەر توبىندا 2020 جىلعى 1 قاڭتاردا باستالاتىن الداعى توراعالىق ەتۋ اياسىنداعى قازاقستاننىڭ جۇمىس باسىمدىقتارى تۋرالى حاباردار ەتتى. تەڭىزگە شىعا المايتىن ەڭ ءىرى مەملەكەت رەتىندە ءبىزدىڭ ەلىمىز ورنىقتى دامۋ ماقساتتارىنا قول جەتكىزۋ ءۇشىن وسى توپتا كوشباسشى بولماق.

"تاراپتار قازاقستان باستاماشىلىق جاساعان تەڭىزگە شىعا المايتىن دامۋشى ەلدەر ءۇشىن 2004-2014 جىلدارعا ارنالعان الماتى ءىس-قيمىل باعدارلاماسى جانە 2014-2024 جىلدارعا ارنالعان ۆەنا ءىس-قيمىل باعدارلاماسىنىڭ حالىقارالىق ىنتىماقتاستىققا ەلەۋلى ۇلەسىن اتاپ ءوتتى.
قازاقستان ءسىم باسشىسى م. تىلەۋبەردى بۇۇ باس حاتشىسىنىڭ ورىنباسارى - لاڭكەستىككە قارسى باسقارماسىنىڭ باسشىسى (لقب) ۆلاديمير ۆورونكوۆپەن كەلىسسوزدەر وتكىزدى.
مينيستر سۇحباتتاسىن قازاقستاننىڭ تەرروريزمگە قارسى ءىس-قيمىلدارىمەن تانىستىردى. قازاقستان تاراپى قر تۇڭعىش پرەزيدەنتى - ەلباسى نۇرسۇلتان نازارباەۆتىڭ باستاماسىمەن تەرروريزمنەن ازات الەمگە قول جەتكىزۋ ءۇشىن مىنەز-قۇلىق كودەكسىن العا جىلجىتقانى ءۇشىن لقب-نىڭ كورسەتكەن قولداۋىنا ريزاشىلىعىن ءبىلدىردى. بۇگىنگى تاڭدا كودەكسكە 84 مەملەكەت قوسىلدى جانە قازاقستان ونى امبەباپتاندىرۋ جونىندەگى جۇمىستى جالعاستىرادى", - دەلىنگەن تاراتىلعان اقپاراتتا.

بۇۇ وكىلى قازاقستاننىڭ قاۋىپسىزدىك پەن تۇراقتى دامۋدى قامتاماسىز ەتۋدەگى كۇش-جىگەرىن جوعارى باعالادى، سونداي-اق لقب-مەن بەلسەندى ىنتىماقتاستىعى ءۇشىن العىسىن ءبىلدىردى. قر ازاماتتارىن قاقتىعىستار ايماقتاردان قايتارعان «جۋسان» وپەراتسياسىن وتكىزۋ بويىنشا جەمىستى جۇمىس اتاپ ءوتىلدى، بۇل الەمنىڭ كوپتەگەن ەلدەرى ءۇشىن ۇلگى بولا الادى. تاراپتار بۇۇ قامقورلىعىمەن جوعارىدا اتالعان وپەراتسيا تۋرالى دەرەكتى فيلم ءتۇسىرۋ جانە لاڭكەستىككە قارسى كۇرەسكە ەلدەردى شاقىراتىن ارنايى PR-كامپانيانى ىسكە اسىرۋ تۋرالى ۋاعدالاستىققا قول جەتكىزدى.

 

 

سوڭعى جاڭالىقتار