17 قىركۇيەك, 16:29 429 0 سپورت انار لەپەسوۆا

توكيو وليمپياداسى: قازاقستان قورجىنىندا 15 جولداما بار

ەلوردادا كۇرەس تۇرلەرىنەن ءوتىپ جاتقان الەم چەمپيوناتىندا قازاقستاننىڭ قورجىنىنا 2020 جىلعى وليمپيادانىڭ ءۇش جولداماسى ءتۇستى. الەم بىرىنشىلىگىنىڭ ءۇشىنشى كۇنى گرەك-ريم كۇرەسىنەن وليمپيادالىق سالماق دارەجەلەرىندە بەلدەسكەن قوس بالۋانىمىز جولداماعا يەلىك ەتتى. 

60 كەلى سالماقتا مەيرامبەك ايناعۇلوۆ پەن 77 كەلى سالماقتا اسحات دىلمۇحامبەتوۆ جارتىلاي فينالعا دەيىن جەتىپ، قولا جۇلدە ءۇشىن تالاسادى. بۇگىن جارىس جولىنا بالۋان قىزدارىمىز شىعىپ، بىردەن وليمپيادا جولداماسىن يەلەندى. 50 كەلى سالماقتا ۆالەنتينا يسلاموۆا ىرىكتەۋ كەزەڭىندە فرانتسيالىق جيۋلي ساباتە  (11:0) مەن 1/8 فينالدا بەلارۋس كسەنيا ستانكەۆيچتەن (12:0) باسىم ءتۇستى. ال جارتىلاي فينال ءۇشىن وتكەن بەلدەسۋدە تۇركيالىق ەۆين دەميرحاندى جەڭدى. وسىلايشا، بالۋان قىزدارىمىزدىڭ ىشىنەن ۆالەنتينا يسلاموۆا العاش بولىپ وليمپيادا جولداماسىنا يەلىك ەتتى.

2020 جىلعى توكيو وليمپياداسىنا جولداما سانى 15-كە جەتتى. بۇعان دەيىن توكيوعا جولداما جەڭىپ العاندار:

  1. ريشات حايبۋللين (سپورتتىق سكالولاز)
  2. دميتري بالاندين (100,200 مەترگە براسس ادىسىمەن ءجۇزۋ)
  3. ولگا رىپاكوۆا (جەڭىل اتلەتيكا)
  4. گەورگي شەيكو (جەڭىل اتلەتيكا)
  5. ەۆگەني گيديچ (ۆەلوسپورت، شوسسە)
  6. كلاسسيكالىق ساداق اتۋدان قازاقستان ەرلەر قۇراماسى
  7. دەنيس گانكين (ساداق اتۋ)
  8. يلفات ابدۋللين (ساداق اتۋ)
  9. سانجار مۋساەۆ (ساداق اتۋ)
  10. ۆيتالي حۋدياكوۆ (اشىق سۋدا ءجۇزۋ)
  11. ەكاتەرينا نەميچ (بەينەلى ءجۇزۋ)
  12. الەكساندرا نەميچ (بەينەلى ءجۇزۋ)
  13. مەيرامبەك ايناعۇلوۆ (گرەك-ريم كۇرەسى)
  14. اسحات دىلمۇحامەدوۆ (گرەك-ريم كۇرەسى)
  15. ۆالەنتينا يسلاموۆا (ايەلدەر كۇرەسى)

ايتا كەتەيىك، تانىمال Gracenote ستاتيستيكالىق اگەنتىگى 2020 جىلى توكيودا (جاپونيا) وتەتىن جازعى وليمپيادا ويىندارىنا بولجام جاساعان بولاتىن. ولاردىڭ ساراپتاۋى بويىنشا قازاقستاندىق سپورتشىلار 2 التىن الادى. بۇدان بولەك 4 كۇمىس، 5 قولا الادى دەپ جازىلعان. جالپىكوماندالىق ەسەپتە 11 مەدالمەن 27-ورىننان كورىنۋى مۇمكىن.

ءحححىى جازعى وليمپيادا ويىندارى 2020 جىلدىڭ 24 شىلدەسى مەن 9 تامىزى ارالىعىندا وتەدى. تورتجىلدىقتىڭ باستى دوداسىندا 33 سپورت تۇرىنەن 339 مەدالدار جيىنتىعى ساراپقا سالىنادى. ايتا كەتەيىك، ريو وليمپياداسى الدىندا "Gracenote" قازاق سپورتشىلارى 4 التىن 3 كۇمىس 9 قولا مەدال جەڭىپ الىپ، جالپىكوماندالىق ەسەپتە 23-ورىن الادى دەپ بولجاعان ەدى. برازيليا جەرىندە قازاق سپورتشىلارى 3 التىن 5 كۇمىس 9 قولا مەدال ەنشىلەپ، جالپىكوماندالىق ەسەپتە 22-ورىن الدى.

سوڭعى جاڭالىقتار