19 قىركۇيەك, 12:12 527 0 نۇر وتان انار لەپەسوۆا

الەۋەتى زور ارىپتەستىك

اپتا باسىندا «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ۆەتنام كوممۋنيستىك پارتياسىنىڭ ورتالىق كوميتەت حاتشىسى ۆو ۆان تحىونگپەن كەزدەستى. كەزدەسۋ بارىسىندا تاراپتار ەكىجاقتى ىنتىماقتاستىق پەن مادەني-گۋمانيتارلىق بايلانىستى دامىتۋ پەرسپەكتيۆالارىن تالقىلادى.

قازىرگى تاڭدا ەكى ەل اراسىندا ءداستۇرلى دوستىق قاتىناس ورناعان. ۆەتنام – قازاقستان ءۇشىن وڭتۇستىك-شىعىس ازياداعى ەكونوميكالىق جانە ساياسي سالماقتى سەرىكتەس. سوڭعى جىلدارى ەكىجاقتى تاۋار اينالىمى تۇراقتى تۇردە العا ىلگەرىلەپ كەلەدى. بۇل كورسەتكىش سوڭعى 5 اي مەرزىمنىڭ وزىندە 23 پايىزعا وسكەن. ەكى مەملەكەتتىڭ ەكونوميكاسىن دامىتۋعا ىقپال ەتىپ، بولاشاقتا ۇلكەن ءۇمىت كۇتتىرەتىن باعىت قىزمەت كورسەتۋ جانە تۋريزم سالاسى بولىپ وتىر.

– قازاقستان – ورتالىق ازياداعى ەڭ قارقىندى دامىپ جاتقان، حالىقارالىق قاۋىمداستىقتىڭ قۇرمەتىنە يە بولىپ وتىرعان مەملەكەت. ءبىز تەك ەكونوميكالىق ىنتىماقتاستىقتى عانا ەمەس، سونىمەن قاتار مادەنيەت، ءبىلىم جانە باسقا دا سالالاردا ءوزارا بايلانىستى دامىتۋدى كوزدەيمىز، – دەدى ۆو ۆان تحىونگ.

كەزدەسۋدەن كەيىن «Nur Otan» پارتياسىنىڭ ورتالىق اپپاراتىندا Nur Media حولدينگىنىڭ تىلشىلەرىنە بەرگەن سۇحباتىندا ۆو ۆان تحىونگ قازاقستان مەن ۆەتنام اراسىنداعى سەرىكتەستىكتىڭ الەۋەتتى باعىتتارى تۋرالى ويىن ايتتى.

«ەكونوميكالىق ىنتىماقتاستىق باعىتتارىنىڭ الەۋەتى وتە زور. ۆەتنام – ايماقتىڭ اگروونەركاسىپتىك سالاسىن دامىتۋداعى كوشباسشى مەملەكەتتەردىڭ ءبىرى. ءبىز اۋىلشارۋاشىلىق ونىمدەرىن، مىسالى، كۇرىش، تەڭىز ونىمدەرىن ەكسپورتتاۋدا ۇلكەن تاجىريبە جينادىق. ەڭ قيىن دەگەن نارىقتاردى ءساتتى يگەردىك. قازىرگى كەزدە اقش، باتىس ەۋروپا، جاپونيا ەلدەرىمەن تىعىز قارىم-قاتىناستامىز. قازاقستاندى ونىمدەرىمىزدى العا جىلجىتۋدىڭ پەرسپەكتيۆالى باعىتى دەپ سانايمىز جانە سىزدەردىڭ ونىمدەرىڭىز ءبىزدىڭ ەلدە دە ۇلكەن سۇرانىسقا يە بولاتىنىنا سەنىمدىمىن»، – دەدى مارتەبەلى مەيمان.

سوڭعى جاڭالىقتار