16 قىركۇيەك, 10:38 413 0 الەۋمەت انار لەپەسوۆا

تەمىرجولداعى اپاتتان زارداپ شەككەندەردىڭ جاعدايى اۋىر

الماتى وبلىسىنىڭ دەنساۋلىق ساقتاۋ باسقارماسى باسشىسىنىڭ ورىنباسارى ومىرزاق نيازبەكوۆ شامالعان ستانتسياسىندا پويىز بەن اۆتوبۋستىڭ سوقتىعىسۋىنان زارداپ شەككەندەردىڭ جاعدايى تۋرالى مالىمەت بەردى.  

نيازبەكوۆتىڭ ايتۋىنشا، وقيعا ورنىنا 11 جەدەل جاردەم بريگاداسى جانە ءبىر قر ءىىم تجك بريگاداسى بارعان. زارداپ شەككەندەردى قاراساي اۋداندىق ورتالىق اۋرۋحاناعا جەتكىزدى. "ەكى جانە بەس جاسار قىزدار مەن ولاردىڭ اناسى (1986 جىلعى) اۋرۋحاناعا جەتكىزىلدى. بالالاردىڭ جاعدايى اسا اۋىر. ۇلكەن قىزىنا وتا جاسالدى. جاراقاتى اۋىر. بالانى وكپە جەلدەتۋ قۇرىلعىسىنا جالعاعان", - دەدى ول.

ونىڭ ايتۋىنشا، ەكىنشى قىزدىڭ دا جاعدايى تىم اۋىر. باس سۇيەگىنە زاقىم كەلگەن. ول دا وكپە جەلدەتۋ قۇرىلعىسىنا جالعانعان. ايەلدىڭ وڭ يىعى سىنعان، ءتورت قابىرعاسى، بۇعاناسى سىنعان. بالالار جاساندى كوماعا ءتۇستى. "ۇشەۋىنە دە باس ساۇيەك ميىنا كومپيۋتەرلىك توموگرافيا جاسالدى. اناسىنان ىسىكتى الىپ تاستادىق. قازىرگى ۋاقىتتا وعان جانساقتاۋ بولىمىندە ەمدەۋ شارالارى جۇرگىزىلىپ جاتىر", - دەدى نيازبەكوۆ.

باسقارما باسشىسىنىڭ ورىنباسارى وسى ءىستى الماتى وبلىسىنىڭ اكىمى اماندىق باتالوۆ ءوز باقىلاۋىنا العانىن ايتتى.

ەسكە سالايىق، توتەنشە جاعداي "ەكاتەرينبۋرگ-الماتى" تاسجولىنىڭ 2449-شاقىرىمىندا شامالعان ستانتسياسىندا 15 قىركۇيەكتە ساعات شامامەن 19.20-دا بولعان. اۆتوبۋس جۇرگىزۋشىسى دابىلعا قاراماستان تەمىرجولعا ءوتىپ كەتكەن. ناتيجەسىندە اۆتوبۋس پويىزبەن سوقتىعىسقان. اپات سالدارىنان اۆتوبۋس جۇرگىزۋشىسى قازا تاۋىپ، ءۇش ادام جانساقتاۋ بولىمىندە جاتىر.

سوڭعى جاڭالىقتار