17 قىركۇيەك, 14:38 455 0 سپورت انار لەپەسوۆا

قاناتتىڭ كەلەسى قارسىلاسى كىم؟

قازاقستاندىق بوكسشى قانات يسلامنىڭ 26 قازاندا الماتى قالاسىندا وتەتىن كاسىپقوي بوكس كەشىندەگى قارسىلاسى انىقتالدى.

«Qazaq promotions» كومپانياسىنىڭ instagram پاراقشاسىندا حابارلانعانداي، قانات يسلام (26-0, 21 KO) كەلەسى جەكپە-جەكتە ۋولتەر كاۋتوندوكۆامەن (18-1, 17 كو) كەزدەسەدى. «كەزدەسۋدە قانات يسلامعا تيەسىلى ءبىرىنشى ورتا سالماقتا WBO International چەمپيون اتاعى ساراپقا سالىنادى. ۋولتەر كاۋتوندوكۆا WBO نۇسقاسى بويىنشا توپ-10 بوكسشىنىڭ تىزىمىندە 10-شى ورىندا. 2018 جىلى ۋولتەر كاۋتوندوكۆا WBO-نىڭ ورتا سالماقتاعى چەمپيونى دەمەتريۋس اندرادەمەن (26-0, 17كو) كەزدەسكەن»، - دەلىنگەن حابارلامادا.

ەسكە سالا كەتسەك، بۇعان دەيىن قانات يسلام ءوزىنىڭ كەلەسى جەكپە-جەگىنىڭ قاشان وتەتىنىن جاريالاعان بولاتىن. «كەلەسى جەكپە-جەك 26 قازانعا جوسپارلاندى. وعان جاۋاپكەرشىلىك تە ۇلكەن. وسىندا اقش-تان مەنىڭ بۇرىنعى پروموۋتەرىم نەلسون لوپەس كەلدى. سول كىسىنىڭ ارقاسىندا مەن كاسىپقوي بوكستى ءبىلىپ، تانىدىم. امەريكادا ءاردايىم قولداپ ءجۇردى. الماتىدا باق سىناعىمىز كەلەدى. ماقساتىمىز – ەلىمىزدى، اسەم قالامىز بەن ونىڭ تابيعاتىن ماقتانىشپەن تانىتۋ»، - دەدى بوكسشى YouTube-تەگى Qazaq Promotion كانالىندا جاريالانعان ۆيدەودا.

سوڭعى جاڭالىقتار